১ বংশধর 11 - Chakma Bible

দায়ূদে ইস্রায়েলর্ রাজা অলঅ

¹ ইস্রায়েলীয়গুনে বেক্কুনে হিব্রোণত্‌ দায়ূদ ইদু এইনে কলাক্‌, “তর্‌ আর আমা কিয়্যেনিত্‌ এক্কুই লো আঘে।

² ইয়েন আগেন্দি যেক্কে শৌল রাজা এলঅ সেক্কে যুদ্ধো সময়োত্‌ তুয়ই ইস্রায়েলীয়গুনোর সৈন্য পরিচালনা গুরিদে; আর তর্‌ গোজেন্‌ লগেপ্রভু তরে কোইয়্যেদে যেনে তুয়ই তা মানুচ্চুনোর, অত্তাৎ ইস্রায়েলীয়গুনোরে দেগাশুনো গরচ্‌ আর তারার্‌ নেতা অচ্‌।”

³ ইস্রায়েল দেজর্‌ বেক্‌ বুড়ো নেতাগুনে হিব্রোণত্‌ দায়ূদ ইদু আজিল্ অলাক্‌। সেক্কে দায়ূদে লগেপ্রভুরে সাক্ষী রাগেইনে তারা লগে এক্কান চুক্তি গুরিলো, আর শমূয়েল মাধ্যমে কোইয়্যে লগেপ্রভুর কধা মজিম তারা দায়ূদরে ইস্রায়েল দেজ উগুরে রাজা ইজেবে অভিষেগ গুরিলো।

দায়ূদে যিরূশালেমান গজক্ গুরিলো

⁴ পরেন্দি দায়ূদে আর বেক্‌ ইস্রায়েলীয়গুনে যিরূশালেমত্‌, অত্তাৎ যিবূষোত্‌ গেলাক্‌। যিবূষীয়গুনে সিদু বজত্তি গুরিদাক্‌।

⁵ তারা দায়ূদরে কলাক্‌, “তুই ইদু সোমেই ন-পারিবে।” তো দায়ূদে সিয়োন তাম্বুলান্‌ গজক্ গুরিলো। ইক্কিনে সিয়েনরে দায়ূদ-শঅর কন্‌।

⁶ দায়ূদে কোইয়্যেদে, “যে মানুচ্চো পত্তমে যিবূষীয়গুনোরে আক্রমণ গুরিবো তেয়ই অবঅ আজল্‌ সেনাপতি।” সেক্কে সরূয়ার পুয়ো যোয়াবে পত্তমে আক্রমণ গুরিবাত্তে গেলঅ, সেনত্তে তারে আজল্‌ সেনাপতি বানা অলঅ।

⁷ ইয়েনর্ পরেন্দি দায়ূদে সে তাম্বুালনত্‌ বজত্তি গরা ধুরিলো; সেনত্তে সিয়েনরে দায়ূদ-শঅর্‌ কুয়া অদঅ।

⁸ তে মিল্লো ইদু শঅরান্‌ বানেল আর যোয়াব শঅরর্ বাদবাগি ভাগ্‌কান ঠিগ্‌ গুরিলো।

⁹ দায়ূদে দিন দিন আরঅ দরমর ওই উদিলো, কিত্তে বেগ্‌ খেমতাগানির গিরোজ্‌ লগেপ্রভু তা সমারে এলঅ।

দায়ূদ বোলী মানুচ্চুন

^10-11 লগেপ্রভুর শমক্‌ মজিম দায়ূদে যেনে বেক্ দেজছান উগুরে তা অধিকারান্‌ থিদেবর্ গুরি পারে সেনত্তে তা বোলী মানুচ্চুনো ভিদিরে যিগুনে আজল্‌ এলাক্‌ তারা বেক্‌ ইস্রায়েলীয়গুনো সমারে মিজেইনে তা পক্ষ লোইনে তা রাজগিরি খেমতাগান্‌ বাড়িলো। সে বোলী মানুচ্চুনো কধানি ইয়েনি: যাশবিয়াম নাঙে হক্‌মোনীয়গুনোর্‌ একজন এলদে “ত্রিশ” নাঙে বীর যোদ্ধাগুনে দলর্‌ আজল্‌। তে সেল্‌ মারিনে এক্কু সমারে তিনশত্‌ মান্‌জ্যরে মারে ফেলেয়্যে।

¹² সে পরেন্দি মানুচ্চো অলদে ইলিয়াসর। ইবে অলঅ অহোহীয় বংশর দোদোর পুয়ো। নাঙ-গোজ্যে তিন্নো বীরো ভিদিরে ইবে অলঅ এক্কো।

¹³ পলেষ্টীয়গুনে যেক্কে যুদ্ধোত্তে পস্‌-দম্মীমোত্‌ এগত্তর্‌ ওইয়োন্‌ সেক্কে ইলিয়াসরে দায়ূদ সমারে এলঅ। এক্কান্‌ জাগাত্‌ ধান্‌দোই ভোজ্যে এক্কান্‌ ক্ষেদত্‌ ইস্রায়েলীয় সৈন্যগুনে পলেষ্টীয়গুনো মুজুঙোত্তুন্‌ ধেই গেলাক্‌।

¹⁴ মাত্তর্‌ সে তিন্নো বীরে ক্ষেদ সংমোধ্যে যেইনে থিয়্যেলাক্‌। তারা সে ক্ষেত্‌তান রোক্ষ্যে গুরিলাক্‌ আর পলেষ্টীয়গুনোরে শেজ্‌ গুরি দিলাক্‌। সেদিন্যে লগেপ্রভু তারারে রোক্ষ্যে গুরিলো আর জিদেই দিলো।

¹⁵ একপল্লা তিন্নো বীরো ভিদিরেত্তুন্‌ তিনজনে অদুল্লম গাঢ কায়কুরে যে দাঙর্‌ পাত্তর্‌বো এলঅ সিয়েনত্‌ দায়ূদ ইদু এলাক্‌। সেক্কে একদল পলেষ্টীয় সৈন্য রফায়ীম কিজিঙোত্‌ তাম্বুল ফেলেলাক্‌।

¹⁶ সে অক্তত্‌ দায়ূদ ধূল্যেচর-চাগালাত্‌ তাম্বুলো ধোক্ক্যেন এক্কান্‌ জাগাত্‌ এলঅ আর পলেষ্টীয় সৈন্যদলুন বৈৎলেহমত্‌ এলাক্‌।

¹⁷ এন্‌ সময়োত্‌ দায়ূদর অমকদ পানি তিরেস্‌ পেলঅ, সেনত্তে তে কলঅ, “আহ্‌, যুনি কনজনে বৈৎলেহম গেদো কায়কুরে কূয়োবোত্তুন্‌ মরে এক্কানা হেবার্‌ পানি আনি দিদাক্‌!”

¹⁸ এ কধাগান শুনিনে সে তিন্নো বীর পলেষ্টীয় সৈন্যদল ভিদিরেন্দি যেইনে বৈৎলেহম গেদো কায় কূয়োবোত্তুন্‌ পানি তুলিনে দায়ূদো ইদু নেযেলাক্‌। মাত্তর্‌ দায়ূদে সিয়েন্‌ ন-হেলঅ; সিয়েন বদলে তে সে পানিগান্‌ লগেপ্রভুর নাঙে মাদিত্‌ ঢালি দিলো।

¹⁹ তে কলদে, “ও গোজেন, মুই যে এ পানিগান্‌ হেম্‌ সে কধাগান বাদ দে। এ মানুচ্চুনে, যিগুনে তারা পরাণর রিক্‌সোত্‌ নেযেয়োন্‌ তারার্‌ লো-গান্‌ কি মুই হেম্‌?” তারা তারার্‌ পরাণর রিক্‌সোত্‌ যেইনে সে পানিগান আন্যন্‌ বিলিনে দায়ূদে সিয়েন্‌ হেবাত্তে রাজী ন-অলঅ। সে তিন্নো নাঙ-গোজ্যে বীরো কামানি এলদে এধোক্ক্যেন।

²⁰ যোয়াব ভেই অবীশয় অলদে সে তিনজন উগুরে আজল্লো। তে সেল্‌ মারিনে তিনশত্‌ মান্‌জ্যরে মারে ফেলেয়্যে আর তেয়ো সে তিনজন ধোক্ক্যেন নাঙ-গোজ্যে ওই উদিলো।

²¹ তে সে তিনজনত্তুন্‌ বেশ্‌ আরঅ সর্মান পেইয়্যে। সেনত্তে সে তিনজন ভিদিরে তারে ধরা ন-অলেয়ো তে তারার্‌ সেনাপতি ওইয়্যে।

²² কব্‌সেলীয় যিহোয়াদার পুয়ো বনায় এঅদে এক্কো বীর যোদ্ধা। তেয়ো দাঙর্‌ দাঙর্‌ কাম্‌ গোজ্যে। মোয়াবীয় অরিয়েলর দ্বিবে পুয়োরে তে মারে ফেলেয়্যে। এক বরফ পোজ্যে দিনোত্‌ তে এক্কো গাদ ভিদিরে লামিনে এক্কো সিংহরে মারে ফেলেয়্যে।

²³ আরঅ এক্কো সাড়ে সাত ফুট অজল্ মিসরীয়রে তে মারে ফেলেয়্যে। সে মিসরীয়বো আদত্‌ এলদে তাত্‌ বুনিয়্যে বিয়োঙ ধোক্ক্যেন এক্কো সেল, মাত্তর্‌ তো তে মুগোর্ আদত্‌ গুরিনে তাইন্দি উজেই যেইয়্যে। সে মিসরীয়গুনো আদত্তুন্‌ সেল্‌লো কাড়ি লোইনে তে সে সেল্‌লোলোই তারে মারে ফেলেয়্যে।

²⁴ যিহোয়াদার পুয়ো বনায়র কামানি এলদে এধোক্ক্যেন। তেয়ো সে তিন্নো বীরো ধোক্ক্যেন নাঙ্‌-গোজ্যে ওই উদিলো।

²⁵ সে তিনজন ভিদিরে তারে ন-ধুরিলেয়ো তে “ত্রিশ” নাঙে দল্লোর মানুচ্চুনোত্তুন্‌ বেশ্‌ সর্মান্‌ পেইয়্যে। দায়ূদে তা কিয়্যে রোক্ষ্যে গুরিয়্যেগুনোর্‌ ভারান্‌ বনায় উগুরে দিলো।

²⁶ সে বোলী মানুচ্চুন অলাক্‌-যোয়াব ভেই অসাহেল, বৈৎলেহমর দোদোর পুয়ো ইল্‌হানন,

²⁷ হরোরীয় শম্মোৎ, পলোনীয় হেলস,

²⁸ তকোয় ইক্কেশর পুয়ো ঈরা, অনাথোত অবীয়েষর,

²⁹ হূশাতীয় সিব্বখয়, অহোহীয় ঈলয়,

³⁰ নটোফাতীয় মহরয়, নটোফাতীয় বানার পুয়ো হেলদ,

³¹ বিন্যামীন-গুট্টির গিবিয়ার রীবয়র পুয়ো ইথয়, পিরিয়াথোনীয় বনায়,

³² গাশ কলগত্তুন্‌ হূরয়, অর্বতীয় অবীয়েল,

³³ বাহরূমীয় অস্‌মাবৎ, শাল্‌বোনীয় ইলীয়হবঃ,

³⁴ গিষোণীয় হাষেম পুয়োগুন, হরারীয় শাগির পুয়ো যোনাথন,

³⁵ হরারীয় সাখর পুয়ো অহীয়াম, ঊরর পুয়ো ইলীফাল,

³⁶ মখেরাতীয় হেফর, পলোনীয় অহিয়,

³⁷ কর্মিলীয় হিষ্রো, ইষ্‌বয় পুয়ো নারয়,

³⁸ নাথন ভেই যোয়েল, হগ্রির পুয়ো মিভর,

³⁹ অম্মোনীয় সেলক, সরূয়ার পুয়ো যোয়াব আত্যের্‌ বোইয়্যে বেরোতীয় নহরয়,

^40-42 যিত্রীয় ঈরা, যিত্রীয় গারেব, হিত্তীয় ঊরিয়, অহলয়র পুয়ো সাবদ, রূবেণীয় শীষার পুয়ো অদীনা-তে এলদে রূবেণীয়গুনোর নেতা আর তা সমারে এলাক্‌ ত্রিশজন মানুচ্‌,

⁴³ মাখার পুয়ো হানান, মিত্মীয় যোশাফট,

⁴⁴ অষ্টরোতীয় উষিয়, অরোয়েরীয় হোথমর দ্বিবে পুয়ো শাম আর যিয়ীয়েল,

⁴⁵ শিম্রি পুয়ো যিদিয়্যেল আর তা ভেই তীষীয় যোহা,

⁴⁶ মহবীয় ইলীয়েল, ইল্‌নামর দ্বিবে পুয়ো যিরীবয় আর যোশবিয়, মোয়াবিয় যিৎমা,

⁴⁷ ইলীয়েল, ওবেদ আর মসোবায়ীয় যাসীয়েল।