১ বংশধর 10 - Chakma Bibleশৌলর মরাণা 1 একপল্লা পলেষ্টীয়গুনে ইস্রায়েলীয়গুনো বিরুদ্ধে যুদ্ধো গুরিলাক্ আর ইস্রায়েলীয়গুনে তারা মুজুঙোত্তুন্ ধেই গেলাক্। তারা ভিদিরে ভালোক্কুন্ মান্জ্যে মুড়োমুড়িত্ পলেষ্টীয়গুনো আদত্ মুরি গেলাক্। 2 পলেষ্টীয়গুনে শৌল আর তা পুয়োগুনো পিজেদি লোড়েইনে তা পুয়ো যোনাথন, অবীনাদব আর মল্কী-শূয়রে মারে ফেলেলাক্। 3 সে পরেন্দি শৌল বিরুদ্ধে আরঅ জদবদে যুদ্ধো চলিলো। ধনুবলা সৈন্যগুনে তারে দেগিনে আঘাত্ গুরিলাক্। 4 শৌল সেক্কে তা আত্যের্ বোইয়্যে মানুচ্চোরে কলঅ, “তঅ ধামাগান্ নিগিলেনে মঅ কিয়্যেগান্ এফুড়্-উফুড়্ গুরি দে। সেধোক্ক্যেন ন-গুরিলে সে সুন্নত ন-গোজ্যে মানুচ্চুনে এইনে মরে অগমান্ গুরিবাক্।” মাত্তর্ তা আত্যের্ বোইয়্যে মানুচ্চো সিয়েন্ গুরিবাত্তে রাজী ন-অলঅ, কিত্তে তে অমকদ দোরেইয়্যে। সেক্কে শৌল তা নিজো তলোয়ারান্দোই নিজে সিয়েন উগুরে পড়িলো। 5 শৌল মুরি যেইয়্যে দেগিনে তা আত্যের্ বোইয়্যেবোয়ো নিজো তলোয়ারান উগুরে পড়িনে মুরি গেলঅ। 6 এধোক্ক্যেন গুরিনে সেদিন্যে শৌল, তা তিন্নো পুয়ো আর তা সমারে মানুচ্চুনে এক লগে মুরি গেলাক্। 7 যিদুক্কুন্ ইস্রায়েলীয় সে অক্তত্ কলগত্ এলাক্ তারা যেক্কে দেগিলাক্, ইস্রায়েলীয় সৈন্যগুনে ধেই যেইয়োন্ আর শৌল আর তা পুয়োগুনে মারা পোজ্যন্ সেক্কে তারায়ো তারা আদামানি ছাড়িনে ধেই গেলাক্, আর পলেষ্টীয়গুনে এইনে সে আদামানি গজক্ গুরি নেযেলাক্। 8 তার্ কেল্যে পলেষ্টীয়গুনে মরা মানচ্চুনো পযাপিরানি লুদেবাত্তে এইনে দেগিলাক্ গিলবোয় মুড়োবো উগুরে শৌল আর তা পুয়োগুনো মরাকিয়্যেগানি পড়ি আঘে। 9 তারা শৌল মাদাবো কাবি ফেলেলাক্ আর তা কাবড়-চুগোড়ানি আর আত্যেরানি খুলি নিলাক্। এ হবরান্ তারার্ বেক্ দেব-দেবেদাগুনোর আর মানুচ্চুনো ইদু ফগদাঙ্ গুরিবাত্তে তারা পলেষ্টীয় দেজ বেক্ জাগানিত্ সিয়েনি পাধেই দিলাক্। 10 সে পরেন্দি তারা শৌল আত্যেরানি নেযেইনে তারা দেবেদাগুনো মন্দিরোত্ রাগেলাক্ আর তা মাদাবো দাগোন-দেবেদা মন্দিরোত্ টাঙেই দিলাক্। 11 পলেষ্টীয়গুনে শৌল উগুরে যিয়েনি গোজ্যন্ যাবেশ-গিলিয়দ বেক্ মানুচ্চুনে সিয়েনি শুনিলাক্। 12 সেক্কে সিদুগোর্ বীর সৈন্যগুনে যেইনে শৌল আর তা পুয়োগুনোর্ মরাকিয়্যেগানি যাবেশত্ আনিলাক্। যাবেশ এলোন গাচ্ছো তলাত্ তারা আড়ুন্ গারেলাক্ আর সাত দিন সং উবোস থেলাক্। 13-14 লগেপ্রভু উগুরে অবিশ্বেজি ওইয়্যে বিলিনে শৌল মুরি গেলঅ। তে লগেপ্রভুর কধানি মানি ন-চলে; এন্ কি, লগেপ্রভু ইত্তুন্ সল্লা ন-চেইনে তে বজং আত্মা সমারে মিজেয়্যে মান্জ্যত্তুন্ সল্লা নেযেয়্যে। সেনত্তে লগেপ্রভু তা মরণ ঘোদেল আর রেজ্যগান্ যিশয় পুয়ো দায়ূদ আদত্ তুলি দিলো। |
Copyright © 2021 Bangladesh Bible Society
Bangladesh Bible Society