Salmos 91 - Kaxinawá Bíblia (BR)

Deusũ nuku mekekĩ irumamiskiaki, na nawati hãtxarã

¹ Tsuara Deus dasibi kushipa binuatũ hatu meke pewashũ utawa pe hiwemisbũ

² habũ Deus yuikĩ: “Mianã, mĩ ea irumamiski. Mĩ ẽ hiwe ewapa kushipaki. Mĩ ẽ Deus pepaki txiti ikĩ ẽ mia ikũwaiĩ.”

³ Deusũ besti birũ hunea tibi inũ isĩ atimapa tibi nuku mekekĩ nemashũmiski.

⁴ Takarã hawẽ bake mekekĩ nushamis keska wakĩ mĩ nuku mekekĩ nusha nũ dateismaki. Shinã betsa wama nuku putama mĩ nuku mekekubaĩmiski, hawẽ pia nemati keskawenã.

⁵ Meshu merã kai hawara meseki dateyamakãwẽ. Bariri matukiri pia bishku bishku abiaibũ dateyamakãwẽ.

⁶ Meshu merã isĩ atimapa matuki hikitiruki dateyamakãwẽ. Bariri isĩ betsa tibi matuki hikitã yamawatiruki dateyamakãwẽ.

⁷ Mia dapike mĩ yusmauria 1.000 mawai di itirubuki. Ha inũ, mĩ yusiuria 10.000 habiaskariai di iriatibubuki. Hakia miarã, mĩ hawa isĩ betsa teneama pe hiwekũkaĩshanaii.

⁸ Haska ha huni txakabubũ haska betxipaimis hatũ kupiti mei ikaibu txanima ibubis mĩ hatu uĩshanaii.

⁹ Senhor Deus kushipa dasibi binuatũ hau mia keshebaunũ inũ hau mia mekekubainũ mĩ ma haibuwawẽ taea

¹⁰ hawa txakabu mia anu beama inũ hawa isĩ betsa tibi mĩ hiwe anu hikiama ishanikiki.

¹¹ Deusũ hawẽ nai tsumabu mia anu yunushanikiki, habuã hanira mĩ kai hau mia mekekubainũbunã.

¹² Mashash anu mĩ nia mĩ hawa huti iyamanũ hawẽ nai tsumabũ mia mekekubaĩshãkanikiki.

¹³ Inu betsa leão anu inũ, yuinaka mese atimapa anu inũ, dunu pianãbu anu mĩ nibiakauanai mia habũ meama ishãkanikiki.

¹⁴ “Hau huni txakabubũ meyamanũbũ ha ẽ tsuma pepatũ ea betxipaikĩ ea unaĩwẽ taeshũ eã ha mekekĩ ẽ pashawashanaii.

¹⁵ Hatũ ea kenaya ẽ kemashanaii. Ea kayabis ẽ habes ishanaii. Hawara bika teneai binumatã betxipaihairakĩ duawakĩ yurabu ẽ kẽwãmashanaii.

¹⁶ Hau hawẽ taea benimawakũkainũ hawẽ hiwea txaipa ẽ inãshanaii. Ẽ mekenã pepawẽ taea hawẽ piskui pashani habu benimashanikiki.”