Salmos 84 - Kaxinawá Bíblia (BR)

Deusũ tari hiwe merã hikia pehairakiaki, na nawati hãtxarã

Corá bakebũ kãta kenenibukiaki.

¹ Senhor Deus kushipahaira dasibi binuatuũ, mĩ tari hiwerã, habi hawẽrua benibĩ!

² Mĩ tari hiwe hemaĩtĩ kenekauana merã hanu hikia haska mia betxipaihairai ẽ hari hanus ikatsis ikaii. Benima txakayamai ẽ huĩti hirabiwẽ mĩ Deus hiwea kãtakĩ ẽ kẽwãmiski.

³ Senhor Deus kushipahaira dasibi binutuũ, mĩ ẽ shanẽ ibuhaira inũ mĩ ẽ Deuski. Ha txunu inũ basi isa mishtĩ habũ hanu hatũ batxi paketã tuxai bakeyakatsi ha txi tapu dapi hatũ na wamisbuki.

⁴ Tsuabura mĩ tari hiwe merã hiweirã, benimamisbuki, harishũ mia kẽwaĩ hawa heneamarã.

⁵ Tsuabũra mia anua merabe bi benimamisbuki. Habũ mĩ mati betxipai hanu mapekenũ ika bitxi tae sawea bukubaĩmisbuki.

⁶ Ha napaku hanu kashanibu anu habu buirã, habiaskari tenekĩ mebiakĩ txatxa pepa washãkanikiki. Hanua ha ui ikĩ hatu duawakĩ merabewakĩ matawashanikiki.

⁷ Hatũ kushipa Deus anua bi ewakubaĩkĩ ha maewã Sião Jerusalém anu uĩkĩ Deus kushipa binua uĩshãkanikiki.

⁸ Senhor Deus kushipahaira dasibi binuatuũ, Jacó Deusuũ, ẽ mibe hãtxakĩ mia yukai ea nĩkariwe!

⁹ Deusuũ, nukũ shanẽ ibuhaira wakĩ mĩ katuni, nukũ mekenikarã, mĩ pepawẽ duawakubaĩwẽ.

¹⁰ Mĩ hiwe hemaĩtĩ kenekauana merã shaba betsatiã ẽ hikia pehairaki. 1.000 shaba nũ hanira hamẽ nimis binuaki. Ẽ Deusũ hiwe hawẽ beputi kesha nishũ ẽ hatu bepũshũkubainairã, txakabu anu hiweabu ẽ hatube dasia binuaki.

¹¹ Senhor Deusũ hawẽ bĩ nuku peshashũkĩ hawẽ nuku mekekubaĩmiski. Tsuabura hawa txakabuuma hiweabu Senhor Deusũ hatu betxipaikĩ hatu duawakubaĩmiski, hawa hawẽ pepa yaushiamarã.

¹² Senhor Deus kushipa dasibi binu keyuatuũ, tsuara miki txiti ikĩ mia ikũwainã, benimakanikiki.