Salmos 73 - Kaxinawá Bíblia (BR)

Deusũ bakebũ kati bai pepakiaki, na nawati hãtxarã

Asafẽ kãta kenenikiaki.

¹ Israelbũ Deus pepahairaki, habu huĩti hawa txakabuuma hatu merabewamisrã.

² Hamẽ earã, unuri ana hatũ txakabuki ẽ kematanarã, ẽ benukeãshinaki, ẽ shinã atimapã ea atxia dashkibaini tĩ ikeanirã.

³ Habũ txakabuwaibu inũ habu keaĩbu hatũ hamapai ewawabainaibu hatu uĩ ea ẽ haskatiruma shinaĩ ẽ hatuwẽ kemuimaki.

⁴ Haburã, hatũ yura hawa isĩ teneama hatũ mawawẽ hawa nuiabumaki.

⁵ Yurabũ hamapai bika tenemisbu keska habũ meabumaki. Betsabu hatũ hiwea bika tenei hĩ hĩ ikaibũ habũ txakabuwaibũ haska shinaĩsbumaki.

⁶ Haskawẽ taea habu keinã, mane teuabu keskabuki. Hatu detei itimaskaiburã, hatũ tari sawea keskabuki.

⁷ Hatũ yura shuarãwaĩ hatũ beru dikabi txurumisbuki. Hatũ shinã txakabu ewa wakĩ mata wakubaĩkanikiki.

⁸ Kashetã usananaĩ inũ keinã, yura betsaki kashekenainã, hawẽ taea hau txakabu betsa betsapanũbũ txatxinamekĩ hatu berumisbuki.

⁹ Deuskiri hãtxa txakabuhairakĩ mai hirabi anu hatũ hãtxa haska pawabaũmisbuki.

¹⁰ Haskawẽ taeshũ yurabũ hatu kẽwãmisbuki, haska hiwemisbu pe keska tsuã hatũ txakabu betxiamarã.

¹¹ Habu yuka ikĩ: “Haskarã, Deusũnã, unã keyuimẽkaĩ? Ha Deus binu keyuatũ haskarã, tana keyukĩ unãshanimẽkaĩ?”

¹² Ha huni txakabubu hatu uĩkãwẽ! Habu unanuma hiwekaĩkĩ hatũ mabu tibi ewawabaĩkanikiki.

¹³ Ẽ huĩti hawa txakabumabia ea hawa merabewamaki. Txakabu betsa betsapa mekĩ ẽ huĩti inũ ẽ mekẽ detsismabiakẽ

¹⁴ haskakĩ bari tibi hawẽtsaĩs ea kusha kusha akabu ẽ yumẽkũkainaii. Penama tibi ea itxakawakĩ ea bika tenemakanikiki.

¹⁵ Eã haska shinaĩbu keska ẽ shinãshinarã, mĩ bakebu bai betsa hatu yusĩkĩ parãkĩ ẽ hatu benukeãshinaki.

¹⁶ Ha txakabubu haskabainaibu eã nĩkakĩ tapinũ ishũ ẽ shinanã, enarã, bikahaira ikimaki.

¹⁷ Atimas Deuski nukuti tari hiwe anu hikitã haskaibu shinaĩ harishũ ẽ tapĩshinaki, hatishũ besti niti ishanaiburã.

¹⁸ Deusuũ, habu hanu butiruburã, hatũ bai mayũ keska anushũ mĩ hatu shutua nishmabaĩshãkanikiki.

¹⁹ Hawa manama hawaira mĩ hatu yamawashanaii. Habu date betsa betsapaya dasibi keyushãkanikiki.

²⁰ Senhor Deusuũ, tsuara ushabia namayabi bestẽkirãmis keska mia benikirã ha parananãmisbu hatũ besu uĩkatsi ikama hatuki sinatahairakĩ mĩ hatu danãshanaii.

²¹ Uatiã sinatahairai haskai ẽ huĩti ẽ isĩhairaimaki.

²² Eã ẽ hawa unãmahairawẽ taea ẽ harakiri shinã pewatiruma ikimaki. Mĩ miã ea uianã, ẽ yuinaka keska ikimaki.

²³ Habiaskabiakẽ eã ẽ mia heneama ikũkainaii. Ẽ mekẽ yusiuri mĩ ea tsumamiski.

²⁴ Mĩ yusiã pepawẽ mĩ ea tapĩmakubaĩmiski. Txipu mĩ kushipawẽ nai anu ea benimawakĩ mĩ ea ishanaii.

²⁵ Nai anurã, ẽ tsua hayamẽ? Mia besti ẽ hayaki. Na mai ana betxipaiama mibe besti ẽ hiwekatsis ikaii.

²⁶ Ẽ hiwea dasibi yamashanikiki. Hakia mĩ ẽ Deusũnã, hawara mĩ ekiri yubakai tanani ikibi ika haya hatũ ẽ huĩti ea mestẽwã ẽ shinã txãkãkũkainaii.

²⁷ Tsuabũra mia henebaĩ mawai benushãkanikiki. Tsuabũra mawaira mia txibã pewaisbuma yamashãkanikiki.

²⁸ Hakia earã, Deus anu ẽ kemaii. Ẽ hakiri haskakainairã, harã, peki. Mĩ ẽ shanẽ ibu Senhor Deusuũ, mĩ ea mekekĩ arumiski. Mĩ dasibi ea haska washũmis mikiri ẽ txanikaũkatsis ikaii.