Salmos 69 - Kaxinawá Bíblia (BR)

Bika betsa betsapa Davĩ tenehairanikiaki, na nawati hãtxarã

Davĩ kãta kenenikiaki

¹ Ẽ Deusuũ, hene anu kai ẽ ma hasa kemaki. Ea mekekĩ nesheriwe.

² Iã seuku nua merã ẽ ma hikikainaii. Hawa kushipaki ẽ paitirumaki. Ma hene nuahaira merã ẽ pesea ha hene kushibirãkĩ ea bukĩ ea tashpi tashpi abainikiki.

³ Ea haska waiwẽ taea ẽ bis itxakayamai ẽ hui menui teris ika ẽ teshu shui ẽ isiaiĩ. Haska nishũ ẽ Deus manahairai ẽ beru txarish shũ uĩbiai ẽ ma babuaii.

⁴ Eska tibiwẽ taearã, ẽ hawa hatu txakabuwamabia hamẽ ea danãkĩ ẽ bu itxapa binumai eki sinatakanikiki. Tsuabura eki sinataibu ana itxapahaira hayaki. Ẽ hatu hawa wamahairabia ea yamawakatsis ikanikiki. Hatũ hamapai ẽ hatu yumetsuĩsmabia hamẽmẽs ea yunutxakakĩ: “Ea ana inãwẽ”, amisbuki.

⁵ Ẽ Deusuũ, haskatimabiakẽ ibubis ẽ patapaima mĩ unaiĩ. Ẽ haskaima hani ẽ txakabu mĩ uĩyamanũ ẽ hunetirumaki.

⁶ Senhor Deus kushipa binuatuũ, tsuabũra mia ikũwãmisburã, ẽ kanei txakabuimawẽ taea ekiri shinaĩ hau ewẽ dakeyamanũbũwẽ! Israelĩ mekenika Deusuũ, habũ mia txibãkatsis ikĩ mia benaiburã, hau ẽ txakabuima shinaĩ hau habu beshtekeyamanũbũwẽ!

⁷ Ea txite paepawabu besu shanabiri ikĩ dake paepakĩ miwẽ taeshũ ẽ tenekubainaii.

⁸ Earã, tsuã ea unãbuma nawa betsa keska wakĩ ẽ betsa kayabibũ ea danãkanikiki.

⁹ Hanu miki nukuti hiwe betxipaikĩ ẽ shinã txakayamaii. Ha inũ, tsuabura mikiri hãtxa txakabukĩ ha ikĩ mia txiteaibu eã ẽ mia teneshũkubainaii.

¹⁰ Hanu ẽ kashaitiã inũ hanu ẽ samakeaitiã habu eki kashemisbuki.

¹¹ Haya kashati tari sawea ẽ nikaunai dasibibũ ea uĩkĩ ea usã keyumisbuki.

¹² Nukũ maewã beputi kesha itxa mania tsaubauna ea txitei hãtxamisbuki. Ha inũ, habu paẽtã ekiri kashei kãtamisbuki.

¹³ Hakia Senhor Deusuũ, ẽ mia ea akaii. Ẽ Deusuũ, na habiatiã ea merabewawe! Mĩ nuihairawẽ ea kemawe! Mĩ ea putama ea merabewakubaĩmiswẽ taeshũ ea piskumariwe!

¹⁴ Iã seuku anu ẽ hikikaĩyamanũ ea heneyamawe! Habũ ea danaĩbu anua inũ hene nuahaira meranua ea mekekĩ ea nesheriwe!

¹⁵ Hene kushibirãkĩ hau ea tashpibaĩyamanũ ea nemashũwẽ! Hene shubi buspu tsaubirãkĩ hau uke merã ea hasakĩ ea bepubaĩyamanũ ea nemashũwẽ!

¹⁶ Senhor Deusuũ, miarã, mĩ pepa inũ mĩ dasibi nuikipaki. Mĩ duapahairawẽ ewẽ nuikĩ ea shinãkĩ menã ea kemariwe!

¹⁷ Na ẽ mĩ tsuma kayabirã, ea danãyamawe! Natiã ẽ ana pemahairaki. Menã hawaira ea kemariwe!

¹⁸ Eki sinataibu ea putamai ea dapi hushũ ea pashawariwe!

¹⁹ Haska ibubis ẽ mikiri txakabuima ẽ hawẽ dakeai inũ yurabũ ana ea betxipaiama ẽ bika teneairã, mĩ unãhairaii. Ha dikabi hatira eki sinataibu mĩ unãriaii.

²⁰ Ẽ txakabukiri tsuãra ea yuikĩ ea huĩti meteshmiski. Ea haska wabu benima hayama ẽ punu nukahairaki. Ewẽ nuikĩ tsuã ea daewakĩ benimawatirubu hamẽ ẽ benakubainaii.

²¹ Ea danãkĩ ẽ pitiki ea daunũ ishũ dau kapaĩmabuki. Ẽ ũpash manui ẽ tetsusinaya vinho txakabu bũkash ea amaimabuki.

²² Beyuskĩ hatũ piti pepa hatũ tapuki itxawakinã, haibunãbiakĩ hanubi birũ keska watã hawẽ taea hau bika tenenũbũwẽ.

²³ Hatu beshush wakĩ uĩmamatã hatũ kishi babu wakĩ hatu saki saki imakubaĩwẽ!

²⁴ Mĩ sinata pae hatukiri tashnimakĩ hatu uĩmawe. Mĩ hatuki sinatahairai kũyã ikai kaĩkaĩkĩ hau hatu atxi keyunũwẽ!

²⁵ Hanu hiwebianibu anu hau ana tsua hiweyamanũbũwẽ. Hanu bua hatũ tari hiwe merã hau ana tsua hiwetaskayamanũbũwẽ.

²⁶ Miã tsuara mĩ hatu bika tenema kai ha huni txakabũ ana hatu txibãbaĩkĩ bika hatu tenemamisbuki. Miã tsuara mĩ isĩ tenema kai ha isĩ betsa teneaiki habu haki kashemisbuki.

²⁷ Txakabuaibu habias hatũ txakabuwẽ habiaskari wakĩ hatu manakukubaĩwẽ, mĩ nuiwẽ hatũ txakabu hatu buashunamarã.

²⁸ Habu hiweabu hatũ kena mĩ hatu kenemis ha una meranua tere awe! Huni pepabu mĩ hatu tanakĩ kenemis anu ha huni txakabũ kena kenekĩ netãyamawe!

²⁹ Hakia earã, isĩ tenei ẽ bika teneaii. Ẽ Deusuũ, menã ea benitã ea piskumariwe.

³⁰ Kãtakĩ Deusũ kena kushipa ẽ kẽwaiĩ. Hawara pepa uĩkĩ Deus ẽ kẽwãkubainaii.

³¹ Ẽ Deus haska waya ewẽ benimawashanikiki, ẽ ina awa bene ewapa kasmai ina awa bene hatiuma hawẽ mashũ inũ hawẽ taeyabi ẽ menu keyushũtiru binumakinã.

³² Haska wakĩ Deus ẽ uĩmaiwẽ taeshũ ha bika teneaibu benimashãkanikiki. Tsuãra Deus benakubainaibu hatũ huĩti merã ana shinã txãkãshãkanikiki.

³³ Tsuara nuitapaibu Deusũ hatu nĩkamiski. Ha inũ, hawenabu itxakawakĩ bitxiti hiwe merã hatu bitxĩbiabu hawa hatu danaĩsmaki.

³⁴ Dasibi nai inũ, mai inũ, ianẽwã inũ, dasibi habu tibi anu dami wakĩ Deusũ hiwemani hiwebaunabũ habũ hau kẽwãkubainũbũwẽ.

^35-36 Deusũ ha maewã Sião ana meketã Judá mai pakea anu hatũ maewã tibi ana hatu benawamakĩ benimashanikiki. Deusũ tsumapã bakebũ ha maewã ibu watã ha merã hiwekĩ hatuna wanũbarikanikiki. Habũ Deusũ kena betxipaimisbu ha merã hiwepakeshãkanikiki.