Salmos 51 - Kaxinawá Bíblia (BR)

Deus nuikipa yukatikiaki, na nawati hãtxarã

Davĩ kãta kenenikiaki.

¹ Senhor Deusuũ, mĩ nui paewẽ ewẽ dabanã iwe. Mĩ ewẽ nuimiswẽ taeshũ ẽ txakabu ea tere ashũwẽ.

² Ibubis ẽ txakabumis ea txukashũwẽ! Eã ẽ kanemis ea tere ashũwẽ!

³ Mĩ yusiã kanei ẽ patapamis txanima ibubis ẽ ma unaiĩ. Haskatã ẽ shinã uke merã ẽ txakabu ibubis ẽ tere atirumaki.

⁴ Hawara txakabu mĩ nemani ha meai mĩ kupiti wani eã ha mei mikiri besti ẽ txakabumiski. Haskawẽ taea kupikĩ mĩ unãti wamisrã, mĩ kaneismahairaki. Mĩ kupiti tsuã binutirumahairaki.

⁵ Txanima ẽ kaĩ bena ẽ txakabu iki taeniki. Ẽ txakaburã, ẽ kaĩriama ẽ ibu anua ẽ hayaniki.

⁶ Txanima huĩti pepa kayatapia hayabu mĩ hatu betxipaiaii. Mĩ unanepa uke meranua mĩ ea inãmiski, shabakabi ea tapĩmakinã.

⁷ Ẽ txakabu mĩ ea txuka ẽ ana txakabu hayama ishanaii. Ẽ txakabu ea txukakĩ mĩ ea shũpĩ wanã, ha matsi tãki hushupamis ẽ binushanaii, hawa ana txakabu hayamairã.

⁸ Ẽ shau mĩ ea teke teke abiaima ana benima bena ea inãkĩ ea shinã txãkãwãkubaĩwẽ.

⁹ Ẽ txakabu atimapa tibi mia bebũ tashnia mĩ uiainã, ea tere ashũtã ana haska shinãkĩ uĩyamawe.

¹⁰ Ẽ Deusuũ, ana ẽ huĩti bena shũpĩ ea wakĩ ẽ yushĩ bena wakĩ ana ea txĩtũtimawawe.

¹¹ Ẽ mibe nia ea pashkayamawe. Mĩ Yushĩ Pepa ea meranua ea mebĩyamawe.

¹² Ẽ benubiaya mĩ ea merabewakĩ piskumani keska ana shinã bena inãkĩ ea shinã txãkãwãwẽ. Mĩ yushĩ itxakanikamawẽ ea tsumawe, ẽ haskariakũkainunã.

¹³ Mĩ ea haska waya ha mĩ ea yusiaĩwẽ mia nĩkaisbuma huni txakabubu hau mia anu benũbũ mĩ bai pepakiri ẽ hatu yusĩshanaii.

¹⁴ Ẽ Deusuũ, ẽ Deusuũ, ẽ txakabu mĩ ea piskumamiski. Huni betsa ẽ hune tenaĩmarã, haska keska ẽ ana ayamanũ ea nemawe. Mĩ haska nemakubaĩkĩ hawa kaneismawẽ taea mĩ pepakiri kãtai ẽ txanikũkaĩshanaii.

¹⁵ Senhor Deusuũ, ẽ hui ea bepẽwẽ. Mĩ ea haska waya kãtakĩ ẽ mia kẽwãkubaĩshanaii.

¹⁶ Ẽ inãkuĩ tibi inũ inabu tibi ẽ mia menu keyushũkĩ ẽ mia hawẽ benimawakatsi ikĩ ẽ mia inãbia mĩ betxipaiamabiakẽ ẽ mia haska washũkatsi ikamaki.

¹⁷ Ha inãkuĩti tibi mĩ betxipaiairã, ẽ yushĩ mĩ ea meshteima ẽ bika tenebiai has shinãma ẽ huĩti betsa watã txakabu mĩ ma ea pewaima ea uĩkĩ mĩ ea betxipaiaii.

¹⁸ Mĩ shinã pepawẽ Sião merabewakĩ pewawe, ana hawẽ kenekauana benibaũkĩ hau Jerusalém ana kene bena wanũbunã.

¹⁹ Hanushũ inãkuĩ tibi inũ inabu menuti tibi haska mĩ betxipaiai mia ashuaĩbu hawẽ benimawakĩ mĩ bikubaĩshanaii. Mia kẽwãti txi tapu anushũ ina awa bakebu mia menushũshãkanikiki, mia benimawakinã.