Salmos 42 - Kaxinawá Bíblia (BR)

Hawẽ mekenika kayabi Deus benakubainikiaki, na nawati hãtxarã

Corá bakẽ kãta kenenikiaki

¹ Ni txashũ ũpash manui hene benai kamis keskai Senhor Deusuũ, haska keskariakĩ ẽ mia benakubainaii.

² Deusũ ea hiwea inãmis putakatsi ikama ũpash manuai keskai ẽ habe nikũkainaii. Hatiã ana txĩtũkirã Deus bebũ ẽ nishanai?

³ Bariri inũ meshu merã kashai ẽ beũ hene habamisrã, harã, ẽ pitiki. Ẽ haskaitianã, bari tibi hawẽtsaĩs habũ ea bika wakĩ yukamisbuki: “Hanimẽ, mĩ mekenika Deusrã?” akinã.

⁴ Ea haska tibi yuikĩ ea shinãmabu eã dasibi ẽ hawẽ bika teneai ẽ huĩti ẽ mia bepẽshũmiski. Mĩ tari hiwe anu enabu ẽ hatu iyuaya habũ ekiri shinãkĩ benimakĩ hatũ huĩti hirabiwẽ haska mia kẽwãkubaini nũ haskanirã, ẽ shinaiĩ. Mikiri besi pepa ẽ hakimamaki!

⁵ Deus ikũwaĩ haki txiti itã hawa heneama Senhor Deus ẽ mekenã kẽwãkĩ ẽ akubainaii. Ana punu nukai ẽ hawa beshteketirumaki. Haskawẽ taea ẽ hamapai tibiwẽ ẽ ana nuiamaki. Habia bestihaira ẽ Deus inũ ẽ mekenikaki!

⁶ Ikis ẽ punu nuka shinã txãkãmahairaki. Haska Hene Jordão anu ẽ mibe nikũkaini inũ, Mati Hermom inũ Mati Mizar anua ẽ haskakũkaini hakimama ẽ mikiri shinãhairaii.

⁷ Bika betsa betsapa mĩ ea tenemaii. Manaũria sai iki hawẽ hui mawa tsakatã tashniai keska mĩ hãtxa eki nukuai nĩkai ẽ nuitapakũkainaii. Henewã shubi kũyã ikai keska mekĩ ẽ teneaii. Hene tukash iki buspu tsaubiranai keska bika betsa betsapa ẽ tenekubainaii.

⁸ Haska Deus ewẽ nuikĩ ea betxipaiai bariri ea uĩmaya meshu merã kãtashũkĩ heneama ẽ hiwea mekenika ẽ Deus ẽ yukakubainaii.

⁹ Deusũ ea mekekĩ eki sinataibu ea nemashũmis yuikĩ: “Haskakĩ ana ea shinãma mĩ ea henebainamẽ? Eki sinataibũ ea bika tenemaibũ haskai punu nuka ẽ nikũkainai? Mĩ haskai ekiri hakimamẽ, ana ea shinãmarã?

¹⁰ Habu eki sinataibũ ea itxakahairawabu tenei ẽ shau dikabis ea isĩ tenemakĩ hora tibi habu eki sinataibũ hawẽtsaĩs ea bikawakĩ yukamisbuki: ‘Hanimẽ, mĩ mekenika Deusrã?’ ” akinã.

¹¹ Deus ikũwaĩ haki txiti itã hawa heneama Senhor Deus ẽ mekenã ẽ kẽwãkubainaii. Ana punu nukatã ẽ hawa beshteketirumaki. Haskai ẽ hamapai tibiwẽ ẽ ana nuiamaki. Ha bestihaira ẽ Deus inũ ẽ mekenikaki!