Salmos 37 - Kaxinawá Bíblia (BR)

Pepabu Senhor Deuski txiti ikabukiaki, na nawati hãtxarã

Davĩ kãta kenenikiaki

^1-2 Basi yumei pebiatã hawaira txushimiski. Ni mashu ewai pebiatã hawaira shanariamiski. Haska keskariai huni txakabubu haskashãkanikiki. Hatuki sinatayamakubaĩkãwẽ. Ha dikabi hawara txakabuwakĩ kaneaibu hatũ hamapaiwẽ kemui nuiyamakubaĩkãwẽ.

³ Na mai anu mã hiwearã, Senhor Deus ikũwaĩ haki txiti ikĩ pepa besti aki txĩtuãma txibãkubaĩwẽ.

⁴ Senhor Deus mĩ betxipaiairã, nuikipakĩ ha besti shinãkubaĩwẽ. Mĩ haska waiwẽ taeshũ haska uke merã pe shinãkĩ mĩ bikatsis ikai unãkĩ hawa yaushiama Senhor Deusũ mia inãshanikiki.

⁵ Dasibi mĩ hiwea Senhor Deus mekematã ha besti mĩ ikũhairawai haki txiti ikẽ mia duawakĩ mia merabewai hushanikiki.

⁶ Mĩ kaneama inũ mĩ pe hiwekũkainairã, bari mananãbi bari peshea txashamis keska mia washanikiki.

⁷ Hawara Senhor Deus anua mĩ manakairã, hĩ hĩ ikĩ hawa yuiama mĩ shinanẽ besti Deuski txanitã manakubaĩwẽ. Hatũ mia merabewashanikiki. Hakia huni betsa txakabu atimapa akatsi yubakamisburã, haskawẽ hiwekaĩkĩ tsuabura maematirubumaki. Haskawẽ taea hatuki sinatayamakũkaĩwẽ.

⁸ Mĩ sinatamis inũ mĩ pubẽmisrã, henekĩ putakubaĩwẽ. Mĩ sinatawenã, dasibi mĩ hamapai tibi mĩ ana pikukũkainaii.

⁹ Tsuabura txakabuburã, matũ mai pakea anua Senhor Deusũ hatu nitxĩshanikiki. Hakia tsuabura Senhor Deuski txiti imisburã, ha mai hatu yubani habũ ibuwashanikiki.

¹⁰ Ana hatishuĩra huni txakabubu hayama ishãkanikiki. Haska habu txakabumisbu hayamẽkaĩ, ishũ hatu benabirãbirani ana hawa hatuki nukukĩ betxiama ishãkanikiki.

¹¹ Hamẽ habu huni keĩsbumarã, habũ mai hirabi ibuwatã hawa bika ana teneama unanuma benimapakeshãkanikiki.

¹² Huni txakabũ huni pepa itxakawanũ ika haki sinatahairai sheta yẽsh yẽsh amiski, danã paepa wakĩ hatu txakabuwakatsis ikinã.

¹³ Huni txakabu hawẽ kupiti ma hanu ikai unãkĩ Senhor Deusũ usãmiski.

¹⁴ Tsuabura txakabubũ hatũ matxatu txaipa kenu bitã kasmai hatũ pia bitã huni keĩsbuma inũ nuitapaibu habũ shinã pewaibu hatu tsakakĩ tenãkatsis imisbuki.

¹⁵ Hakia ha hunibu txakabũ haska shinaĩburã, ibubis hatũ matxatu kenuhairawẽ hatũ huĩti txatxitirubuki. Ha inũ, hatũ pia teke teke iki yamatiruki.

¹⁶ Ha huni pepa mabu eskarabesya hiwearã, haska peki, haska huni mabuwãyãtũ shinaĩ txakabumisbu keskamarã. Hanua huni pepa mabu eskarabes haya hawa hawẽ mabu shinãma ha mabuwãyã binuaki.

¹⁷ Habu txakabuaibu Senhor Deusũ hatu keyukĩ nishmawashanikiki. Hakia habũ Senhor Deus nĩkakubaĩmisbu hatu putama mekekubaĩshanikiki.

¹⁸ Habũ kaneama pepai hiwekubaĩmisbu Deusũ hatu pe mekemiski. Haska dayakĩ pepa akubaĩmisbu hatu heneshũbaina bitã hawẽ hiwepakenũbarikanikiki.

¹⁹ Bari betsatiã betsabũ bika tenei buniaibũ tsuabũra Deus duawamisrã, hawa dakeama inũ hatũ piti hayakubaĩshãkanikiki.

²⁰ Huni txakabubu mawairã, basi txushi ketikainai keskashãkanikiki. Tsuãra Deus danaĩ haki sinatamisrã, txi kuĩ hushumayabaini yamamis keskashãkanikiki.

²¹ Huni txakabũ tsuara ea akĩ hawẽ hawara biãyutanã, hawa ana inãkĩ pakanũ, iwanã, shinaĩsmaki. Hakia huni pepatunã, nuikĩ hawẽ hamapai yaushiama ha haya hatu inãmiski.

²² Tsuabura Deusũ pepawakĩ duawamisrã, habũ mai hirabi ibu washãkanikiki. Hakia habu Senhor Deusũ yupuarã, habu yamai keyushãkanikiki.

²³ Senhor Deusũnã, haska betxipaiai keska hau ashunũbũ hawẽ shinã pepa hunibu txibãmamiski.

²⁴ Pepabiakĩ kaneaibu Deusũ hatu heneama ana hatu merabewakĩ hawẽ txakabu buatã hatu mekekubaĩmiski.

²⁵ Ẽ berunãtũ uini inũ natiã mestebukĩ ẽ uĩkubainairã, huni pepabu Senhor Deusũ henebainai ẽ uĩsmaki. Hanua hatũ bakeburi hawa ea iki daketapai mapuaibu ẽ hatu uĩsmahairaki.

²⁶ Tsuara hatuwẽ dabanã ikĩ hawẽ hawara yaushiama shaba tibi hatu inãyumisrã, haskawẽ taeshũ hawẽ bakebuwẽ Deusũ duawamiski.

²⁷ Txakabu betsa betsapa henetã pepa besti akubaĩwẽ. Tsuara haska hiweairã, hawẽ hiwea pepa ma hayaki, hanu ipashanairã.

²⁸ Senhor Deusũnã, hamapai pepabu betxipaimiski. Habu haki txiti ika txĩtuãbumarã, hawa hatu heneismaki. Hamẽ tsuabura txakabuburã, hatu yamawakẽ hatũ bababuri hayama washãkanikiki.

²⁹ Ha inũ, huni pepaburã, mai hirabi ibuwatã hanu hiwepakeshãkanikiki, niti ikamarã.

³⁰ Ha inũ, huni pepabu hãtxairã, hãtxa unanepawẽ imisbuki. Ha dikabi yunuti hãtxa kushipawẽ parananãma pe besti hãtxamiski.

³¹ Ha huni hãtxai haskamisburã, hawẽ meketi Deusũ yusiã hawẽ huĩti merã haya mapuabuwẽ taea kanei hawa txakabuisbumaki.

³² Huni pepa hawara haya huni txakabũ uĩkĩ haki sinatakĩ detekatsis ikĩ shinãbiaya

³³ Senhor Deusũ hawenabu hatu pe mekeawẽ taea haska huni txakabubũ hatukiri shinã txakabiaibũ hatu nemashũmiski. Ha dikabi tsuabũra hatu metukĩ unãti wabiaibũ hawa txakabu habukiri hayama ishãkanikiki.

³⁴ Tsuãra Deusũ yunuti nĩkakĩ mã ashuĩ haki txiti ikarã, hatũ matu duawakĩ na mai matu ibu wamakẽ hawa keyuama mã hanu hiwepakeshanaii. Hanua ha txakabui hiwekubainaibu Deusũ hatu kupikĩ yamawai ibubis mã uĩshanaii.

³⁵ Huni txakabu ẽ uĩmisrã, hamapai unã keyuaikiri kẽkĩ hatu benimawabiamis hi yumei datã hawẽrua besti keskabuki.

³⁶ Uatiã ni pea ẽ uĩtanima habianuri ana kawãkĩ ẽ uiã ana ha hi haki nukukĩ ẽ betxiamaki.

³⁷ Huni hakiri txakabu yuikĩ metuisbumarã, haskakiri uĩkĩ shinãkãwẽ. Ha huni peparã, unanuma hiwenũbarikiki.

³⁸ Hakia huni sinatapaburã, hatũ hiwea yamai keyushãkanikiki. Ha huni txakaburã, hatũ hiwea ikibi ikarã, keyui yamashãkanikiki.

³⁹ Tsuara huni pepabu habũ merabe huirã, Senhor Deus anua humiski. Senhor Deusũnã, hatu arukĩ kebeãki, hawara bika teneaibu mekekinã.

⁴⁰ Tsuabura pepabũ hanira irukatsi benaiburã, Senhor Deusũ hatu merabewakĩ pashawamiski, txakabubube husia hiwebiakẽ hatu kaĩmabaĩkinã.