Salmos 34 - Kaxinawá Bíblia (BR)

Nukũ Senhor Deus duapa hakiri besti kẽwãtikiaki, na nawati hãtxarã

Davikiri kãta kenenikiaki

¹ Bari betsa tukama Senhor Deus kẽwãkĩ duawakinã, ẽ heneama ikũkainaii.

² Ẽ shanẽ ibu Senhor Deus shinaĩ ẽ keaiĩ. Huni keĩsbumaã, ebe benimakĩ ea nĩkakãwẽ.

³ Senhor Deusũ kena ewapawai hui kushipawẽ ebetã kẽwãkãwẽ.

⁴ Datekĩ Senhor Deus ẽ benakĩ yuka ea nĩkakĩ kemaya ha hawẽ ẽ dateai ea henemakĩ putamaimaki.

⁵ Tsuabũra Senhor Deus shinaĩbu benima paẽ hatu atxia hawawẽ dakeabuma benimashãkanikiki.

⁶ Nuitapakĩ ẽ Senhor Deus kena ea nĩkakĩ kemakĩ ẽ bika teneai dasibi ea putamaniki.

⁷ Tsuabũra Senhor Deuskiri pe hãtxakĩ kẽwãkubainaiburã, hawẽ nai tsumã hatu keshe pewashũ hatu piskumamiski.

⁸ Ibubis Senhor Deuski txiti ikĩ unãkãwẽ. Senhor Deusrã, merabenã pepahairaki. Tsuabũra haska wai haki txiti ika ha huni benimakũkaĩmiski.

⁹ Senhor Deuski txiti ikĩ duawai haki mesei ha keskai pepakubaĩkãwẽ. Tsuabura haki mesekĩ duawakĩ kẽwãkubainaiburã, hawara pepa akaibu hatu danãma nĩkakĩ inãkubaĩmiski.

¹⁰ Tsuara mabuwãyã hiwemisburã, benui keyuaya nuitapai ana hawa hayama buni teneshãkanikiki. Hamẽ tsuabũra Senhor Deus benakubaĩmisburã, hawa hawẽ hamapai tibi pepa benuama ikũkaĩshanikiki.

¹¹ Senhor Deus duawatikiri matu yusinũ, ẽ bakebuũ, nenu beshũ ea nĩkai bekãwẽ.

¹² Mã bari itxapa hiwekatsis ikai? Mã benimai hiwekatsis ikai?

¹³ Mã haskai hiwekatsis ikairã, matũ hãtxa txakabu nemakubaĩkãwẽ, hãtxakĩ txanitxakakĩ yuitaskamarã.

¹⁴ Txakabu betsa betsapa danãkĩ pe besti akubaĩkãwẽ. Haratura hawẽ unanuma kati bai betxitã ha txibãkubaĩkãwẽ.

¹⁵ Senhor Deusũnã, tsuabũra hawẽ yusiã txibãkĩ duawamisburã, hatu mekekubaĩmiski. Hanushũ habũ ea akaibu shabakabi hatu nĩkariamiski.

¹⁶ Huni txakabuburã, Senhor Deus hatuki sinatahairakĩ mai anushũ hamapai akubaĩkĩ ha shinaĩbu tere akĩ ana hakiri shinãtima washanikiki.

¹⁷ Hakia tsuabũra Senhor Deus duawakubaĩmisbũ hawarawẽ nuikĩ yukaiburã, hatu nĩkakĩ bika betsa betsapa teneaibu hatu nemashũkubaĩmiski.

¹⁸ Senhor Deusrã, nuku mekei nuku dapi niaki. Tsuabura bika betsa betsapa tenei huĩti nishmai nui hawawẽ haskatimabiakẽ Senhor Deusũ hatu mekekĩ pashawashanikiki.

¹⁹ Tsuabura huni pepabu merabenaĩ yurabũ hatu unãma betsa betsapawẽ hatu itxakawamisbuki. Hakia Senhor Deusũ haska teneaibu hatu duawakĩ haska tibi hatu putamakĩ binumamiski.

²⁰ Huni pepa Senhor Deusũ hawẽ shau tibi mekemiski. Haskawẽ taeshũ hawẽ shau betsa tekeama ishãkanikiki.

²¹ Habu huni txakabubu Senhor Deusũ ibubis hatũ txakabuwẽ tenãshanikiki. Hamẽ tsuabũra huni duapabu danãkubaĩmisburã, Deusũ hatu unãmakĩ isĩ tenemakĩ kupishanikiki.

²² Hakia Senhor Deusũnã, hawẽ dayarubu haki txiti imisburã, hatũ hiwea hatu itxakawama hatu mekekubaĩshanikiki.