Salmos 33 - Kaxinawá Bíblia (BR)

Nukũ Senhor Deus pepa ha besti kẽwãtikiaki, na nawati hãtxarã

¹ Mã Deusũ tsuma pepabuũ, Senhor Deus benimawai kãtashũkãwẽ. Matũ huiwẽ Senhor Deuskiri kãtakĩ mã hawẽruawaya Senhor Deusũ betxipaimiski.

² Senhor Deusũ mia ashũmis shinãkĩ kẽhairawakĩ harpa mawashuni kãtakãwẽ. Saltério mimawati 10 dispiya mawai kãtashũkãwẽ.

³ Nawati benawẽ kãtai mimawati mawa pehaira wai benima txakayamai kãtakãwẽ.

⁴ Txanima Senhor Deusũ hãtxa ikũ kayabiki. Haska txanitxakaisma hawẽ dami tibiwẽ nuku uĩmakubainikiki.

⁵ Hunibũ kaneisma inũ hatũ shinã pepabu haskawẽ hiweaburã, Senhor Deusũ hatu betxipaimiski. Senhor Deusũ nuirã, dasibi mai hirabi nati ikaki.

⁶ Senhor Deusũ hawẽ hãtxa bestiwẽ yunukĩ nai damiwaniki. Habias hawẽ hãtxawẽri shũ akĩ bari inũ ushe inũ bishi damiwaniki.

⁷ Hene itxawakĩ ianẽwã itamama nuahairawaniki, hanus itxawakinã.

⁸ Mai hirabi anu hiwebaunabũ Senhor Deus hau duawanũbũwẽ. Yura shukuabu tibi hiwebaunabũ Senhor Deus kẽwãkĩ hau duawanũbũwẽ.

⁹ Hawẽ hãtxawẽ Deusũ yunua dasibi dami kaĩ keyuniki. Damiwakĩ hanakĩ yunuakeakea nĩkatã hanu ikibi iki mestenibuki.

¹⁰ Nawã Deus ikũwãbuma dayakĩ haska betxipaikĩ hatũ mae anu daya ewapa tashnimatã hawẽ hiwebainaibũ Senhor Deusũ hatu betxipaiama nemakĩ beshtekubaĩmiski.

¹¹ Hakia Deusũ hawẽ daya ewapa hawẽ hiwekaĩti hatu tashnimashunirã, hawa beshtekeama mestẽ ikibi ika ipashanikiki.

¹² Senhor Deusũ hawena wakatsi hatu katunirã, ha hiweaburã, habe hiwei benimakubaĩkanikiki.

¹³ Nai anushũ Deusũ huni dasibibu uĩbaunikiki.

¹⁴ Hanu Deus hiwea anushũ mai anu dasibi hiweabu tanakubainikiki.

¹⁵ Hatu hiwea inãkĩ hatũ huĩti tibi damiwanishũ haska dasibi akubaĩmisbu hawa heneama hatu uĩkubaunikiki.

¹⁶ Mai anu shanẽ ibuhaira hawẽ detenamenikabu mirimahaira hayabia habuwẽ hiwei pashatirumaki. Detenamenikabu hatũ kushipahaira hayabia hawẽ hiwei pashatirubumariki.

¹⁷ Cavalowẽ kushibiabaĩmisburã, hawẽ hiwei tsua pashatirubumahairaki. Cavalo kushipahairabia haki txiti ibiamisbu hawẽ hiwei tsua pashatirumaki.

¹⁸ Hakia tsuabũra haki mesei inũ hakiri pe hãtxakĩ nũ yuimis Deus nukuwẽ nuimis nũ ikũwaĩbu nuku putama nuku mekekubaĩmiski,

¹⁹ hatũ hiwea benui hau mawayamanũbũ inũ bunitiãbiakẽ hau debuama hiweyukubainũbunã.

²⁰ Nukubũ nũ Senhor Deus ikũwaĩ nũ haki txiti ikabuki. Hatũ nuku merabewakubaĩmiski, nuku mekesukinã.

²¹ Senhor Deusũ kena meribi kushipa ikũhairawai nũ haki txiti ikaya nukũ huĩti benimahairamiski.

²² Senhor Deusuũ, mĩ nuiwenã, mĩ nuku hawa putaismaki. Haska mĩ nuikipa mia anua huai besti nũ manakubainaii.