Salmos 27 - Kaxinawá Bíblia (BR)

Senhor Deusrã, ẽ shaba inũ ẽ mekenikaki, na nawati hãtxarã

Davĩ kãta kenenikiaki

¹ Senhor Deus ẽ shaba keska hatũ ea mekemiswẽ taea ana hamapai betsaki ẽ dateamaki. Ẽ hiwea Deusũ ea keshekubaĩmiswẽ taea ana tsuki ẽ dateamaki.

² Huni txakabubu eki sinatabirã ea atxishũ yamawanũ ika ibiabiranaibu habu huti itã tĩ iki di imisbuki.

³ Detenamenikabu itxatã ea keshebiabaunabũ huĩti bene bene iki ẽ hawa hatuwẽ dateamaki. Ea detenũ itã ekiri detenamenikabu benibiabiranaibũ ẽ shanẽ ibuki txiti ika babuama ẽ unanuma hiwekũkainaii.

⁴ Senhor Deusuũ, eska bestikiri ẽ mia yukaii, haska ẽ betxipaiairã. Senhor Deusuũ, bari tibi ẽ hiweawẽ mĩ hiwe merãshũ mĩ kushipa hawẽrua shinãkĩ ẽ mia kẽwãkatsis ikaii.

⁵ Shaba betsatiã bika sharabu ẽ teneaya mĩ hiwe merã ea hunekĩ arutã mĩ ea mekekubaĩshanaii. Hanua tsuã ea metirumanu mistutã mĩ ea pashawatiruki.

⁶ Eki sinataibu mĩ kushipawẽ ma mĩ ea hatu binuma hanua tashnikauã has shinãma mĩ hiwe merãshũ inãkuĩ mia kua keyushũkĩ mia kẽwaĩ benimahairai kãtakĩ ẽ mia nawashũshanaii.

⁷ Senhor Deusuũ, ẽ mia kenai ea nĩkawe. Ewẽ dabanã ikĩ ea kemawe.

⁸ Ẽ huĩtinĩ mikiri ea yuikĩ: “Senhor Deus benai haki nukuwe”, ea wa haskawẽ taeshũ miki nukunũ, iwanã, mĩ ẽ Deus ẽ mia benaii.

⁹ Miarã, habia mia besti mĩ ẽ Deus mekenãwẽ taeshũ ea heneyamawe. Eki dakei hunei iruyamawe. Ha inũ, eki sinatakĩ ea danãyamawe, miã besti mĩ ea merabewamiswẽ taeshunã.

¹⁰ Ẽ ibubũ ea putabiabainabũ Senhor Deusuũ, ea hawa heneama mĩ ea mekekubaĩshanaii.

^11-12 Senhor Deusuũ, natiã eki sinataibu hamẽ ekiri txanitxakai itimaskabirã ea atxikatsis ikaibu haska shinaĩbu keska ea hatu yunuyamawe. Hakia mĩ bai pepa ea unãmakĩ hawẽ ea iyuwe, ẽ hawẽ kanunã.

¹³ Ea ẽ hiwekũkaĩmiswẽ taeshũ haska Senhor Deusũ hawenabu hawẽ duapa hatu uĩmakubaĩmis ẽ haki nukushanai ẽ unaiĩ.

¹⁴ Senhor Deuski mestẽtã hawẽ kushipai punu nukama hawẽ shinã betxipaikĩ hawa txĩtuãma haki mestẽkubaĩkãwẽ.