Salmos 24 - Kaxinawá Bíblia (BR)

Shanẽ ibu kayabi kushipahaira hayakiaki, na nawati hãtxarã

Davĩ kãta kenenikiaki

^1-2 Senhor Deusũnã, haki hanakatsi mestẽwãkĩ teawakinã, hene itxawakĩ ianẽwãri pewashũ dasibi mai hirabi haki hananiki, hau haska ikũkainũ yunukinã. Haskawẽ taea Senhor Deusrã, mai hirabi hawenaski. dasibi haki haya inũ dasibi hawẽ hiwebaunaburã.

³ Senhor Deusũ mati anurã, tsua mapeketirumẽ? Ha mati anu hawẽ tari hiwe meribi anu Deuski nukuti tsaua anurã, tsua hari ha bebũ nitirumẽ?

⁴ Habu hikirã, habũ txakabu meisma inũ hatũ shinã pepa besti haya hikitirubuki. Ha inũ, habũ dami yushibubu duawakĩ kẽwaĩsbuma inũ hamapai tibikiri yubakai hamẽ txanitxakaisbuma hikitirubuki.

⁵ Habu ma hikiaburã, Senhor Deus hatũ mekenãtũ hatu duawakĩ pewẽ hatu manakushanikiki.

⁶ Txanima kayabi habũ Senhor Deus benaiburã, hau haskakubainũbũwẽ, habũ Jacó Deuski nukukatsis ikĩ benaiburã.

⁷ Mae nai anu hikiti shui beputi dabe bepẽkãwẽ. Bepẽtã ana bepuyamakãwẽ, hau nukũ Shanẽ Ibu kushipahaira hanu hikiyushanunã.

⁸ Ha Shanẽ Ibu kushipahairarã, tsuamẽ? Nukũ Shanẽ Ibu mĩ atiruma detenamenika Senhor Deuski. Senhor Deus hawa dateama detenamenika, ha nukũ Shanẽ Ibu kushipahairaki.

⁹ Mae nai anu hikiti shui beputi bepẽkãwẽ. Bepẽtã ana bepuyamakãwẽ, hau nukũ Shanẽ Ibu kushipahaira hanu hikiyushanunã.

¹⁰ Ha Shanẽ Ibu kushipahairarã, tsuamẽ? Senhor Deus kushipahairatũ dasibi binu keyua, ha nukũ Shanẽ Ibu kushipa txashakapahairaki.