Salmos 22 - Kaxinawá Bíblia (BR)

Bika tenebiakĩ Senhor Deus kẽwãtikiaki, na nawati hãtxarã

Davĩ kãta kenenikiaki

¹ Ẽ Deusuũ, ẽ Deusuũ, haskakĩ mĩ ea heneamẽ? Ẽ bika teneaya eki kematã haskai hushũ mĩ ea pashawamamẽ? Bika tenei ẽ kashaya haskakĩ daewakĩ mĩ ea merabewamamẽ?

² Ẽ Deusuũ, bariri inũ meshu merã ẽ mia kenabia mĩ ea nĩkatã ashuãmawẽ taea ẽ hani huĩrukũti pe hayamaki.

³ Hakia miarã, meribi hawa txakabu mĩ hayamaki. Mĩ hatu shanẽ ibushuna Israelĩ enabũ mia kẽwãkubaĩkanikiki.

⁴ Nukũ shenipabu miki txiti ikĩ mia ikũwaĩbu miã mĩ hatu tashnimaniki.

⁵ Habiabũri mĩ hatu merabewanũ mia ea akaibu mĩ hatu tashnimaniki. Mia nĩkakĩ txibaĩbu hatuki dakeama mĩ hatu merabewaniki.

⁶ Hakia earã, ẽ huni hawamahaira ẽ shena keska bestiki. Yurabũ ea usaĩburã, tsuãra ea uĩ eki kashekanikiki.

⁷ Habũ ea uĩtã ea usaĩ shetxua eki buri buri imisbuki,

⁸ ekiri yuikĩ: “Ha huninã, Senhor Deus ikũwãkĩ txibãmiski. Hau ha hushũ merabewayunũwẽ, ha betxipaihairaiwẽ taeshunã”, imisbuki.

⁹ Txanima ẽ ewã bake nãti anua ea kaĩmatã ẽ ewã txutxu amakĩ hanu mĩ ea huĩrukũmakubainiki.

¹⁰ Ẽ ibu anua ẽ kaĩriamatiã ea mekekĩ mĩ taewaniki. Ẽ ibuã pustu meranua mĩ ẽ Deus ini heneama mia besti mĩ ipakeaii.

¹¹ Natiã hawãra ea bika tenemaitũ detekĩ ea keshekẽ tsua betsã ea merabewatiru ẽ hayamaki. Haskawẽ taea txai ea dapashkabaĩyamawe.

¹² Ina awa bene pubẽ keskakĩ eki sinataibũ ea kenebaunabuki, mae Basã anua ina awa bene pubẽ keshenameabu keskarã.

¹³ Inu betsa leão pubẽ tekerẽ tekerẽ iki pĩtsi keskai hashpabirã eki niri ikaibu keskabuki, ea atxinũ ika eki sinataiburã.

¹⁴ Bika tenei kushipa hayama ẽ ũpash hukua keskaki. Pashati hayama ẽ shau tseke tsekepa keska ẽ hani katirumaki. Hawa benimawati hayama ẽ huĩti nishma ẽ bĩ menui tuis tuis ikai keskaki.

¹⁵ Ẽ hiwea babui ẽ kushipa beshmasi ẽ hashpa mai kẽti tuash keska tsusiãki. Ũpash manui ẽ hana tashkai ẽ hashakaki tsamiaki. Ẽ ma mawa ea akawakĩ mai kuru anu mĩ ea putabainaki.

¹⁶ Huni txakabubũ ma ea keshe keyuabuki, kamã eki shuku dakabiranai keskakinã. Habũ ẽ mekẽ inũ ẽ tae ma ea shui keshtuabuki.

¹⁷ Ẽ shau tibi uĩkĩ ẽ tanatiruki. Eki sinataibũ beri ikama ea uĩ heneisbumaki.

¹⁸ Ẽ tari habũ besti pashkakĩ hawẽ hamapai unãti shau meshte númeroya dabewẽ maemamanãtã bikanikiki.

¹⁹ Hakia miarã, Senhor Deusuũ, mĩ ẽ kushipaki. Ea henebainama hawairakirã ea merabewai huriwe.

²⁰ Matxatu txaipa kenu dabewẽ ẽ mawayamanũ hatu nemawe. Ha kamãbũ hau ea tenãyamanũbũ hatu ea nemashũriawe.

²¹ Ha inũ, ha inu betsa leão hashpa keskabũ hau ea piyamanũbũ ea nemashũkĩ ea pashawawe. Awa bene pubẽ mashũyã keskabu ea hatu nemashũriawe.

²² Mĩ kushipakiri ẽ betsabu ẽ hatu hãtxa washanaii. Itxabu anushũ duawakĩ ẽ mia kẽwãshanaii.

²³ Dasibibũ mã Senhor Deus duawamisbuũ, matũ huiwẽ kẽwãkãwẽ. Dasibi Jacó enabuũ, Senhor Deus pepawakĩ ewapawakãwẽ. Dasibi Israelĩ enabuũ, Senhor Deuski mesekĩ kẽwãkãwẽ.

²⁴ Senhor Deusũnã, nuitapaibu hatuki dakekĩ hatu danaĩsmaki. Hanua ea akabu hawa huneama hatuki dakei hatuki petxismaki, Hawara yukabu nĩkatã hatu merabewamiski.

²⁵ Mĩ nuku putaismawẽ taeshũ minabu itxapabũ berubi ẽ mia kẽwaĩ heneama ikũkaĩshanaii. Tsuabũra mia duawamisbu bebũshũ haska ẽ yubakai ẽ mia meneshũkubaĩshanaii.

²⁶ Habu nuitapabiai keĩsbumã pikĩ yaniwai pepeshãkanikiki. Matubũ mã Senhor Deus benairã, haki nukutã mã kẽwãshanaii, bari itxapa hiwekũkaĩkinã.

^27-28 Senhor Deusrã, ha nukũ shanẽ ibu kayabiki. Mae pakea tibi hatu shanẽ ibushũmiski. Haskawẽ taeshũ mai hirabi anu hiwebaunabu yura betsa betsapa shukuabũ Senhor Deus shinãtã ha bebũ dãti ishũ hau kẽwaĩ beshanũbũwẽ.

²⁹ Dasibi shanẽ ibu kushipabu hatũ hamapai mirima haya hawẽ hiwekanikiki. Hakia dasibibu mawai ana mai mishpushanaibuwẽ taeshũ dasibibũ dãti ishũ hau Senhor Deus besti kẽwãshanũbũwẽ, habu ibubis hiwea hayatirubumakirã.

³⁰ Enabu pakubaĩkĩ Senhor Deuski mesekĩ kẽwãshãkanikiki. Hakiri hãtxakĩ yuibaũshãkanikiki, pakubaĩkĩ hakiri yui heneamarã.

³¹ Habu kaĩriabumari txipu kaĩtã hawẽ itxakanikatima inũ hawẽ dayakiri haska akubaĩmis hatuki txaniriakubaĩshãkanikiki.