Salmos 20 - Kaxinawá Bíblia (BR)

Hau Deusũ merabewanũ hawẽ kushipa yukanikaki, na nawati hãtxarã

Davĩ kãta kenenikiaki

¹ Tsuãra bika tenekĩ Senhor Deus mĩ yukai hau mia nĩkanũwẽ. Jacó Senhor Deus ikũkaini habiatũs hau mia merabewakĩ miki sinataibu mia nemashunũwẽ.

² Hawẽ kẽwãti hiwe Sião Jerusalém anushũ hawẽ merabenãtiwẽ hau mia merabewanũwẽ.

³ Duawakĩ mĩ inãkuĩ tibi mĩ inãkubaĩmis inũ inabũ sheni menukĩ mĩ benimawamis shinaĩ hau matuwẽ benimakũkainũwẽ.

⁴ Haska betxipaikĩ mĩ akatsis ikai hau mia meneshũkubainũwẽ. Haska mĩ yubakairã, hau dasibi Senhor Deusũ mia amariakubainũwẽ.

⁵ Nukũ Senhor Deusũ kena kushipawẽ ma nuku hatu maemamawẽ taeshũ benimakĩ hawẽ unãmati tari pusteya bandeira hawẽrua sanã sanã akĩ nũ hakiri shinaĩ besishanaii. Dasibi mĩ Senhor Deus yukai menekĩ hau mia ashũkubainũwẽ.

⁶ Senhor Deusbe hãtxakĩ nũ yuka hawẽ mae meribi naiurishũ hawẽ kushipa itamamawẽ nuku merabewakĩ nuku binumamis ẽ unaiĩ, hawa shinã betsa wamarã. Haskakẽ shanẽ ibu katunishũ hatu maemamamis ẽ ikũwaiĩ.

⁷ Nawa betsabũ hatũ detenameti tarãbaĩti itxapa tanamisbuki. Hanushũ betsabũ hatũ cavalo itxapa tanariamisbuki. Hakia nukubunã, nukũ Senhor Deuski txiti ikĩ ha besti nũ yuimiski.

⁸ Ha yura betsabu babutã niri ikaibũ hakia nukuburã, babuama mestẽtã nũ kakũkaĩmiski.

⁹ Senhor Deusuũ, nũ mia yukakĩ kenai nuku kemawe, nukũ shanẽ ibu kushipa inãtã nukuki sinataibu maemamakinã.