Salmos 19 - Kaxinawá Bíblia (BR)

Dasibi Deusũ dami waniwẽ hawẽ kushipa nũ uĩtirukiaki, na nawati hãtxarã

Davĩ kãta kenenikiaki

¹ Senhor Deus kushipatũ damiwani nai manaũriabu shabakabi hawẽ kushipakiri habu nukuki txanikanikiki. Naiuria habu dami pepa wanibũ nuku tapĩmamisbuki.

² Shaba tashnikirãkirãkĩ Deusũ kushipakiri txani hãtxakĩ yuikubaĩmiski. Meshunã, habias Deusũ kushipakiri txanikĩ betsa tibi tapĩmariakubaĩmiski.

³ Hãtxa kayabi hayama inũ hawẽ hui tsuã nĩkamabia

⁴ mai hirabi anushũ haska yurabu tapĩmai hawẽ bana nĩkamisbuki. Shukua tibitũ Senhor Deuskiri unãmisbuki. Nai anu hau hauri dakashanũ Deusũ bari dũtani

⁵ hanua benimai kauãkĩ mai hirabi dũkekubaũmiski, huni aĩyaĩ kai hawẽ mae anua benimai kaĩkaĩmis keskairã, ha inũ, huni kushikaĩkĩ hatu maemanũ ika kushikaĩmis keskairã.

⁶ Nai uke betsauria bari tashnikiranarã, dũkebauni uke betsa meshti iki ibukũmiski. Hawẽ txasha shana bakai danaĩ tsua hani pashatirumaki.

⁷ Senhor Deus yusinananirã, kanema pehairaki, Hiwea bena inananãmiski. Hawẽ yunua betsa waisma ikũ kayabiki. Yurabũ hawa unãriama pepabu unanepa hatu wamiski.

⁸ Haska Senhor Deusũ yusĩkĩ yunumis inũ nemamisrã, pepa bestiki, hunibũ huĩti benimawairã. Hawẽ yunuti hãtxa hawa txakabumaki, yurabu hatũ beruwẽ shabakabi hatu uĩmairã.

⁹ Senhor Deusũ hawẽ datemairã, shũpĩ besti ipakeikiki. Haska yurabu kenemani hawẽ hãtxa tibi dasibi txanima pepaski.

¹⁰ Hawẽ yusianã, txanima pehairaki, Ouro pepa hawẽ karu binuaki. Ha inũ, hawẽ yusianã, buna bata binuhaira keskaki.

¹¹ Ha dikabi mĩ yusiãwenã, mĩ tsuma ea pewakĩ mĩ ea nemamiski. Mia nĩkahairatã mia ashuaĩburã, pehairawẽ mĩ hatu manakumiski.

¹² Tsuã ibubis kanetã dasibi hawẽ txakabu unãtirubumẽ? Senhor Deusuũ, hawa shinãma txakabuwakĩ ẽ kanemisrã, ea buashũtã ẽ shinã ea betsa wawe.

¹³ Mĩ tsuma txakabubia ẽ kẽmisrã, ea nemakĩ ea betsa wawe, hau hatũ ea kẽmamistũ ea parãkĩ hawenawatã hau ana ea yunuyamashanunã. Mĩ ea haska wa huni hawa txakabu hayama ana txakabũ ea meama ẽ pepa bestikũkaĩkatsis ikaii.

¹⁴ Ẽ hãtxa inũ ẽ shinaĩ mĩ haska betxipaiai besti ẽ mia uĩmakĩ betxipaimakatsis ikaii. Ẽ Senhor Deusuũ, mĩ kushipawenã, mishki hiwe keska anu mĩ ea iruma inũ mĩ ẽ mekenã piskumanikaki.