Salmos 115 - Kaxinawá Bíblia (BR)

Nukũ Deus nai anu hiweakiaki, na nawati hãtxarã

¹ Senhor Deusuũ, nuku kẽwãma ibubis mĩ pepakiri mimebi kẽwẽ. Mĩ txanimawẽ inũ mĩ nuikipawẽ taea mimebi kẽkũkaĩwẽ.

² Haskakĩ ikũwãbumã nuku yukakĩ: “Hanimẽ, matũ Deusrã?” ikaibũ

³ “Nukũ Deusrã, nai anuki!” Nukũ Deusũnã, haska betxipaiai keska dasibi dami waniki.

⁴ Habũ Deus ikũwãbumanã, hatũ yushĩ kẽwãti dami wakinã, hatũ mekẽnẽ ouro inũ prata amisbuki.

⁵ Ha damirã, hashpa hayabia haska hãtxatirumaki. Beruyabia hawa uĩtirumaki.

⁶ Pabĩkiyabia hawa nĩkatirumaki. Dekĩ hayabia hawa shetetirumaki.

⁷ Mekẽ hayabia hawa metirumaki. Taeyabia hawa nikaũtirumaki. Teshu shuiyabia hawa hãtxa betsa taska kaĩtirumaki!

⁸ Tsuabũra ha yushĩ kẽwãti dami wamisburã, habia hatũ dami keskabuki. Ha habũ hatũ dami ikũwaĩbu habiaskaribuki.

⁹ Israelĩ enabuũ, matunã, Senhor Deuski txiti ikĩ ikũwãkãwẽ! Hatunã, nuku merabewakĩ nuku mekekubainikiki.

¹⁰ Deusbe nukunabu hãtxashunikabuũ, Senhor Deuski txiti ikĩ ikũwãkãwẽ! Hatunã, nuku merabewakĩ nuku mekekubainikiki.

¹¹ Tsuabura Senhor Deuskiri mã pe hãtxakatsis ikairã, haki txiti ikĩ ikũwãkãwẽ! Hatunã, nuku merabewakĩ nuku mekekubainikiki.

¹² Senhor Deus nuku hakimama nuku shinãkubainikiki. Nuku duawakĩ nuku pepawakubainikiki. Nũ Israelĩ enabu duawakĩ nuku pepawakubainikiki. Habu Deusbe nuku hãtxashunikabu duawakĩ hatu pepawakubainikiki.

¹³ Tsuabura shanẽ ibu inũ shanẽ ibuma Deuskiri pe hãtxamisbu Deusũ habu duawakĩ pepawakubainikiki.

¹⁴ Senhor Deusũ hau matũ bababu pawakubainũwẽ, matuna inũ matũ bakebunarã!

¹⁵ Senhor Deusũ nai dami wani inũ mai dami wanitunã, hau matu duawakĩ pepawakubainũwẽ!

¹⁶ Nairã, Senhor Deusunaki. Hamẽ mairã, yurabu yununiki.

¹⁷ Tsuabura ma mawa maiwaburã, hanu besti nishmamiski. Tsuabura ma mawatã ana Senhor Deus habũ kẽwãtirubumaki.

¹⁸ Hakia nukubu hiweyushunã, natiã Senhor Deus nũ kẽwaiĩ. Hanushũ heneama nũ kẽwãpakeshanaii.