Romanos 9 - Kaxinawá Bíblia (BR)

Israelbu kayabirã, Deusunabukiaki, na hãtxarã

¹ Jesus Cristo eã ẽ ikũwaĩwẽ taea haki dasishũ ikũkĩ txanima hãtxa ẽ matu yuiaii. Yushĩ Pepatũ ẽ xinã mestẽwãshũ ea yuimai ẽ hawa matu paraĩ txani txakamaki.

² Eskaki, matu yuinũ ea nĩkakãwẽ. Enabu judeubuwẽ hatuwẽ nuihairai huĩti nixma punu nuka ẽ hatuwẽ kashakatsis ikũkainaii.

³ Haskakẽ enabu Israelbũ hau Cristo ikũwanũbũ hatu merabewanũ ika eã eska ẽ hatukiri xinãkubainaii. Ea kayabis Deusũ hau hatuwẽ ea kupinũ ika hatuwẽ taea Cristo dapashkatã haskatã enabu kayabi ẽ hatu merabewatiru daka ishũ hatukiri ẽ xinãkubainaii, hau enabũ Cristo ikũwanũbunã.

⁴ Enabu Israelburã, nukũ shenipabu anua Deusũ ana hatu ibu wakĩ hawẽ bakebu keska watã hatube hiwekĩ hawẽ kuxipa hatu uĩmai hawẽruai hatu bebunua txashahairakũkainikiaki. Hatu haska wakĩ Deusũ hawẽ yunuti inũ hawẽ nemati Moisés yusĩmakĩ hau itxashũ Deus kẽ kayabi wakubainũbũ hatu yusĩkĩ Messiaskiri hatu yubani haska manakakĩ hau txibãkubainũbũ betsa betsapakiri hatube Deus yubakakũkainikiaki.

⁵ Habiari nukũ shenipabu Israelbu anua Messias Cristo yura kayabitã tashniniki. Nukũ mekenika Deusũ dasibibu mekei shanẽ ibuhairamisrã, kẽwãkĩ heneyamakubainãkãwẽ. Haskakirã.

⁶ Haska Deus Israelbu hatu yubanirã, Deusũ hawa betsa wama hawẽ hãtxa kuxipa hawa benuamaki. Haskabia Deusũ hatu yubani ikũwãkĩ ha Israelĩ baba itxapabũ txibãbumawẽ taea habu Israelbu kayabi itirubumaki.

⁷ Haska inũ, Deusũ Abraão yuikĩ: “Haska ẽ mia yubairã, Isaquewẽ taea mĩ bababu kayabi besti inũbarishãkanikiki”, aniwẽ taea dasibi habũ txibãbuma Abraãonẽ bababu hawẽ bababu kayabi itirubumariki.

⁸ Eska hakiri hãtxani nuku xinãmaikiki. Deusũ bakebu yuikinã, habu hawẽ shenipabu Abraão inũ hawẽ bake Isaque xinãma hakia habu hatu yubani hawẽ yubakani hãtxa haska tsuabũra ikũwãkĩ xinãkĩ hakimama ashũkubainaibu Abraãonẽ bakebu itirubuki.

⁹ Ha haska washanaikiri Deusũ yubakĩ yuikinã: “Txanima ana bari betsatiã txĩtũkirã ẽ matu merabewaya mĩ aĩ kayabi Saraki mĩ bake wa huni bake kaĩshanikiki”, aniki.

^10-12 Haska bestimaki. Betsa Deusũ anirã, eska waniki. Hawenabu Deusũ katukĩ hawara pepa inũ hawara txakabu yurabũ akubaĩmis xinãma hakia haratubura Deusũ hawenabu wakatsi ikai besti xinãkĩ hatu katumis mã shabakabi unãnũbũ nukũ shenipabu Isaquẽ bakebukiri matu xinãmanũ nĩkakãwẽ. Rebeca tsupibu bake wakĩ Isaquẽ nanemaima kaĩriama hawa pepa inũ hawa txakabuwariabumakẽ bebũkiri Deusũ Rebeca yuikĩ: “Mĩ bake dabe kaĩtã ha ha katxu Jacó kaĩyãtũ hawẽ betsa ha dukũ kaĩyã Esaú tsuma washanikiki, shanẽ ibukinã”, aniki.

¹³ Hanushũ txipu ana Isaquẽ bakebukiri Israelĩ baba Yavé Deusũ yuikĩ: “Jacó besti abukĩ Esaú ẽ danãniki”, akĩ Deusũ hatukiri yuiai Malaquíasĩ keneniki.

Tsuãra Deusũ xinã yunutirumakiaki, na hãtxarã

^14-15 Haska inũ, Deusũ Moisés yuikĩ: “Haraturawẽ ẽ nuikatsis ikai hatuwẽ nuikĩ haratura ẽ duawakatsis ikai ẽ hatu duawakubaĩmiski”, ikĩ haratura dukũ kaini xinãma ha dabetã huĩti unãkĩ bestitxai katukĩ Deusũ kanenimẽkaĩ, pepa wamarã? Haskamaki. Hawẽ xinãnẽ besti akubainiki.

¹⁶ Yurabu hatũ xinãwẽ haska abukĩ hawara ibubis binũ ika hĩ ikai Deusũ hari xinaĩsmaki. Hakia tsuaburawẽ nuikĩ Deusũ hamebi hatu katumiski.

¹⁷ Haska inũ, txipu Deusũ shanẽ ibu Faraó kupikatsi xinãbiakĩ yuikĩ: “Faraónẽ, ẽ kuxipa miwẽ hatu unãmakatsis ikĩ mia katukĩ dasibi Egito nawabũ shanẽ ibu ẽ mia waniki, hau miwẽ taeshũ ẽ kuxipa inũ ẽ kena mai hirabi anu hiweabũ hau unãshanũbũ”, ikĩ hakiri Deusũ Moisés hãtxamai Moisés nĩkatã hakiri

¹⁸ kenenirã, yura betsabu Faraó ani keska wakĩ habu ha keskabuwẽ nuiama Deusũ hatu besu kuxi wakĩ huĩti nĩkaisma wakatsis ikĩ hatu haska wamiski. Hanua haraturawẽ Deus nuikatsis iki hatuwẽ nuimiski, abukinã.

¹⁹ Deuskiri mã xinaĩ: “Hawara Deusũ nuku amakatsi ikai tsuabũra hawẽ xinã nũ beshtetirumaki, haki kayakinã.”

²⁰ Ha inũ, matunã, haskakĩ Deusũ hamapai wamis hawẽ xinã unãmabia haska hawara wamiskiri txitekĩ mã yukatirumẽ? Na keskairã, mai kẽti hãtxakĩ mai mabu dami wanika yukakĩ yuikĩ: “Haskakĩ mĩ ea haska waimamẽ?” itirumaki.

²¹ Hakia haska aĩbũ mai mabu wakĩ habias mai kẽti dabe wakatsi ikĩ betsa haki hamapai wati xumu hawẽrua meribi wakĩ inũ betsa kẽti kayabi hawẽrua beshmas dasibituna hatu washũmis tsuã nematirumaki. Haska keskari wakĩ Deusũ hatu akeakemiski.

²² Haska yurabũ hatũ txakabuwẽ Deus danaĩbu Deus hatuki sinatakĩ mawa kayabiwẽ hatu kupishanai inũ, ha besti kuxipahaira Deusũ yurabu unãmakatsi ikĩ haska hawẽ kuxipawẽ hawaira akama teneshũ manayukubainikiki.

²³ Habiatiãri bebũkiri Deusũ nuku duawakatsis ikĩ hawẽ kuxipa nuku uĩmanũ ishũ nuku tibi nuku katukĩ xinãmisrã, nũ ma hawenabu nuku unãmaikiki.

²⁴ Haska tibi nukukiri akinã, nũ judeubu bestima judeubumari Deus hatuwẽ nuikĩ hatu duawakatsi ikĩ bebũkiri haska tibi nuku dasibi katuniki.

²⁵ Haska nawabuwẽri Deus nuikĩ hatũ txakabu buatã hawenabu wakatsis ikĩ haska washanaikiri haska kene haya Deusũ Oséias yuia kenekĩ: “Nawa betsabu ẽ hatu katuama ibiani hatukiri yuikĩ: ‘Enabuki’, akĩ ẽ hatu katutã kenashanaii. Hatukiri xinãkĩ ẽ hatu abuama ibiani hanu ana hatu danãma hatu abukĩ hatukiri yuikĩ: ‘Ẽ ma hatu abuai enabuki’, akĩ ẽ hatu kenashanaii”, iniki, Deusrã.

²⁶ Ha inũ, habianushũs ana hatu yuikĩ: “Maturã, mã enabuma ibiani hakia ẽ matu katukẽ: ‘Mã Deus hiweatũ bakebu’, matu kenashãkanikiki”, aka nĩkatã Oséiasĩ keneshuniki.

^27-28 Haska inũ, Israelbukiri Isaíasĩ yuikĩ: “Unãshubira akama haska hawẽ hãtxawẽ yubakani hawaira menekĩ ashanikiki, mai hirabi anu hiwebaunabu hatũ txakabuwẽ Deusũ hatu kupikinã. Hanushũ Israelbu mirimahaira maxitibiabũ eskarabes Deusũ hawenabu watã habu mekepakeshanikiki”,

²⁹ iwanã, Deusũ hatu kupiriama Isaíasĩ ana yuikĩ: “Nukũ Epa Deus kuxipahairatũ nukunabu Israelbu kupikĩ teshe wama inirã, nũ hayamari ikeanaii, haska Sodoma mae ewapanuabu inũ Gomorra mae ewapanuabu Deusũ hatu kupikĩ yamawani keskarã”, itã Isaíasĩri keneniki.

³⁰ Haskakẽ Deusũ yunuti judeubumã txibãkĩ Deusũ pashati benamabia habũ Jesus Cristo hatũ xinãnẽ besti ikũwaĩbu hatũ txakabu Deusũ ma hatu buashũtã ana hatukiri txakabu xinãma ikũkainikiki.

³¹ Hamẽ Israelbu ikirã, habu Deusũ yunuti inũ hawẽ nemati Moisés hawenabu yununiwẽ hatũ txakabu hatu buashũtã pewatirubu dabanẽ haska xinãkĩ Jesus Cristo ikũwãbumawẽ taeshũ Deusũ hatũ txakabu buashũtirumaki.

³² Haskairã, haskai inibumẽ? Habũ ikũwãti pepa hayabumawẽ taearã. Eskaki, matu yuinũ nĩkakãwẽ. Bai namaki mixki daka nũ uĩyama kai haki huti itã ha mixki tsakabaĩ nũ tĩ itiruki. Habiaska keskariai Deusũ yunuti inũ hawẽ nemati judeubũ txibãkubainai pebiakẽ haska xinãma hatũmebi hatũ xinãnẽs hiwekĩ Messiaskiri hãtxa danaĩ mixkiki huti ika keskanibuki.

³³ Na habias yusĩa Messiaskiri Deusũ hawẽ hãtxa yuishunika Isaías yuimakĩ: “Uĩa. Ẽ haska yubakani ẽ kuxipa mixki keska Jerusalém anu ẽ nitxĩshanaii, haki huti iki itxapabu tsakabaĩbaini tĩ ikubaĩshãkanikiki, ikũwãmarã. Hakia tsuabũra hawẽ hãtxa ikũwãkĩ txibaĩbu ẽ hatu hawa dake wama ishanaii”, aka nĩkatã hari kenerianiki.