Romanos 5 - Kaxinawá Bíblia (BR)

Jesus ikũwaĩbu Deusũ hawẽ haibuaibu nuku wamiskiaki, na hãtxarã

¹ Hawẽ hãtxa nũ ikũwaĩwẽ taeshũ Deusũ nuku pepa wakĩ xinãkubainikiki. Nukũ Shanẽ Ibu Jesus Cristõ Deusbe nuku haibunamemaya unãnuma hiwei nũ benimakũkainaii.

² Hanua haskawẽ nũ benimaiburã, txĩtuãma Jesus Cristo ikũwaĩ Deusbe haibunamei nũ hiweabuki, ikisrã. Ha inũ, na habiatiã bestima hakia betsatiãri Deusbe hiwei hawẽ kuxipaki nukutã nũ hawẽruashanaii, ikibi ikirã.

³ Haska bestimaki. Natiã Cristo nũ ikũwaĩwẽ taeshũ hamapai mei nũ bika teneaiwẽri Deusũ hawẽ kuxipa nuku uĩmakubainaiwẽ hawẽ xinã txãkaĩ nũ txĩtuãma nũ kuxipakũkainai nũ unaiĩ.

⁴ Deusũ nuku kuxipa wakinã, haska xinaĩ keska nũ akaibu nukukiri pe xinaĩkiki. Hanushũ Deusũ kuxipa nũ hayawẽ taea haska nuku yubani manairã, nũ benutiruma nũ xinãkubainaii.

⁵ Haska nũ manakatiru Deus nukuwẽ nuimis nuku unãmakĩ hawẽ Yushĩ Pepa nuku inã hawẽ taeshũ Deus ikũwãkĩ txibãkubaĩkĩ haska nuku yubani manai hamẽ nũ manakamaki. Haska xarabuwẽ taeshũ hamapai bika nũ teneairã, hawẽ taeshũ Deus nũ kẽwãkubainaii.

⁶ Yura dasibibu Deusũ nuku kupinũ ikũkainaya haska ibubis pashai nũ meketirubumakẽ hatiãra hanu Deusũ Cristo yunua tashnitã yurabũ Deuskiri xinãma txakabukubaĩmisbu hatũ txakabu dasibi Cristõ hatu bua keyushunũ ika debuniki.

⁷ Tsua haskariai yura betsawẽ taea hawẽ nuikĩ hawẽ kupiti bishuĩ: “Ea awe”, ikirã, tsuã haska xinãtirumaki. Hakia yura betsa pekũkainai hawa kaneisma tenãnũ, iwanã, itxakawaibu tsuãri hawẽ kupiti bishuĩ mawashutirumariki. Yura betsabu merabewakubaũmis nuikipa tenãnũ, iwanã, itxakawaibu hawẽ kupiti bi yura betsa hawẽ dabanã iki mariastũ bishuĩ mawatiruraka.

⁸ Haska keska binumakĩ Deus dasibibuwẽ nuikĩ nuku abuai nuku unãmanirã, dasibibu nũ txakabu husia hiwebiakẽ ha xinãma Deusũ Cristo yunua tashnitã nukũ kupiti nuku bishuĩ ha besti nuku mawashuniki.

⁹ Cristo mawakĩ nukũ kupiti ma nuku bishũkẽ Deusũ nukukiri yuikĩ: “Mã ana txakabu hayamaki”, iniwẽ taea Cristo Shanẽ Ibuhairai hanu hawẽ henei yurabu kupinũ ika hushanaitiã Deus nukuki sinatabiamis hawẽ kupiti nũ hawa ana hayamahaira ishanaii, Cristo nukuwẽ hiwekũkaĩkĩ nuku pashawamiskenã.

¹⁰ Haska inũ, Deus dasibi yurabuki sinataya nũ habe haibunameriamabiakẽ hawẽ Epa daewakĩ nukũ kupiti nuku bishuĩ Cristo nuku mawashũkĩ nukũ txakabu bua keyukĩ ana xinãtima watã pepa keskabu nuku waniki. Hawẽ bake hiwekũkaĩkĩ txanima nuku mekeshanikiki, nũ ma Deusũ haibuaibukenã.

¹¹ Natiã nukũ Shanẽ Ibu Jesus Cristõ hawẽ Epa Deus hatũ nuku haibu wamakĩ daewamani unãnuma hiwekĩ txanima hawẽ taeshũ benimakĩ Deus nũ kẽwãkubainaii.

Adão inũ Cristokirikiaki, na hãtxarã

¹² Mai anua ha huni bestitxai ha dukũ Deusũ damiwashũ nemabiabaina nĩkama txakabu hikimakĩ tateskĩ taewakẽ hawẽ taea hau mawashanũ Adão anibuai Deusũ kupikĩ nemama inikiaki. Haska wanikẽ yurabu dasibi Adão keskariai Deus nĩkama kanemisbuwẽ taea anibui inũ yushabui mawariakubaĩmisbuki, Adão ini txibaĩnã.

¹³ Ha txakaburã, ma yurabu anu mai anu haya inikiaki. Hawẽ yunuti inũ hawẽ nemati Deusũ yunukĩ hayawariamabia ha yurabu txakabuaibu hatũ txakabu xinãkĩ Deusũ hatu kupikubainikiaki.

¹⁴ Haskakẽ Deusũ Adão damiwashũ hari hiwemani anua inũ hanu Moisés hiwenitiã Moisés Deusũ hãtxa yurabu yusĩkĩ taewariama hawẽ yunua keskawẽ txakabui yurabu ibubis mawakubainibukiaki, Adão keskakĩ Deus nĩkama inũ txakabu betsa betsapa wakubainirã. Ha dukũ huni Adão Deusũ damiwaniki. Hatũ txakabuwanikẽ hanua huni betsa pepa Adão binua ha katxu hau hushanũ Deusũ yubani hushũ hatũ hiweti bai bena nuku washuniki.

¹⁵ Ha Adãonẽ txakabu tashnimaniwẽ taearã, Deusũ hawẽ aka nuku unãmairã, haskasmaki. Ha huni bestitxaitũ txakabuwaniwẽ taea haska keskariai ha txibaĩ itxapabu mawakubainibuki. Hanushũ Deusũ hawẽ aka betsa nuku inãkuĩkĩ huni bestitxai Jesus Cristowẽri itxapa binumaniwẽ taeshũ itxapaburi pewakĩ hatu merabewaikiki, hawenabu hatu wakinã.

¹⁶ Ha inũ, Deusũ nuku inãkuĩni inũ haska Adãonẽ txakabuwani ha dabe haskas dabemaki. Huni bestitxaitũ txakabuwaniwẽ taea dasibi yura betsaburi txakabukubaĩmisbuki. Haskawẽ taeshũ yura dasibibu hatu kupishanai Deus deveabu keska manakanikiki. Habiaskabiakẽ hatiri yurabu txakabubiakubainaibu Deusũ hatu duawakĩ tsuabũra hawẽ bake Cristo besti ikũwaĩbu habu kupiama: “Hawa txakabu hayama pepabuki”, iwanã, hatukiri pe xinãmiski.

¹⁷ Hanua Adão huni bestitxaitũ kanekĩ txakabuwaniwẽ taea habiaskariai yura dasibi mawariakubaĩmisburã, txanimaki. Hakia Deus nuikipatũ Jesus Cristo huni bestitxai nuku hamẽ inãkuĩni habũ nũ ikũwaĩbu duawakĩ Deusũ nuku pepabu waya hawara Jesus Cristõ nuku ashũkĩ binumaniwẽ taeshũ hiwea bena bitã ha huni betsa Cristõnã, dasibiburi merabewakĩ hatu binumashuniki.

¹⁸ Haskakẽ huni bestitxai Adãonẽ txakabuwanirã, hawẽ taea hatũ kupitiwẽ hau mawakubaĩshanũbũ yura dasibibu Deusũ hatu yupuniki. Habiaskari wakĩ huni bestitxai hawa kaneismatũ nukũ kupiti nuku bishũriai mawaniwẽ taeshũ yura dasibibũ nũ ha ikũwaĩbu Deusũ nuku pepawatã habe niti akama nuku hiwekuĩmashanikiki.

¹⁹ Haska inũ, huni bestitxai Adãonẽnã Deusũ nemati txibãma iniki. Habiaskariai yura dasibibu Adão ini keskabuwẽ taeshũ: “Yura dasibi txakabukĩ habias txibãkanikiki”, iwanã, Deusũ hatukiri pe xinaĩsmaki. Hakia huni bestitxairi Jesus Cristõnã, hawara Deusũ yunua txibãkubainiwẽ taeshũ yurabu itxapabũri Cristo txibaĩbu hatu merabewakubainai pepabũ txibãkanikiki.

²⁰ Hanua haskai yurabu txakabu bestiwẽ hiwei mesei atimapahairakubainaibũ Deusũ hawẽ yunuti inũ hawẽ nemati nukũ shenipabu Moisés yusĩmakinã, ana hatũ txakabu ewawati waniki. Hanua txakabui pikubiaibũ Deus hatuwẽ nuikĩ hatũ txakabu binumakĩ hawẽ pepahaira hatu unãti wamakĩ hatu duawaniki.

²¹ Txakabu hikinishũ ha shanẽ ibukĩ yurabu tenãkubaĩmiski. Haska keskariai Deus shanẽ ibukinã, hawẽ nuikipawẽ hawẽ bake Jesus Cristowẽ taeshũ hawenabu nuku wakĩ: “Ha enaburã, pepabuki”, ikĩ nuku hiwekuĩmaikiki.