Romanos 4 - Kaxinawá Bíblia (BR)

Deusũ yuba hãtxa Abraãonẽ ikũwanikiri yusĩnikiaki, na hãtxarã

^1-3 Deusũ hãtxa yuishunikatũ nukũ shenipabu Abraãokiri keneni eska yuiaki. Deusũ hãtxa Abraãonẽ ikũwãniwẽ taeshũ Deusũ xinãkĩ: “Abraão huni pepaki”, akinã, Abraãonẽ Deus ikũwãkubainai anikiri matu yuinũ nĩkakãwẽ. Abraãokiri Deusũ xinãkĩ: “Abraão pepai hiwekũkainaiwẽ taea huni pepaki”, ikaya Abraão ibubis kẽkeaniki. Hakia pepai hiwekũkainaiwẽ taeama hakia hawẽ hãtxawẽ Deusũ yubai nĩkakĩ tapĩtã ha besti Abraãonẽ txibãkubainiwẽ taeshũ Deusũ Abraãokiri pe unãti wakĩ xinãniki.

⁴ Haska inũ, tsuabũra yura betsa dayashunabu hatũ daya pei inãkuĩ keska hamẽ inãma hakia hatu dayamatã deveshũ pakakĩ inãmisbuki.

⁵ Hamẽ, tsuabũra Deus duawanũ, iwanã, hatũ huĩti merã Deus ikũwaĩbu Deusũ hatũ aka pepawẽ hatu pepa wama hakia hatuwẽ nuikĩ yurabũ hatũ xinã betsa wawẽ taeshũ hatũ xinã txakabu hatu buashũtã: “Ha yura pepabuki”, akĩ haskawẽ Deusũ hatukiri xinãkubaĩmiski.

⁶ Haska pepa inũ txakabu yurabũ amisbukiri tanama haska Deusũ abuai aki pepakĩ Deus unãti wamamisbukiri Davĩ ibubis unãkĩ xinaĩ hãtxai:

⁷ “Tsuabura hatũ txakabu Deusũ ma hatu buashũtã ana xinãmakẽ xinã txãkãmisbuki.

⁸ Tsuara hawẽ txakabu Shanẽ Ibu Deusũ ana hakiri xinãmakẽ ha yura benimariamiski”, iniki, Davirã.

⁹ Na Davĩ eska kenekinã, judeubũ hatũ beya txibãkĩ hatũ hina kubitxi meshtemisbukiri besti animẽ? Habu judeubuma dikabiki akama iniraka? Matu yuinũ nĩkakãwẽ. Abraãonẽ Deusũ hãtxa nĩkatã ikũwãkubainaiwẽ taeshũ Deusũ unãti watã yuikĩ: “Huni pepaki”, anikiri kenekĩ ẽ matu xinãmashuki.

¹⁰ Hakia hatiã Deusũ Abraão hakiri pepa xinãnimẽ? Hawẽ hina kubitxi ma meshtekẽ animẽ? Meshteriamabiakẽ aniraka? Ana matu xinãmanũ nĩkakãwẽ. Hawẽ hina kubitxi meshteriama Deus ikũwãkubainaiwẽ taeshũ Deusũ Abraãokiri pe xinãniki.

¹¹ Hanushũ Abraãonẽ Deusũ hãtxa ikũwaĩwẽ taeshũ unãti wakĩ hawẽ xinãmati wakĩ hawẽ hina kubitxi meshtenibuki, haska ikai tsuabũra shabakabi hau unãnũbunã. Deusũ haska wanikẽ dasibibũ Deusũ hãtxa ikũwaĩbu Abraão hatũ epa ikũkaĩtiwaniki, habũ hatũ hina kubitxi meshtemisbu inũ habũ meshteabumarã. Haska tibibu Deusũ haturi unãti wakĩ: “Yura pepabuki”, hatu washanikiki.

¹² Haska inũ, haska Abraãonẽ hawẽ hina kubitxi meshteriama Deus ikũwãkubaini keska wakĩ judeubu inũ judeubuma haratubũra Deus ikũwaĩbuwẽ taea ha ini keskabu habu dikabi hatũ shenipabuki.

Deusũ Abraão yubanikiri Paulõ hatu yusĩnikiaki, na hãtxarã

¹³ Haska inũ, hawẽ yunuti inũ hawẽ nemati Deusũ Moisés kenemariama Deusũ hãtxa Abraãonẽ ikũwãkubainaya Deusũ Abraãokiri xinãkĩ: “Huni pepaki”, aniwẽ taea hatiritũ ha keskakĩ hawẽ bababũ Deusũ hãtxa ikũwãkubainaibu mai hirabi hatu ibu wamakĩ yunushanũ, iwanã, Deusũ Abraão hatukiri yubaniki.

¹⁴ Ha dukũ hawẽ yunuti inũ hawẽ nemati hãtxa Deusũ Moisés yusĩmanikenã, ha besti txibãkĩ haska Deusũ Abraão yubani bi bestitiruburã, habũ Jesus nũ ikũwaĩbu hamẽ ikeanaii. Ha inũ, haska Deusũ Abraão yubani hawa kuxipa pema iriakeanaii.

¹⁵ Hamẽ hawẽ yunuti inũ hawẽ nemati hãtxa Deusũ Moisés yusĩmani kaneaibu hatuki Deus sinatakĩ kupimiski. Hakia hanu yunuti inũ nemati hãtxa hayamakẽ hawawẽ taeshũ tsua kupitirumaki.

¹⁶ Hawara Deusũ abuai Abraãonẽ ikũwãkĩ ani keska wakĩ Deusũ hawẽ hãtxa mã ikũwaĩnã, hawẽ hãtxa benutima wakĩ nuku mestẽwãshuniki, hawa pakama hawẽ inãkuĩ ikũwãkĩ nũ bishanũbunã. Ha Deusũ Abraão yubani xinãkĩ tsuabũra hawẽ yunuti inũ hawẽ nemati nũ txibãkĩ Jesus nũ ikũwaĩbu inũ, tsuabũra Moisés hãtxa txibãma Abraãonẽ ikũwãni keskakĩ mã ikũwaĩbu mai hirabi nuku yunushanairã, Deusũ Abraãowẽ nuku dasibi yubashuniki, dasibi ikũwaĩbũ shenipabu wakinã.

¹⁷ Haska inũ, ha Abraãonẽ ikũwãkubainai Deusũ yurabu mawa bestẽwãtiru inũ hawẽ xinãnẽ hawara xarabu dami hayariama damiwamistũ Abraão yuikĩ: “Yurabu betsa betsapabũ hatũ shenipabu ẽ mia waii”, inikẽ Moisés hakiri keneniki.

¹⁸ Haska Abraão inũ hawẽ aĩ Sara anua besti hatũ huni bake kayabi inũ hawẽ bababu mirima tsuã tanatiruma hayatã yura betsa betsapa shanẽ ibushanaibu bebũkiri Deusũ yubani anibuhairakĩ haska xinãma Deusũ hãtxa nĩkatã manakakĩ hawa dateama Deusũ haska washũshanai ikũwãkĩ xinãkubainikiaki.

¹⁹ Anibuhaira 100 bari kemai mawatirubia inũ bakewatirumabia hawẽ nuiama inũ, hawẽ aĩ Sara yushabuhaira ma mawa kemariaitũ bake bitiruma hawẽ nuiamari Abraão hawẽ xinã babuama Deusũ hawẽ huni bakekiri yubani ikũwãkubaĩkĩ hawara Deusũ ashũshanai hawa hakimama mestẽshũ uĩkĩ kẽwãkubainikiaki.

²⁰ Deusũ Abraão yubani ashũshanai hawa xinã betsa betsapa wama inũ, xinã dabeama manakĩ ana ikũhairawakĩ Deus kẽwãkubainiki.

²¹ Haska Deus kuxipatũ yubanishũ uĩmashanai Abraãonẽ xinãkubainai

²² haskai Deusũ uĩkĩ xinãkĩ: “Abraãonẽ ea ikũwaĩnã, huni pepaki”, anikiaki.

²³ Haskawẽ taeshũ Deusũ Abraãokiri hatu kenemakinã, hakiri besti xinãkĩ akama hakia yura betsabukiri

²⁴ inũ nukukiriri xinãkĩ ashuniki, hatu kenemakinã. Habiatũri nukũ Shanẽ Ibu Jesus bestẽwani ha xinãwẽ nũ ikũwãyã Deusũ hawenabu nuku wamiski.

²⁵ Hau nukũ txakabu nuku buashuni nukũ Shanẽ Ibu mawanũ Deusũ yunua mawaxina ana bestẽwaniki, hau hawẽ taeshũ yura pepabu nuku wakubaĩshanunã.