Romanos 2 - Kaxinawá Bíblia (BR)

Yura dasibibu unãtã Deusũ txanima hatu kupishanikiaki, na hãtxarã

¹ Haska txakabu tibiwẽ yura betsabu ikai tsuãra uĩtã xinãkĩ ha akĩ txitenũ ishũ mã amis kasmai mã atirurã, habias txakabu mã haya matũmebi mã daketapatirubuki. Habiaska tibi habubetã mã abiamiswẽ taearã, haskawẽ taeshũ shanẽ ibu bebũshũ matu txiteaibu mã hawa nematirubumaki.

² Hamẽ tsuabũra txakabuwakubaĩmisbu kaneama Deusũ unãti watã hatu kupishanai nũ unaiĩ.

³ Hamẽ matunã, tsuabũra txakabuwariaibu uĩkĩ mã hatu kũyã akatsis imisburã, matũri habiaskari txakabu mã ariamiswẽ taeshũ unãtã Deusũ matu kupishanai: “Ẽ pashatiruki”, ikĩ xinãyamakubaĩkãwẽ.

⁴ Hakia Deus pepahaira mã danãbiaya matũ txakabu tanabiakubaĩkĩ hau ana ha xinãma Deusũ buanũ tsuabura hakiri kakĩ xinã betsa watã mã yukashanũbũ matu xinaĩ matuwẽ nuikĩ hatiãra mã hakiri yukashanai hĩ hĩ ikama Deusũ manakubainikiki.

⁵ Haska inũ, mã hatiritũ txakabu betsa betsapa akĩ henekatsi ikama Deus xinãma txakabu ibubis matsãkeakebaĩkĩ Deus sinatamamisbuwẽ taeshũ yurabu dasibi unãti washanaitiã ana manama Deusũ matu kupishanikiki.

⁶ Haska yurabu tibi hiweshũ amisbuwẽ taeshũ Deusũ hatu kupiakeakeashanai matu yuinũ nĩkairakãwẽ.

⁷ Deusũ hau nuku kẽwãshanũ hiwekuĩkatsi nũ hatiritũ hawẽ hãtxa txibãkĩ heneama pepawakubainaibu pepawẽ manakukĩ mekekĩ nai anu Jesusbe Deusũ nuku hiwekuĩmashanikiki, ikibi imakinã, nũ habu haska hiwekatsi benamisburã.

⁸ Hamẽ yura betsa pubeĩ sinatai ha irabenamekĩ Deusũ hãtxa txanima danãkĩ ha txibãma txakabu betsa betsapa wakubaĩmisbu habuki Deus sinatakĩ kupishanikiki.

⁹ Haska wakĩ Deusũ hatu isĩ tenemakĩ nuitapahaira wakĩ keyushanikiki, ha dukũ habu judeubũ txakabu wamisbu kupi taewatã hanushũ habu judeubumã txakabu wariamisbu kupikinã.

¹⁰ Hakia mã hatiri pe hiwemisbu kẽwãkĩ niti akama unãnuma Deusũ matu habe hiwekuĩmashanikiki, ha dukũ judeubu manakutã hanushũ judeubuma hatu manakuriakinã.

¹¹ Hanushũ Deusũ hatu shabakabi unãti wakinã, yurabu txakabu inũ pepabu dasibi uĩmisshũ habias xinãwẽ besti hatu unãti wakĩ kanetirumaki.

Dasibi yunuti unaĩbu inũ unãbuma Deusũ hatu unãti washanikiaki, na hãtxarã

¹² Dasibibũ Deusũ yunuti inũ hawẽ nemati hãtxa Moisés keneni haska hayama dabanẽ unãma txakabuwakubainaibu hawẽ yunuti inũ hawẽ nemati hãtxa haska yununi Deusũ xinãma hatu kupishanikiki. Hamẽ betsabũ Deusũ yunuti inũ hawẽ nemati unãbiakĩ txibãma txakabuwakubainaibu hawẽ yunuti inũ hawẽ nemati hãtxa xinãkĩ Deusũ haturi kupishanikiki.

¹³ Ha inũ, tsuabũra hawẽ hãtxa nĩka bestikĩ Deus benimawatirubumaki, hawa txibãmarã. Hakia tsuabũra hawẽ hãtxa yununi nĩkatã habias txibãkubaĩmisbu hatuwẽ benimakĩ hatũ txakabu ana xinãma Deusũ hatukiri pe xinãshanikiki.

^14-15 Tsuabura hatũ xinã txakabu wakatsi ikama Deusũ Moisés yusĩmani keska hatũ huĩti merã ha kene nea keskashũ hatu unãmaya txanima hawa hatũ xinã merã hawa txakabu hayabuma hatu unãmamiski, haska neatũ hatũ xinã ibubis txakabuaibu hatu ha akĩ inũ hatu nemakĩ unãmakinã. Haskawẽ taea judeubuma Deusũ Moisés yusĩmani kene hayamabia hatũ beyawẽ hawara txakabu unãmisbu inũ hawara pepa amisbu haska Deusũ Moisés yusĩmani unaĩ keskakĩ txibãmisburã, habu hatũmebi hatũ yunuti inũ hatũ nemati haya keskabuki.

¹⁶ Haskawẽ taea hanu bari hawẽ heneaitiã Deusũ Jesus Cristowẽ taeshũ haska judeubu inũ judeubuma hawara txakabu inũ pepa hune akubaĩmisbu dasibi hatu unãti wakĩ keyushanikiki. Na haska washanaikiri hawẽ kaka pepa hawẽ meketi Jesus Cristokiri ẽ hatuki txanikũkainaii.

Hawẽ yunuti inũ hawẽ nemati Deusũ Moisés judeubu yusĩmanikiaki, na hãtxarã

¹⁷ Mã judeubu kẽmis matu yuinũ nĩkakãwẽ. Txanima Deusũ matu katushũ hawẽ hãtxa Moisés matu kenemashuni haki txiti ika matũ Deuswẽ mã kẽmiski.

¹⁸ Hawara Deusũ abuai unãkĩ hawẽ hãtxa mã unaĩwẽ taeshũ haska hãtxã matu yusĩa tapĩkĩ mã pe katukubaĩtirubuki.

¹⁹ Hanushũ matunã, yura betsã huni bekũ iyumis keska wakĩ yura betsabũ Deuskiri unãriabuma yusĩkĩ mã hatu tapĩmatiru mã xinãriaii.

²⁰ Haska inũ, hawẽ yunuti inũ hawẽ nemati Deusũ Moisés yusĩni mã hayawẽ taeshũ dasibi hãtxa kayatapia unãkĩ habũ xinã benua inũ habu huĩti babubu mã hatu tapĩmatiruburi mã xinãriaii.

²¹ Hakia haskabia yura betsabu yusĩkĩ meshtãmabiai haskai matũmebi mã yusĩnanaĩsmamẽ? Haska inũ, yura betsabu yumetsukiri hatu yusĩkĩ txitebiai haskai ibubis hatu beparãtã mã yumetsuriamismẽ?

²² Haska inũ, hunibu hawẽ aĩmabe hau txutanameyamanũbũ, aĩbuaiburi hawẽ benemabe hau txutanameyamanũbũ, iwanã, nemakĩ hatu yusĩbiamis haskakĩ kanekĩ mã habiaskari akĩ txakabuwamismẽ? Haska inũ, yushĩ dami betsa kẽwãma mã danãhairabiamis dami itsa hawẽ kẽwãti templo anu mabu beabu mania yura betsã bitã hawẽ pei binũ itã inãnãnaĩ mã yumetsumiski.

²³ Haska wakĩ Deusũ yunuti inũ hawẽ nemati hãtxawẽ kẽbiai hawara Deusũ abuai akama ikũkaĩkĩ matũ xinã mã tapiskuamawẽ taeshũ yura betsabu Deuskiri mã hatu danãmamiski.

²⁴ Haska Deusũ hãtxa yuishunikatũ kenekĩ yuikĩ: “Mã haska hiwemiswẽ taea judeubuma Deuski meseama ẽ hẽ imakĩ mã hatu kashe paepawamaii”, haska keneni keska habias kanekĩ mã hatu amakubainaii.

²⁵ Haska inũ, dasibi hawara Deusũ Moisés judeubũ shenipabu hatu yusĩmani habũ txibãkĩ yuikĩ: “Hawara Deusũ abuai dasibi nũ txibãkubainaii”, ikĩ matũ hina kubitxi mã meshteairã, ha txanima mã pewaii. Hakia habũ matũ hina kubitxi meshtebiatã hawara Deusũ judeubũ shenipabu yusĩni habũ mã txibãma matũ hina kubitxi hamẽ meshtekeyabia mã hawenabu kayabimaki, mã hawẽ hãtxa txibãmawẽ taearã.

²⁶ Haska inũ, hawara Deusũ abuai judeubumã pe txibãkubaĩkĩ hawẽ yunuti haya keska habu hatũ hina kubitxi meshtekeumabia Deusunabu kayabi hatu wamiski, hina kubitxi meshtekeya keska wakinã.

²⁷ Haska inũ, hawara Deusũ yusĩni mã judeubu hayabiabũ ha nĩkabiakĩ txibãma mã kaneaibũ hanushũ judeubumã hatũ hina kubitxi meshtekeumabia Deusũ yusĩni haya keskakĩ hawara Deusũ abuai txibãkubaĩmisshũ matu binuhairatã matu habũ unãti washanikiki.

²⁸ Haska inũ, judeubũ beya txibaĩ hawẽ hiwekĩ habũ bakebu hatũ hina kubitxi meshte bestimisbu judeu kayabi itirubumaki, bemakis bestirã.

²⁹ Hakia judeubu kayabitunã, uke merã hawẽ xinãwẽ Deus txibãmisbuki. Deusũ Yushĩ Pepawẽ hatu kaya wakĩ pewakubaĩmiski, hawenabu kayabi wakinã, bemakis besti hawẽ yunuti txibãkĩ hatũ hina kubitxi meshtekea bestiwẽmarã. Tsuara haskaburã, Deusũ hatu uke merã unaĩkiki, bemakis hunibũ uĩaĩ keskamarã.