Romanos 16 - Kaxinawá Bíblia (BR)

Paulõ hawẽ haibuaibu anu hawẽ hãtxa hatu bumanikiaki, na hãtxarã

¹ Cencréia mae anushũ aĩbu dayarũ ha ikũwaĩbu merabewamis hawẽ kena Febe Roma anu kaya hakiri ẽ matu yuiaii,

² hikiai ikĩ haska Jesusunabu mã duawamis keska wakĩ Febe itã hamapai tibi hayama inãkĩ merabewashãkãwẽ, ea inũ nũ ikũwaĩbu betsa betsapabuwẽ nuikĩ nuku merabewakubaĩmis kaikikirã.

^3-4 Haska inũ, Priscila inũ hawẽ bene Áqüilã ebetã Jesus Cristokiri yusĩmisbu ẽ hatu xinãmiski. Yurabũ ea itxakawaibu habũ ea merabewai ea mawashũkeanibu inũ ewẽ taea haskanibu bestima nukube itxamisbu Israelbumari hatubetã nũ hatu kẽwãkubaĩmisbu Deusũ hau hatu duawanũ ẽ hãtxa ea hatu yuishũshãkãwẽ.

⁵ Ha inũ, habetã Jesus txibaĩ hatũ hiwe anu itxamisburi habiaskari ẽ hãtxa ea hatu yuishũriashãkãwẽ. Ha dikabi Ásia mai pakea anushũ ha dukũ Cristo ẽ ikũwãmani ẽ haibuhaira Epêneto ẽ hãtxa ea yuishũriashãkãwẽ.

⁶ Ha inũ, Mariã matu dayahairashũkũkainairi ẽ hãtxa ea yuishũriashãkãwẽ.

⁷ Ha inũ, enabu Andrônico inũ Júnia habube ea bitxiniburã, ẽ ikũwãriamakẽ habũ dukũ ikũwãnibũ haskawẽ taeshũ dasibi Jesus Cristõ kuxipaya yununikabũ hatu unãkĩ hatukiri xinãkĩ kẽwãmisburi ẽ hãtxa ea hatu yuishũshãkãwẽ.

⁸ Haska inũ, ẽ habetã ẽ Shanẽ Ibu dayashũmis ẽ haibuhaira habe ẽ abunamemis Amplíato Deusũ hau duawanũ ẽ hãtxa ea yuishũriashãkãwẽ.

⁹ Ha inũ, Urbanõ ebetã Jesus Cristo dayashũmis inũ ẽ haibuhaira Estáquis shũska ẽ hãtxa ea yuishũshãkãwẽ.

¹⁰ Ha inũ, Jesus Cristo dayashuni bika betsa betsapa mebiai txĩtuĩsma Apeles ẽ hãtxa ea yuishũriashãkãwẽ. Ha inũ, Aristóbulo hawenabube hiweabu haburi ẽ hãtxa ea hatu yuishũriashãkãwẽ.

¹¹ Ha inũ, enabu Herodião shũska ea yuishũriashãkãwẽ. Ha inũ, hawenabubetã Jesus txibaĩbu Narcisobe hiweabu ẽ hãtxari ea yuishũriashãkãwẽ.

¹² Ha inũ, ha aĩbu dabetã nukũ Shanẽ Ibu dayashũkubaĩmisbu Trifena inũ Trifosari ẽ hãtxari ea hatu yuishũshãkãwẽ. Ha inũ, aĩbu betsa nukũ haibuhaira Pérsidẽ nukũ Shanẽ Ibu dayashũkũkaĩmis ea yuishũriashãkãwẽ.

¹³ Ha inũ, Deus pehaira dayashũmis unã keyuaibu Rufo inũ hawẽ ewa ẽ ibu keskari ẽ hãtxa ea yuishũriashãkãwẽ.

¹⁴ Ha inũ, Asíncrito inũ, Flegonte inũ, Hermas inũ, Pátrobas inũ, Hermes inũ, Jesusunabu betsabu hatube itxamisbu Deusũ hau haturi duawanũ ẽ hãtxa ea hatu yuishũriashãkãwẽ.

¹⁵ Ha inũ, Filólogo inũ, Júlia inũ, huni betsa Nereu hawẽ puibe inũ, Olimpas inũ, Jesus txibaĩbu dasibibu hatube itxamisbu ẽ hãtxa ea hatu yuishũriakeakeshãkãwẽ.

¹⁶ Haska inũ, Jesus txibaĩbu dasibibu tibi hatuki nukutã hatu danãma yuka iki hatube ikukunãkubaĩshãkãwẽ. Haska inũ, na nenu hiweabu Jesus Cristo txibaĩbu itxati hiwe tibi anuabũ habũ hãtxari matu bumakanikiki, Deusũ hau matu dasibi duawakubainunã.

Roma anuabu Paulõ nĩkatã hatu kẽwãnikiaki, na hãtxarã

¹⁷ Ẽ betsabu inũ ẽ puibuũ, haskaibu mã uĩnũbũ ẽ matu yunuaii. Yusĩnã betsabũ habũ matu parãkĩ nũ haska matu yusĩmis betsa wakĩ matu xinã betsamakĩ matu pashkatirubuki. Uĩrakãwẽ. Haska nũ matu yusĩa mã nĩkamis keskamakẽ hatu danãkĩ hatũ yusĩa ana nĩkama ana hatube itxayamakubaĩkãwẽ.

¹⁸ Haska habu parananãkĩ nukũ Shanẽ Ibu dayashunaiburã, hamẽ ikanikiki. Haska habũ xinaĩ besti abukĩ hatũ hãtxa hawẽrua txẽshwẽ besti hatu hãtxa wakĩ yura betsabu Jesus Cristokiri kakape unãhairariama beparamekanikiki. Haskakẽ hatuki kemama jatu dũkekubaĩkãwẽ.

¹⁹ Eska matukiri dasibi pe txaniaibu ẽ matu nĩkamiski. Haska mã Deus dayashunairã, hawara Deusũ abuai unãtã mã amis inũ, hawara Deusũ danãkĩ abuama unãriakĩ mã xinã husiamakeakemis matũ xinã unaĩ ẽ matuwẽ dateama haska matukiri xinaĩ ẽ benimaii.

²⁰ Mã haskai hiweawẽ taeshũ nukũ Epa Deusũ nuku unãnuma hiwemamistũ matu merabewaya mã Satanás txitekĩ ha aka hawaira babutã matũ mae anua kaĩkaĩshanikiki. Mã haska waya nukũ Shanẽ Ibu Jesus Cristõ hawẽ pepawẽ hau matu unãnuma hiwemakubainũwẽ.

²¹ Ha inũ, Deusũ hau matu duawanũ Timóteo ebe dayamistũ hawẽ hãtxa matu yunuriaikiki. Enabu Lúcio inũ, Jasom inũ Sosípatrõ hatũ hãtxa matu yunuriakanikiki.

²² Ea Térciõ Paulõ hãtxa ẽ matu keneshunaitũ nukũ Shanẽ Ibu Jesus ẽ ikũwãriaiwẽ taeshũ ẽ hãtxari ẽ matu yunuriaii.

²³ Ha inũ, nenu Corinto anushũ ikũwaĩbu Gaiõ hiwe anu itxamisbu inũ hawẽ hiwe anu ea hiwematũ hawẽ hãtxa maturi yunuriaikiki. Ha inũ, na mae hirabi pei mekemis Erastõ hawẽ hãtxa matu yunuriaikiki, Jesusunabu Quartõ shũskatunã.

²⁴ Nukũ Shanẽ Ibu Jesus Cristõ matu merabewakĩ hau matu dasibi duawakubaĩshanũwẽ. Haskakirã.

Roma anushũ habũ Jesus ikũwaĩbukiri Deus kẽwãnikiaki, na hãtxarã

²⁵ Nukũ Epa Deusũ matu abukĩ hawẽ kakape Jesus Cristokiri datã akĩ ẽ yusĩmis mã ikũwãriaibuwẽ taeshũ Epa Deusũ matu txĩtũmatiruma ha kẽwanãkãwẽ. Mai hirabi damiwariama na haskakiri Deusũ nuku mekei kai bari itxapa hunekĩ tsuabura yaneri unãmama ibiakũkaini

²⁶ natiã ha hãtxa hakiri hatu kenemakĩ shabakabi wama ini haska Deus ikibi initũ yununi txanima natiã yurabu shukua tibibũ nĩkatã tapĩ keyutirubu wani ma nũ unaiĩ, hau Deusũ hãtxa ikũwãkĩ txibãshanũbunã.

²⁷ Deus ha besti unãnepahaira kẽwãkubainãkãwẽ, niti ikamarã, hawẽ bake Jesus Cristowẽ taeshunã. Haskakirã. Hatiski, ẽ hãtxarã. Paulo