Romanos 15 - Kaxinawá Bíblia (BR)

Matũmebi besti nuiama Jesus txibãkĩ betsabuwẽ nuikĩ hatu duawatikiaki, na hãtxarã

¹ Ikũwaĩ betsabu huĩti babuaibu haska Deusũ nuku hatu merabewamakubaĩkatsi ikaikiri matu yuinũ nĩkakãwẽ. Cristo habũ ikũwaĩbu huĩti babuaibu hau kuxiparianũbũ nũ ma nuku dukũ haska hayai nũ huĩti kuxipamis haska xinãkĩ hatukiri petxiama hatuwẽ nuikĩ hatu hakimama hatu merabewakubainãkãwẽ, nukũ besti haska nũ xinaĩ keska nũ iyamanũbunã.

² Ha inũ, nũ ikũwaĩ dasibibunã, nuku dapi hiwebaunabuwẽ nuikĩ hamapai tibiwẽ hatu merabewakĩ hatu ikũwãmariakubainãkãwẽ.

³ Eska xinãnãkãwẽ. Cristo hamebi haska ikatsis ikaikiri xinãkĩ katuama iniki. Hakia haska bebũkiri Deusũ hãtxa hakiri kenenibu menei ikũkainiki. Haska Deusũ hãtxa yuishunika Davĩ kenekĩ: “Epaã, mia danãkĩ ea itxakawabu ẽ mia tenehairashunaii”, ini keskakĩ Cristõ menekĩ teneniki.

⁴ Haska dasibi Deusũ hãtxa yuishunikatũ bebũkiri keneniburã, haska ha keneni tapĩkĩ xinaĩ nũ hawẽ hiwekubaĩshanũbũ nuku ashunibuki. Haskawẽ taea ha Deusũ hãtxa uĩkĩ tapĩ nũ txĩtuãma nuku merabewaya hawẽ taea benimai nũ hiweibi hiweshanai nuku manakamaikiki.

⁵ Haskakẽ Deus matuwẽ nuikĩ matu merabewaya haska matu hiwemakatsis ikai hawẽ nui pepa hau matu uĩmakubainũwẽ, haska Jesus Cristo hiweni keska matu txibãmakinã.

⁶ Deusũ matu haska waya maturi dasibibu merabenamekĩ nukũ Shanẽ Ibu Jesus Cristõ Epa Deus dasibibũ habiaskas xinãkĩ hau kẽwãriakubainũbũwẽ.

Israelbuma hawenabu Deusũ hatu wakatsis inikiaki, na hãtxarã

⁷ Hanushũ haska Cristõ matu haibu wani keska wakĩ ikũwaĩ betsabube haibunamekĩ hatu beyawakubaĩkãwẽ, haskai mã pekũkainaya hau dasibibũ Deus kẽwãkubainũbunã.

⁸ Haska bebũkiri nukũ shenipabu Deusũ yubaniwẽ taea haska Deus txani txakaisma haska yubai hãtxani haska xarabu Deus yubakani menei Cristo nũ Israelbu anu tashniniki, duawakĩ nuku merabewanũ ikarã.

⁹ Haska nukukiri bestima mã Israelbumawẽri taea Cristo tashnirianiki. Haskakiraniwẽ taeshũ mã Israelbumã Deus duapahaira mã kẽwãriakubaĩtirubuki. Haska bebũkiri Deusũ hãtxa yuishunika Davi hariri nawai kenekĩ: “Haskawẽ taeshũ nawa shukua betsa tibibũ mia kẽwaĩbũ hatubetã mia xinãkĩ kẽwãkĩ hui kuxipawẽ nawati pepawẽ ẽ mia kẽwãkubaĩshanaii”, iyamakẽ

¹⁰ ana hawẽ hãtxa yuishunika betsa anu Moisés yuikĩ: “Nawa shukua tibibuũ, Deusũ Israelbu katunibe hatube benimakubaĩshãkãwẽ”, iyamakẽ

¹¹ ana betsãri yuikĩ: “Nawa shukua tibi mã manibaunabuũ, nukũ merabenã hiweibi hiwea kẽwãkubaĩshãkãwẽ”, iyamakẽ

¹² haskakiriri Isaíasĩ yuikĩ: “Davĩ epa Jessẽ baba kaĩtã nawa shukua tibibu mekei hatũ shanẽ ibuaya hawẽ taea haburi Deusunabui haki txiti ikĩ manashãkanikiki”, iniki.

¹³ Haska hakiri kenenibu keska wakĩ mã Jesus ikũwaĩbu Deusũ hawẽ Yushĩ Pepatũ kuxipawẽ unãnuma matu hiwemakĩ benimawaya hawa txikixama hawẽ matu duawashanai pepa manakakubaĩkãwẽ.

Jesusũ kuxipa haya Paulo dayanikiaki, na hãtxarã

¹⁴ Ẽ betsabu inũ ẽ puibuũ, yura betsabuwẽ nuikĩ mã hatu merabewamis inũ, Deusũ yusĩa mã unãhairai inũ, matubetã ikũwaĩ betsabube mã pe yusĩnanãmis ẽ hawa txakabu matukiri yuitiruma ẽ unaiĩ.

¹⁵ Hakia matu keneshũ bumakinã, txanima kayabi hawara hawẽ yusĩa betsa kanei mã hakimayamanũbũ, iwanã, matu ana xinãmanũ, iwanã, ẽ hãtxa kuxipawẽ keneshũkĩ ẽ matu yuiaii. Haska Deusũ ea duawakĩ hawẽ kakape yuishunika ea yunukĩ

¹⁶ mã Israelbumã hawama mã Jesus Cristo ikũwãshanũbũ ea hawẽ kẽwãnika betsa Deusũ ea nitxĩkĩ hawẽ kakape hawẽ bake Jesuskiri ẽ matu yusĩbaunũ mã Israelbuma anu ea yununiki. Haskawẽ taea mã Israelbumari Deusũ Yushĩ Pepatũ matu meribi wa hawa txakabuma inãkuĩ pepa keska Deus bebũ matu nitxĩtã Deus ẽ matu uĩmakatsis ikaii.

¹⁷ Haskakẽ Jesus Cristõ daya ẽ bini ẽ ashũmiswẽ taea haska Deusũ ea yununi txĩtuãma ẽ akubaĩmiswẽ taea txani txakama ẽ kẽtiruki.

¹⁸ Haska kakape bui ea hãtxairã, hamapai xarabukiri ẽ hãtxai kaismaki. Cristokiri besti mã Israelbumã mã Deus txibanũbũ matu yusĩ ẽ kamiski. Haska hatu yusĩ taewakinã, hãtxa bestiwẽma hatu ashũkĩ uĩmakĩ

¹⁹ Deusũ Yushĩ Pepatũ kuxipawẽ hawara atimaska yurabũ atirubuma dami betsa betsapa haskabiamawakĩ ea wama ẽ akeakeaya hawẽ taea kuxipakĩ kakape Jesus Cristokiri hatu yusĩkinã, haska Israelbuma betsa betsapaburi ẽ hatu txibãmakubainima besti ẽ matu yuiaii. Hanushũ taewakinã, Jerusalém mae anushũ ẽ taewaxina mae tibi iake iaketãkaini hari mai pakea betsa Ilírico anu ẽ txĩtũtãyamaki.

²⁰ Hatu yusĩ kairã, hanushũ tsuã Jesus Cristokiri hatu yusĩriabumanu besti ẽ kakũkaũkatsis imiski, hanushũ Jesus Cristokiri kakape yusĩnã betsã ma hatu yusĩma anu naxui iki kamarã.

²¹ Deusũ kakape Jesus Cristokiri mã nĩkashanaibukiri Deusũ hãtxa yuishunika Isaíasĩ kenekĩ: “Nukũ mekenãkiri tsuã hatu banabimariabumanushũ haska xinaĩsbuma damas nĩkashãkanikiki. Ha inũ, habũ hakiri hawa nĩkariabumã tapĩriashãkanikiki”, ini keskai ẽ ikũkainaii.

Roma anu Paulo hatuki bai kakatsi hatu banabimanikiaki, na hãtxarã

²² Haska matukiri bai kanũ ika hawẽtxaĩs ẽ xinãbiakubaini haska Deusũ ea amai aki yusĩkubauni matu anu ẽ kariamaki.

²³ Hakia bari betsatiã haska ẽ xinãyama mae tibi anushũ ma ẽ hatu yusĩ keyuawẽ taea natiã ana ẽ matukiri xinaiĩ,

²⁴ samama ẽ matu uĩ kakatsis ikairã. Hari kairã, Espanha mai pakea anu kakatsi mã Roma anuabu hanu dukũ matube uĩnanaĩ benimatã habianua eskarabes matube merabenãtã hanua unuri ẽ kaya matũri matũ hawarawẽ mã ea merabewa Espanha anu ẽ katiru ẽ xinaiĩ.

²⁵ Hakia natianã, Jesus ikũwaĩbu Jerusalém anuabu hatu merabewakĩ hatu pei itxawashũxinabu hatu bushuĩ ẽ kayuaii,

²⁶ eska hatu washũxinabu ẽ hatu bushuainã. Habubetã nũ Jesus ikũwaĩbu Macedônia mai pakea anushũ inũ Acaia mai pakea anushũ hatu merabewakatsis ikĩ hatukiri yubakatã hatũ pei itxawatã Jesus Cristo ikũwaĩbu nuitapaibu Jerusalém anuabu inãkĩ habũ ea yunuxinabu ẽ hatu bushũyukatsis ikaii.

²⁷ Ha inũ, haska hatukiri xinã pewatã txanima hatu ashũxinabuki. Eska xinãkinã, hawara hawẽ katuabu Israelbu Deusũ hatu yubani hatu inãkĩ Israelbumari inãkubainaiwẽ taeshũ Israelbumã hawara pepa Israelbu hatube manakunãkĩ Macedônia anuabu inũ Acaia anuabũ habuã habu mabuyabũ hatũ hamapai biti pei yauxiabuma pashkashũ Jerusalém anu nuitapaibu duawakĩ hatu inãkatsi hatu manakamabuki.

²⁸ Haskakẽ hatũ pei itxawaimabu ha dukũ Jerusalém anuabu ẽ hatu pei bumayuaii. Haska wakĩ hatu pewashũtã hanua Espanha anu hatu yusĩ kai matu daĩbaini ẽ matuki bayushanaii.

²⁹ Txanima ẽ haska xinaĩ keska ẽ matuki nukuayarã, haska Jesus Cristõ hawẽ duapawẽ nuku duawamiswẽ ẽ matube benimakatsis ikaii.

³⁰ Ẽ betsabu inũ ẽ puibuũ, nukũ Shanẽ Ibu Jesus Cristowẽ ha Deusũ Yushĩ Pepã betsabuwẽ nuiti nuku inãmis haskawẽ taea mã ea hakimayamanũ ẽ matu ea akaii, ẽ daya bikakiri mã ea Deus yukashũkubainũbunã.

³¹ Haska inũ, habũ Deus danaĩbu Judéia mai pakea anuabũ hau ea meyamakubaĩshanũbũ ea yukashũkĩ Jesus Cristo ikũwaĩbu Jerusalém anushũ hau ha pei hatu itxawashuĩmabu danãriayamashanũbũ Deus hatu yukashuĩrashãkãwẽ.

³² Haska Deusũ ea yunuaya matu anu kai hikitã hanua benimai ẽ huĩrukũyushanũ haskakiri Deus ea yukariashũshãkãwẽ.

³³ Deusũ hau matu unãnuma hiwemanũ haska ẽ matukiri xinaiĩ, haskakirã.