Romanos 13 - Kaxinawá Bíblia (BR)

Matũ governo shanẽ ibuburã, Deusũ katumiskẽ nĩkakubaĩtikiaki, na hãtxarã

¹ Ẽ betsabu inũ ẽ puibuũ, unãnuma nũ hiwenũbũ haska huni kuxipabu matũ shanẽ ibubu mã nĩkakubainũbũ matu yusĩnũ nĩkakãwẽ. Haska Deusũ amis habũ unãbumabiakẽ dasibi shanẽ ibu betsa betsapa mai anua katushũ Deusũ hawẽ kuxipawẽ hatu yunukĩ mistukubaĩmiski. Haskawẽ taeshũ hatũ yusĩa txibãkĩ hatũ yunuti inũ hatũ nemati dasibibũ nĩkakĩ hau txibãkubainũbũwẽ.

² Ha inũ, Deusũ hawẽ xinãnẽ tsuara katukĩ kuxipa wakĩ yunukĩ hatu shanẽ ibu wabiakẽ tsuabũra habũ hatũ shanẽ ibu yunua danãkĩ txibãkatsi ikabumawẽ taeshũ hatũ shanẽ ibũ hatu kupimashanikiki.

³ Hanua yura kuxipabu matũ shanẽ ibubu Deusũ hatu warã, hau habu mã pepaibu hawẽ matu datekĩ mesewati akamaki. Hakia habũ txakabu akĩ habũ hãtxa txibãbuma haskaibuwẽ taeshũ nemakĩ hatu habu kupikatsi amiski. Haskawẽ taea mã dateyabi hiwekatsi ikamarã, hatũ yunuti inũ hatũ nemati hãtxa nĩkai pe hiwekĩ txibãkubaĩkãwẽ. Hanushũ shanẽ ibũ txanima mã hawa txakabuma unãkĩ hawa txakabu matukiri xinãtirubumaki.

⁴ Haska inũ, mã txakabukubainaibũ matũ xinã mã betsa wanũbũ yurabu Deusũ hatu katua matũ txakabuwẽ habuã Deus matu kupishũshanai unaĩ governõ hatu yunuaibuki mesei hatuki datekãwẽ. Hamẽ ikabumaki. Haska kenu txaipa sawea mapuaburã, hatũ dau bestimaki. Hakia txakabuaibu hatuki tanarã, kashemaki, habũ txakabuaiburã.

⁵ Ha inũ, hau Deusũ matu kupiyamashanũ, iwanã, matũ governo shanẽ ibubu Deusũ matu txibãmakatsis ikaiwẽ taeshũ hatu kuxipa wakĩ matũ shanẽ ibu wa habũ yunuti inũ hatũ nemati nĩkatã mã txibaĩnã, matu kupiai nemati bestimaki. Hakia haska Deusũ abuai akaibu nĩkakĩ mã xinãtirubuki.

⁶ Ha inũ, matũ governo shanẽ ibu Deusũ katuatũ matu mekekĩ Deus dayashunaibuwẽ taeshũ matũ shanẽ ibubũ hawẽ merabewati pei hawara matũ daya pei mã biai matu yukaibu shabakabi inãkĩ hatu pakakubaĩkãwẽ, yura dasibibũ pei itxawashũ hatũmebi hatũ hawara hamapai biti pei bishũ arutã pei teshewẽ hau yura dasibibu merabewakubainũbunã.

⁷ Ha inũ, haska tibi governo shanẽ ibũ daya haya tibi ashũkubaĩkãwẽ. Hawẽ merabewati pei hawara mabu bikĩ inũ mae betsa anu piskumakĩ shanẽ ibu hau imposto pakanũbũwẽ. Shanẽ ibu duawai hau haki mesenũbũwẽ. Ha inũ, shanẽ ibubukiri xinã txakama xinã pewakubaĩkãwẽ.

Duapai inũ nuikipatikiaki, na hãtxarã

⁸ Haska inũ, yura betsabu devetã hawaira hatu paka keyukubaĩkãwẽ. Haska keskari xinãkãwẽ. Matube hiweabuwẽ nui merabenaĩ mã hatu devea inaĩ keskai duanamekubaĩkãwẽ. Haska wakĩ hatukiri haska xinãkĩ ha Deusũ yununi txibãkĩ matũ akĩ menekĩ ma kaneamaki.

⁹ Haska inũ, yura betsawẽ nuikĩ hatu merabewakĩ Deusũ yunuti inũ hawẽ nemati dasibi mã txibãriakubainaii. Eskaki, matu yusĩnũ nĩkairakãwẽ. Deusũ hawẽ nemati yuikĩ: “Huni aĩyãbia aĩbu betsabe txutanametimaki. Aĩbu beneyabia huni betsabe txutanametimariki. Mimebi pubẽkĩ yura betsa kupikĩ tenãtimaki. Tsuãra hamapai yumetsutimaki. Tsuara hamapai mabu hawẽrua haya kemutapa betxitã hawẽ kemutaskayamashãkãwẽ”. Ana hãtxa huneama shabakabi uĩmatirã, Deusũ yunuti binu keyuarã, eska yuiniki: “Mimebi nui mĩ mekeai keskakĩ yura betsa mibe hiweawẽ nuikĩ mekekĩ hatu xinaĩrakubaĩkãwẽ”, aniki, Moisésnã.

¹⁰ Haskakẽ tsuabura hatube hiweabuwẽ nuimisrã, haburã, hawa txakabuma hatuwẽ nuikĩ dasibi Deusũ yunuti inũ hawẽ nemati txibãkubaĩkanikiki, hawa kaneamarã.

Jesus ma hua kemahairakiaki, na hãtxarã

¹¹ Haska inũ, Jesus Cristo txibãkĩ taewakĩ Deusbe nũ hiweshanai hawẽ hãtxa nĩkakĩ nũ unãnirã, ma ana txaima kemaiwẽ taea ana hatishuĩra haki txikixama yura betsa betsapabuwẽ nuikĩ hawara Deusũ abuai menã hawaira tapĩ hawẽ mekerikãwẽ, uatiã nũ hiwexina keska haskas xinãmarã.

¹² Haska inũ, ana bari itxapama mai anu nũ hiweyuaiwẽ taea hamapai txakabu ewakainaya menã bestẽtã xinãrikãwẽ. Nai anu Deusbe nũ hiweshanai ma kemaiwẽ taeshũ txakabu henerikãwẽ. Eska keskakinã, soldadobu tsakanamẽnũ ika hawẽ mane tari kuxipa sawemis keskakĩ Deusũ kuxipa bitã hawa dateama Satanás nemakubainãkãwẽ.

¹³ Haska inũ, hawara txakabu hune ana akama nukũ hiwea shabakabi hatu uĩmai pe besti hiwenãkãwẽ, eska tibi ana akamarã, piti pepa kemutapa itxawatã pitxakayamamarã. Haska inũ, ana paẽyamanãkãwẽ. Kemui ana txutanamebaũyamanãkãwẽ. Hamapai txakabu abui kemui hawẽtxaĩs hakiribis ayamakubainãkãwẽ. Ha inũ, hawarakiri ana txitenamei ha iyamanãkãwẽ. Ha inũ, hawara yura betsa haya uĩ haki sinayamariakubainãkãwẽ.

¹⁴ Ana haska txakabu tibi xinãkĩ akama nukũ Shanẽ Ibu Jesus Cristoki dasitã hawẽ kuxipawẽ kuxipakĩ hawẽ bai kayatapia besti txibãkubainãkãwẽ, txakabuwẽ besti pepamarã.