Romanos 10 - Kaxinawá Bíblia (BR)

Israelbu Deusũ hatu katubiani hawẽ kakape txibãma inibukiaki, na hãtxarã

¹ Haska inũ, ẽ betsabu inũ ẽ puibuũ, enabu Israelbu hatukiri eã xinaĩ habuwẽ nuikĩ Deus ẽ hatu yukashũkubaĩmiski, hau Deusũ kupiti mese binukĩ Jesus Cristo txibãkĩ ikũwaĩbu hau Deusũ hatu mekeshanunã.

² Israelbũ Deus duawakĩ dayashũkatsi imisbuwẽ taeshũ ẽ hatu kẽwãtiruki. Hakia haskai pepabiai hawẽ hãtxa kayabi unãkĩ txibãma kanemisbu eã ẽ unaiĩ.

³ Hakia haska Deusũ nuku pepawamis ha txibãkĩ ikũwãma hatũ xinã besti txibaĩ keĩ ibubis pepai beparamei shabakabi kẽmisbuki, Deusũ besti tsuara ma pewashũ hakiri pe besti yuitiru unãmarã.

⁴ Haska inũ, hawẽ yunuti inũ hawẽ nemati hãtxa besti txibãkĩ Deus benimawapaibiabu nuku dasibibũ nũ atirumakẽ ha yusĩni Cristoki hikia hatũ shabakabi betsa wakĩ nukũ txakabu buai mawakĩ ha yununi ana hawẽ hiwetima wakĩ Cristo besti nũ ha ikũwaĩbu hau Deusũ nuku pepawashanũ Deus benimawai Cristo nuku ishuniki, Deusũ hãtxa Moisés hatu yusĩni txibaĩ ibubis pepai ana nũ haskayamashanũbunã.

⁵ Hakia haska Deusũ yunuti inũ hawẽ nemati txibaĩ pepawẽ hiwetirubukiri Moisés yusĩkĩ: “Tsuabũra hawara Deusũ yusĩni txibãkubaĩkĩ kaneama Deus benimawai hawẽ yusĩawẽ taea hiweshãkanikiki”, iwanã, hatu keneshuniki.

⁶ Haskakẽ tsuabũra xinã betsa washũ Jesus ikũwãkatsis ikĩ yuikĩ: “Nai anu mapeketã hau nuku mekeyunũ Messias Cristo hauria nekeriri butekĩ i bunãkãwẽ”, iwanã, hau haska xinãkĩ yuiyamakubainũbũwẽ.

⁷ Haska inũ, betsarã, betsãri xinã betsawẽ yuikĩ: “Hanu mawabu bumisbu anu kashũ hau nuku mekeyunũ Cristo neriri mawabu anua shabakã tashnimai bunãkãwẽ”, iwanã, hau haska xinãkĩ yuiyamarianũbũwẽ.

⁸ Hakia haska Deusũ hãtxa nũ txibãtirukiri hawẽ hãtxa yuishunikatũ yuikĩ: “Deusũ yusĩa mã hayaki, matũ huĩti merã mã hakiri xinãmis inũ, matũ keshawẽ hakiri mã hãtxamisrã”, iniki. Habias kaka nukũri yusĩ nũ hawẽ hãtxariakũkainaii.

⁹ Haskakẽ hawara hawẽ bakekiri hawẽ hãtxa yuishunika Deusũ nuku kenemashuni haratubũra txibãkĩ shabakabi dateama yuikĩ: “Jesus Cristo ẽ Shanẽ Ibuki”, iwanã, haska Jesus mawa Deusũ ana bestẽwani ikũ kayabi waibu hawenabu watã niti akama Deusũ habu matu mekekubaĩshanikiki, hiwekuĩmakinã.

¹⁰ Hanushũ Jesus txibãkĩ matũ huĩti merã ikũwãkĩ xinaĩ Deusũ matu ma pepawaya dateama haska shabakabi tashnimakĩ yuikĩ: “Txanima kayabi Jesus Cristõ ẽ txakabu buaniwẽ taea ẽ Shanẽ Ibuki”, ikaibu Deusũ matu hawenabu wakĩ niti akama habe matu hiwemariashanikiki.

¹¹ Haska inũ, Deusũ hãtxa yuishunika Isaísĩ kenekĩ: “Tsuabũra Messiasĩ hãtxa ikũwãkĩ txibaĩbu ẽ hatu hawa dake wama ishanaii”, aniwẽ taeshũ

¹² judeubu inũ judeubumarã, tsuabũra Messias ikũwaĩ nukũ txakabu hatũ nuku buashũkĩ betsa tibiwẽ nuku ashuĩsmaki. Habias Shanẽ Ibu Deusũ hatũ dasibi meke keyua inãnanã txakaisma kẽwãkĩ mã ea akubainaibu hawa yauxiama matu duawakĩ inãkubaĩmiski.

¹³ Ha inũ, Deusũ hãtxa yuishunika Joelĩ haskakiriri yuikĩ: “Haratubũra hawẽ mekenika ikũwãkĩ ea akĩ: ‘Yavé Deusuũ, ẽ txakabu buatã mina ea wawe, mekekinã’ ”, ikaibu Deusũ danãma hatu mekekubaĩshanikiki.

¹⁴ Haskakẽkaĩ hau Deusũ hatu mekekubainũ habũ Cristo ikũwãriabumanã, haskatã Cristo ea atirubumaki. Ha inũ, tsuabũra Cristokiri yusĩabu hawa nĩkariabumã hawẽ kakape ikũwãtirubumariki. Ha inũ, hatu yusĩriabumanushũ Cristokiri hawa tapĩtirubumariki.

¹⁵ Ha inũ, Deusũ hãtxa yusĩnãbu habu anu Deusũ hatu yunuama kakape Cristokiri hatu yusĩtirubumaki. Haskakẽ Deus yuishũkĩ hawẽ hãtxa yuishunikatũ haskakiri kenekĩ: “Deusũ kakape yusĩmisbu hikixĩshũ Deusũ kakape hatu yusĩaĩ nĩkai ha huxiãwẽ taea benimai xinã txãkãshãkanikiki”, iniki.

¹⁶ Haskabianikẽ Isaíasĩ yuikĩ: “Shanẽ Ibu Yavé Hiweatuũ, mirimabu mikiri nũ hatu yusĩa nukũ hãtxa nĩkatã danãkanikiki”, itã keneni keskai nukũri mirimabu Deusũ kakape Cristokiri nũ hatu yusĩa nĩkabiakĩ ikũwãbumariki.

¹⁷ Haskakiri Deusũ hãtxa yusĩmisbũ Jesus Cristokiri kakape yusĩkubainaibu besti hãtxa pepa hawẽrua nĩka pewatã yurabũ Cristo txibãkĩ ikũwãtirubuki, hatũ hãtxawenã.

¹⁸ Hawara Deusũ hãtxa yuishunika Davĩ kenekĩ yusĩni matu ana yusĩnũ nĩkakãwẽ. “Yurabu mai hirabi anu manibaunabu Deusũ hãtxa yusĩmisbũ habũ hatu yusĩa ma habũ nĩka keyuabuki”, iniwẽ taeshũ Israelbũ dasibi ma nĩkakĩ keyunibu nũ unaiĩ.

¹⁹ Haska inũ, emebi ana yuka iki Israelbumã Messias txibãkĩ Israelbu binushanaikiri kenekĩ Moisés Deusũ hãtxa ha dukũ yuikĩ: “Israelbuma habu enabuma ibianibũ matũ Messias ikũwãkĩ txibaĩ ma enabuwẽ taea mã hatuwẽ kemushanaii. Hakia matu Israelbu mã enabu ibiani matu habuwẽ kemumakĩ habu unaĩsmapakiri mã xinãbiamiskẽ ẽ matu haki sinatamashanaii”, iniki.

²⁰ Hanua bari itxapa kakẽ hãtxa kuxipawẽ yura betsabukiri Deusũ Isaías yuimakĩ: “Tsuabũra ea benabuma haska ẽ hatuwẽ nuimis hatu shabakabi ẽ uĩmaya habũ ea ikũwãshãkanikiki. Habũ ea benamabia eki nukushãkanikiki. Ekiri hawa yuka ikabumabiakẽ ẽ kuxipa ẽ hatu uĩmashanaii”, iwanã,

²¹ Israelbukiri yuimakĩ: “Huĩti kuxitã hatũ besuwẽ dakeama ea nĩkaisbumawẽ nuikĩ ẽ hatu merabewapaibia ea nĩkabumaki”, aka keneniki.