Miquéias 7 - Kaxinawá Bíblia (BR)

Israelĩ enabu hatũ txakabukiri ana hatu yuinikiaki, na hãtxarã

¹ Bimi ma tseka keyuabu uva bimi batapa inũ figo bimi batapa pinũ, iwanã, benakĩ ẽ hawa betxiama ẽ peirawa! ẽ ikai keskari.

² Habiaska keskariai mai hirabi anu huni pepabu inũ nuikipabũ Deus txibaĩbu eãri ẽ betxiamariki, tsua ana hayamakenã. Hakia pubeĩ detename bestikĩ txakabuwanũ ishũ dasibibu manakanãkanikiki. Betsabu tibibe txakabunũ ika biruã keska maniabuki, manakanainã.

³ Hatũ shanẽ ibubunã, eska hatu wakanikiki. Hatu dayashunũ, iwanã, shanẽ ibu beshmasbũ pei hatu yukakĩ hawena wakubainaibũ shanẽ ibu betsa unãti wanikabũ hune hatu pewakĩ pei bikĩ hatũ txakabuwẽ hatu kupisbumaki. Kushipabũ haska akatsis ikai akubaĩkĩ, maewã hirabi atimapa wakĩ hau txakabu bestinũbũ yusĩkubaĩmisbuki.

⁴ Tsuabura: “Habu pepabuki”, abiaiburã, hi musha keska txakabubuki, meserã. Tsuabura: “Habu nuikipabuki”, abiaiburã, mae musha keska txakabuburiki, meseburã. Hakia haska Deusũ tsuma txaninikabũ ma hatu banabimayama ha shabatiã hatu kupishanai ma huikiki, hatubetã txakabu inũ pepa pewairã. Hatiãra itimaska txakayamakubainaibũ

^5-6 huni bakebũ hatũ ibu hunibũ hãtxa danãkĩ ana hawa hatu duawabumakẽ aĩbu bakebũri hatũ ewã hãtxa danaĩ ana hawa peabumakẽ hawẽ babawãbũri hatũ yayã hãtxa ana nĩkakatsi ikabuma hawenabu kayabibe dasibi sinatanameshãkanikiki. Haskawẽ taea matu dapi hiweabũ hãtxa ikũwãyamashãkãwẽ. Mĩ haibũ mia hawara shinãshunai nĩkatã haki txiti iyamashãkãwẽ. Ha dikabi mĩ aĩbe mĩ hãtxabiairã, uĩrawe.

⁷ Hakia merabe ẽ yuka ea nĩkashanaiwẽ taeshũ ea hatũ piskumashanai Senhor Deus manakakĩ Deus besti huai ẽ manakubaĩshanaii.

Senhor Deusũ Israel merabewashanikiaki, na hãtxarã

⁸ Eki sinataibu Israel anuabuũ, ẽ txakabuwẽ taea ibubis ẽ bika teneai uĩ ewẽ benimayamakãwẽ. Ẽ di ibiaima ẽ ana benikauãshanaii, txakabu meshu keskatũ ea atxibiabaũkẽ Senhor Deus ẽ shaba keska ẽ mekenã txashakapaki.

⁹ Kanekĩ txakabu wakĩ Senhor Deus ẽ pashkaima eki sinataya: “Enaki”, ishũ hawẽ sinata ẽ teneshũkubaĩshanaii. Ẽ haska wakubaĩmis unãti watã ea pepa wakĩ Senhor Deusũ ea hatu kupishũshanai ariamakẽ hĩ hĩ ikama ẽ manayukubainaii. Hatu maemakĩ ea uĩmakĩ hawẽ kushipa shabakabi Senhor Deusũ ẽ txakabu unãti wakĩ ea unãmashanikiki, bĩ dekua keska anu ea iyukinã.

¹⁰ Eki sinataibũ ea bika wakĩ yukakĩ: “Mĩ Mekenika Senhor Deusrã, hanimẽ? Huama daka? mia merabewairã”, ea akubainimabũ Senhor Deusũ hatu maemai uĩriashãkanikiki, haska hãtxa txakabu kaĩkaĩkĩ hatu dakewarã. Baiwẽ kakĩ pupus pema pema aka keska wakĩ hatu kupiaya hatu haska wai uĩ ẽ shinã txãkãshanaii.

Jerusalém ana benikĩ bena washãkanikiaki, na hãtxarã

¹¹ Jerusalém anu hiweabuũ, matũ mishki kenebaunibu di abianibu matũ mae benawakĩ ana matũ mai pakea shekakĩ ewapa wai ma matu ana ashuĩ bekanikiki. Shinaĩrakubaĩkãwẽ.

^12-13 Hanushũ hatunabu hiweshũ txakabuwakubainibuwẽ taea ha mai betsai hanu tsua hiweabuma keskai txakabuaya Assíria mai pakea anua inũ, Egito mai pakea anua inũ, Hene Nilo anua inũ, Hene Eufrates anu hiwebauni nati ikabu inũ, ianẽwã ukebukũ hiwebaunabu inũ, mati matipa anu hiwebaunabu habu dasibibũ matu betxipai hanu matu anu beshãkanikiki.

Miquéiasĩ hawenabu Israelbu merabewakĩ Deus hatu yukashunikiaki, na hãtxarã

¹⁴ Mai pepa kesua anu hi shukua anu txashuwã huĩrukũmisbu keskai minabu hau tari hiwekubaĩshanũbũ mĩ aniki. Senhor Deusuũ, ha minaburã, hatu mekeshũ uĩrakubaĩshãwẽ. Mae Basã inũ mae Gileade anu basi pepa anu hatũ shenipabu mĩ hatu iyuni keska wakĩ pepas anu hatu ana iyushãwẽ.

¹⁵ Egito anua nukũ shenipabu hatu tashnimabirãkĩ dami atimaska mĩ hatu ashuni keska wakĩ ana hatu uĩmakubaĩshãwẽ.

¹⁶ Nawa betsa betsapabu: “Ẽ kushipaki”, ibiamisbu hau mĩ kushipa uĩ dakekubainũbũ haska mĩ hatu ashuni habias dami atimaska akĩ hatu uĩmariashãwẽ, hau huyu inũ pata keska mapushũ uinũbunã.

¹⁷ Dunu inũ nisheke mai bemaki sharabaĩmisbu keska datei saki saki iki hatũ mae mishki kenebaunibu kushipa anua hau tashnibirãshanũbũwẽ. Datehairakĩ merabewati mia yukai mia bebũ bushãkanikiki.

Hawenabuwẽ Senhor Deus nuikĩ hatũ txakabu hatu buashũkubaĩmiskiaki, na hãtxarã

¹⁸ Nukũ mekenika Senhor Deusuũ, minabu eskarabes tesheniwẽ nuikĩ mĩ hãtxa danãkĩ nũ txakabuwaima tere akĩ mĩ ana shinaĩsmawẽ taea Mekenika Yushĩ mia keska betsa tsua hayamaki. Nukuki sinatapakeama maĩtã haska mĩ nuku betxipaiai mĩ nuku uĩmamiski, nuku duawakubaĩkinã.

¹⁹ Nukũ txakabu maiwakĩ inũ ianẽwã merã pukua keska watã nuku heneama nukuwẽ ana nuikũkaĩshãwẽ.

²⁰ Haska nukũ shenipabu Abraão inũ Jacóbe mĩ yubakani keska wakĩ, Senhor Deusuũ, merabewakĩ nukuwẽ nuikĩ mĩ yubakani hãtxa nuku hakimawayamakubaĩshãwẽ.