Miquéias 6 - Kaxinawá Bíblia (BR)

Senhor Deusũ Israelbu ana hatu ha anikiaki, na hãtxarã

¹ Eska Senhor Deusũ matu yuikiki. Nĩkakãwẽ. “Benitã mati keyatapatũ matu nĩkatiru keska shinãkĩ mã hawa txakabu hayamakiri hatu yuikĩ mati yurabu keska shinãkĩ matũ hui hatu nĩkamakãwẽ.

² Mishkipawã anu hanu mati tsaua anu mati tibibuũ, nĩkakãwẽ. Senhor Deusũ hawenabu pewakĩ hatu ha akikiki. Israelĩ enabu txakabubu hatu unãmai nĩkakubaĩkãwẽ”, itã

³ ana Senhor Deusũ matu yuikĩ: “Enabuũ, hawa ẽ matu txakabuwaimamẽ? Hawawẽ ẽ matu bika tenemaimamẽ? Ea yuikãwẽ!

⁴ Egito nawabũ hatu itxakawaibu hatu dayama txakayamai nemakĩ Egito mai pakea anua hau habũ hatu iyukubainũbũ Moisés inũ hawẽ betsa Arão inũ hawẽ pui Miriã eã ẽ hatu yunua matũ shenipabu hatu iyumakĩ eã ẽ hatu tashnimabiraniki.

⁵ Enabuũ, natiã ekiri haska shinãkubaĩkãwẽ. Matũ shenipabu bukubainaibu yupunũ ika haska Moabe nawabu shanẽ ibuhaira Balaque yubakabiaya haska Beorĩ huni bake Deusũ hãtxa yuishunika Balaãonẽ Balaque nema matũ shenipabu yupuama iniki. Ha dikabi betsa eska shinãkãwẽ. Sitim anua matũ shenipabu kaĩbirani Hene Jordão pukebirani Gilgal anu hiki bukĩ ea ẽ Senhor Deus hau ea unanũbũ ẽ hatu merabewakĩ binumani haska ana shinãkĩ tapĩkãwẽ”, akĩ matu yuikiki.

Hau haskai yurabu hiwenũbũ Senhor Deusũ shinaĩ Miquéiasĩ hatu yuinikiaki, na hãtxarã

⁶ Senhor Deus daewanũ ishũ eska mã shinãmisbuki. Daewakĩ Senhor Deus manaũri hiwea kẽwãkĩ hawa pepa ẽ inãkuĩtirumẽ? Ina awa bene ano bestitxaiya tesẽtã hawẽ nami inũ hawẽ sheni Senhor Deus kẽwãkĩ hau ea kuashunũbũ, iwanã, nukunabu Deusbe hãtxashunikabu yunukĩ ẽ daewatirumẽ? ishũ mã haska shinãmismẽ?

⁷ Hanushũ benimawakĩ 1.000 txashuwã bene inũ 10.000 shumu piti sheni ẽ hatu kuamashunaya Senhor Deus ewẽ benimashanimẽkaĩ? Senhor Deus daewakĩ ẽ huni bake iyua ẽ hatu kuamashũkĩ hawẽ hãtxa danãkĩ ẽ txakabuwakubiranima tere akĩ ẽ yamawatirumẽ? Kanekĩ haska mã shinãmiski.

⁸ Hunibuũ, Senhor Deus daewakĩ mã haska watirumahairaki. Hawara pepakiri Senhor Deusũ ma matu yuinishũ matu manaikiki. Hawẽ yunuti kushipa kaneama inũ, pepa aki betxipainamei yura betsabuwẽ nuikũkaini inũ, ibubis keãma matũ mekenika Deusũ hãtxa nĩkakĩ ha besti txibãkubaĩkãwẽ, matu waniki.

Parananaĩ txanitxakamisbukiri ana Senhor Deusũ hatu ha anikiaki, na hãtxarã

⁹ Maewã anu hiweabu Senhor Deusũ hãtxa kaiãyã tsuara datekĩ nĩkakubaĩmis harã, unanepaki. Senhor Deusũ matu ana yuikĩ: “Maewã anu hiweabu inũ unanepa merabenanikabuũ, ea nĩkakãwẽ.

¹⁰ Habu itxakanikabũ hatu atimapa wakĩ mabu inũ pei itxawakubainaibu huni txakabubũ hiwe anu hayabuki. Yaushi mabuwẽ kemui hawa hatu tana pewashũ inãma yumetsuaibu ẽ hatu betxipaismahairaki.

¹¹ Hawẽ shãkama unãkĩ tanati txakabuwẽ hatu parãkubaĩmisbu hatũ txakabu tere akirã, haskatã ẽ hakimatirumẽ?

¹² Na maewã anu dasibi peiyabũ hatu itxakawakĩ mabu inũ peiwẽ kemukĩ hatu paraĩ txanitxakakĩ harakiri hatu nitimawakanikiki, hatunas wakinã.

¹³ Mã hatu haska wamiswẽ taeshũ matũ txakabuwẽ kupikĩ matu yamawakĩ ẽ taewabainaii.

¹⁴ Ẽ matu kupikubainaya pibiai mã hawa yaniwatã pepeama buni pae tenei mã nuitapakũkaĩshanaii. Hawara matu mebinũ ika beaibu matũ bai anua piti bishũ hune hatuki datekĩ mã hani pashawatiruma ishanaii. Hawara piti teshe ha pikatsi mã mekekatsi hune arubiakẽ hau yamawai benũbũ nawa detenamenikabu ẽ hatu yunushanaii.

¹⁵ Bai anu banabiatã mã hawa tsekama ishanaii. Hi bimi azeitona sheniya tsekashũ mã tsinibia hawẽ sheni mã hawa biama ishanaii. Uva bimi batapa tsekashũ haki pai pai ikĩ hawẽ hene mã bibia uva vinho mã hawa akama ishanaii.

¹⁶ Samaria anu shanẽ ibukĩ Onrĩ hatu yunukubaini inũ Acabẽ enabũ txakabuwakubainibu hatũ beya tapinishũ txibãkĩ mã habiaskari wakubainaii. Haskawẽ taeshũ matũ maewã txakabuwakĩ yamawakĩ hanu hiweabũ matuki kashekĩ hau matu dakewakĩ datenũbũ ẽ hatu yunushanaii. Haska enabũ mã ea dakewakubiranibuwẽ taeshũ eãri ẽ matu dakehairawashanaii.”