Miquéias 4 - Kaxinawá Bíblia (BR)

Senhor Deus shanẽ ibukĩ dasibibu hatu unanuma hiwemakubaĩshanikiaki, na hãtxarã

¹ Hanu bari hawẽ henei ma kemaya ha mati anu Senhor Deus kẽwãti Templo hayakẽ Senhor hakiri hãtxakĩ mestẽwãshanikiki. Ha mati binua anushũ hakiri pe shinãkĩ mati tibi binua anu nawa shukua betsa betsapa beshãkanikiki.

² Sião anua Senhor Deusũ yusiã tashni Jerusalém anu hawẽ hãtxa kaĩshanaiwẽ taea yurabu mirimahaira hanu hikitushitã yuikĩ: “Senhor Deusũ Mati Sião anu mapekenũ bekãwẽ, Jacó mekenika Senhor Deus kẽwãti Templo anurã. Harishũ hawẽ pe hiwekĩ shinãti nuku yusiã ha bai keska hawẽ yusiã hãtxa txibãkĩ tapĩ nũ maputiruki”, iki ma itxai keyua maniabũ

³ hanushũ nawa shukuabu tibi Senhor Deusũ hatu unãti wakubaĩshanikiki, txaihaira hiwebia ha yurabu itxapahairabu hawawẽra taea ha imisbu haratura pepaimabu inũ haratura kaneimabu unãtã hatu pewakinã. Hatu haska waya hatũ mabu maei betsairã, hatũ nupe kenu txaipabu betsa wakĩ hawẽ mai sheshabirãti wakĩ hatũ hashi betsa wakĩ nupe shewetia washãkanikiki. Ha haskaibutianã, ha yurabu ana hatũ detenameti mabu betsa betsapawẽ ana tsuabubera detenameama ishãkanikiki. Ha inũ, detenamei bukatsi hatu yusĩmisbu ana tsuã hatu yusiãma ishãkanikiki.

⁴ Haskawẽ taea dasibi ana hawawẽ dateama hiwekubaĩshãkanikiki. Hatũ uva bana nishi manaũri beshea inũ hatũ hi figueira bimi batapaya namã uta unanuma huĩrukuĩ manishãkanikiki. Senhor Deus kushipahaira dasibi binu keyuatũ huni betsã hãtxawẽma hawẽ hãtxawẽ ibubis matu yuikiki.

⁵ Haskabiashanaya ikis yura shukuabu betsa betsapabũ hatũ mekenika yushibu nĩkakĩ ha txibãkanikiki. Hamẽ nukubunã, nukũ mekenika Senhor Deusũ yusĩti hãtxa nĩkakĩ ha heneama nũ ha txibãkubainaii.

Hatu itxakawabiaibũ hawenabu merabewakĩ Senhor Deusũ hatu mekeshanikiaki, na hãtxarã

^6-7 Txanima hawẽ hãtxa mestẽwãkĩ Senhor Deusũ yuikĩ: “Shaba betsatiã enabu txashuwã keska pashkabainibu ẽ ana hatu itxawashanaii. Tiri keskabu inũ, hĩ ikai keskabu inũ, haikaimas sa aka keska wakĩ ẽ hatu kupibiani ena wakĩ ẽ hatu ana itxawashanaii. Betsabu hatu iyukĩ inũ betsabu habu iyuama bashibainibu itxawashũ yura shukuabu kushipahaira ẽ hatu washanaii. Haska watã Mati Sião anushũ mekekĩ yunui ea kayabis Senhor Deus ẽ hatu shanẽ ibupakeshũshanaii.

⁸ Mia mĩ Jerusalém maewanã, kushipa wakĩ mishki kenekĩ benawanibu Sião anushũ yunukĩ ana kushipatã ha maewã ana benitã enabu dasibi mĩ shanẽ ibushũshanaii, haska shanẽ ibuhaira kushipabũ hatu yunupauni keskarã”, akĩ ea yuimaki.

⁹ Senhor Deus ma yubakaimawẽ taea haskai mã bis bis ikai, aĩbu bake kaĩ isĩ imis keskairã? Shanẽ ibuhaira kushipa mã hayamamẽ? Pe yusinika hawẽ shanẽ ibuhaira merabewanikabu ma mawaimabumẽkaĩ?

¹⁰ Matunabu nitxiãbu kaĩbaini maema anu hinamas hiwekubainaibu ushakubaini Babilônia anu matu iyushanaibuwẽ taea Sião anu hiweabuũ, yura isĩ uminai bis ikubaĩkãwẽ, aĩbu bake kaĩ isĩ memis keskairã. Hakia harishũ matuki sinatakĩ matu iwanibu anua habukiri sinatakĩ Senhor Deusũ mã hawenabu matu ana mebikinãkĩ matu piskumashanikiki.

¹¹ Natiã matu txakabuwanũ ishũ yura shukua betsa betsapabu matuki sinataibu itxatã yuikĩ: “Hatũ mekenika yushinẽ hau hatu dananũ Jerusalém anu hiweabu meribima detsis keska betxipaikĩ nũ uĩ bukatsis ikaii”, ikubainaibu

¹² hakia haska Deusũ shinaĩ yubakakũkainai ha yura shukuabũ unãbumaki. Shekiwã tsekashũ hanus bushukuashũ tsumabaina keska wakĩ habũ hawenabu itxakawaibu Deusũ hatu itxawashanai habũ unãma Deuskiri hãtxa txakabukanikiki.

¹³ “Yura shukuabu itxapa teke teke akĩ shemekĩ mã hatu akawashanũbũ ina awa bene kushipa mane ferro mashũ inũ mane bronze hũtsisya keska wakĩ pubẽ wãkĩ eã ẽ matu mesewashanaii”, akĩ “Senhor Deusũ matu yuiaiwẽ taeshũ Sião anu hiweabuũ, benitã hatuki pai pai ishãkãwẽ. Hatu itxakawakĩ hatu detetã mane ouro inũ mane prata inũ mabu pepa itxawanibu hatu anua mebĩkĩ keyutã, ẽ ea mai hirabi shanẽ ibu mã ea meribi wakubaĩshanaii”, itã