Judas 1 - Kaxinawá Bíblia (BR)

Judasĩ hatukiri xinãnikiaki, na hãtxarã

¹ Tsuabura Epa Deus matuwẽ nuikĩ matu kenatã katuni mã habu Jesus Cristõ matu tsumashũ mekekubainai ẽ Tiagõ betsa Judas Jesus Cristõ tsumapã, ẽ hãtxa ẽ matu bumai uĩrakãwẽ,

² Deus matuwẽ nuikĩ unãnuma matu hiwemakĩ hau ana matu duahairawakubainũwẽ.

Yusĩ parananãmisbu Deusũ hatu kupishanikiaki, na hãtxarã

³ Ẽ betsabu inũ ẽ puibuũ, matuwẽ nuikĩ haska Jesus Cristõ matu inũ ea nuku pashawakatsi hãtxanikiri matu keneshũkatsi ibiakĩ ha akama eskaibukiri hatu uĩkĩ habukiri xinãkĩ Deusũ kakape nũ matu Deusunabuwakĩ yusĩni habũ betsa wakĩ matu bika tenemakĩ inũ yura betsabu hau hatu parãyamarianũbũ mã hatu nemakubainũ haskakiri keneshũ ẽ matu bumai uĩrakãwẽ.

⁴ Ha inũ, ha bebũkiri ha yurabukiri Deusũ hawẽ hãtxa hatu kenemani habu parananãmisbu kupinũbariai habias yuini keska na habiatiã yurabu betsa betsapa hune txakabu hayabia matube itxai unãtinãtã hatũ txakabu henekatsi ikama habũ xinãwẽ matu parãkĩ yuikĩ: “Deus pepatunã, hawara txakabu mã wabiaya matũ txakabu buatã kupiama ishanikiki”, akĩ hamapai atimapa matu yusĩ hatũ hiwea pewai beshtekekatsi ikama Jesus Cristo besti nukũ Shanẽ Ibubiakẽ hawẽ kuxipa danãkanikiki.

Deusũ hatu unãti watã kupinũbarikiaki, na hãtxarã

⁵ Egito anua Israelbu Deusũ hatu tashnimabirani mã unãbiaya haskakiri mã xinãnũbũ ana matu yuinũ nĩkakãwẽ. Ma hatu pashawabiaima Israelbu habũ Deusũ hãtxa ikũwãkatsi ikama danaĩbuwẽ taeshũ hanu tsua hiweabumanushũ Yavé Deusũ hatu kupikĩ tenãkubirani mã unaiĩ.

⁶ Ha dikabi Deusũ hawẽ nai tsumabu nai anua habu tibi ha mekei hanu hau shanẽ ibunũbũ hatu yunubia haska besti mekekatsi ikama hatũ daya henebiranaibu Deusũ hatu nemakĩ hanu mexuhaira kaĩkaĩtirumanu hatu bitxitã hanu bari hawẽ heneai anu hatu kupiaitiã haburi kupishanai hatu mekea mapuabuki.

⁷ Ha hawẽ nai tsumabu hatu ashanai keskari wakĩ nawabu Sodoma inũ Gomorra mae ewapa inũ hatu dapi mae urama anu hiweabu txutawẽ kemukĩ hunibu habe hunibe txutanameaibu Deusũ hatu kupikĩ hawẽ yusĩa danaĩbu txi nukaismawẽ hatu kupishanai keska wakĩ shabakabi Sodoma inũ Gomorra hatu kupinikiaki, habias nukubũri dasibibũ hatuwẽ taeshũ nũ unãshanũbũ hatu kupikinã.

⁸ Hatu haska wani xinãbiai ha parananãmisbũ shabakabi xinaĩ hiweama yuikĩ: “Deusũ ea hari yusĩkiki”, iki hatũ xinã meribiswẽ hãtxai yurawẽ besti kemui txutanamekĩ Deus shanẽ ibuai itxakĩ danãkĩ Deusũ nai tsuma kuxipaburi ha amisbuki.

⁹ Hakia Deusũ nai tsuma shanẽ ibu Miguel dasibi nai tsuma betsabu binuhaira Satanásbe hãtxai Moisés mawa hawẽ yura haratutũra hawena watiru yauxi ha irabenamekĩ Miguel hãtxa pepawẽ besti hãtxa wakĩ Satanás yuikĩ: “Yavé Deusũ hau mia txitenũwẽ”, ibianikẽ

¹⁰ hawara unãkĩ nĩkabuma ha parananãmisbu yupukunãkubaĩmisbuki. Haska hatũ xinãnã, yuinakapã xinãyã keskabuki. Hatũ xinã txakabuwẽ taearã, hatũmebi hatũ kupiti bikanikiki.

¹¹ Uĩa. Habu ikirã, Caim hawẽ betsa tenãni keska ha txibãkĩ txakabuwakanikiki. Haska inũ, huni betsa Balaão pei binũ ika kemui ini keskariakĩ Deusũ bai kayatapia benui yusĩnã betsabu parananaĩ peiwẽ kemuriakanikiki. Haska inũ, huni betsa Corã Deusũ yunua danaĩ benuni keskai ha parananãmisbu habu mawariai pemashãkanikiki.

¹² Haska inũ, mã Jesus txibaĩbu itxatã duanamekĩ mã piaibũ ha parananãmisbu dakei hawa dateama matube naxui itã pike bestikĩ tsua duawama benimanikapaikĩ matu dakewamisbuki. Habu mekenikabia ibubis besti hawẽ yura xinaĩ mekemisbuki. Habũ yusĩanã, nai kuĩ hushupa nuyabainaya ui huama mai metxawaisma keskai habu hãtxahairakĩ yurabu merabewakĩ kuxipa waisbumariki. Ha inũ, hanu ni bimiyamisbutiã hi betsa betsapa bimibiamiskẽ habu hãtxãwaĩbu nĩkakĩ hawẽ merabewati hi bimiuma shanaxina betsea keskai parananãmisbũ tsua merabewaisbumaki.

¹³ Ha inũ, iãnẽwã niwẽ betxuruãkĩ tũkash akĩ kesha anu bakush henebaĩmis keskakĩ habũ txakabuwai parananãkĩ dake pae shabakabi henebainaibu dasibibũ uĩtirubuki. Ha inũ, bixi hawẽ bai ana tanabainama keskai ha parananãmisbu unãnumas buaibu ana tsuã txibãtirubumaki. Haskawẽ taeshũ hanu mexuhaira Deusũ hatu washuni anu hanu hatu nitxĩtã kupihairashanikiki, niti akamarã.

¹⁴ Ha dukũ Adãowẽ pakea setewẽ hawẽ baba Enoquetiã ha yurabu txakabukiri bebũkiri Deus hãtxashũkĩ yuikĩ: “Uĩa. Yavé Deus huirã, hawẽ nai tsuma mirima tsuã hati tanatirumaya hushũ

¹⁵ yurabu dasibi hatu unãti wakĩ habuã txakabu betsa betsapa amisbu inũ hatũ hãtxa pemawẽ Deuskiri yuimisbu Deusũ hatu kupishanikiki”, ani

¹⁶ habias keska menei hawara tibi abuama ha iki yuãnanaĩ hawarawẽ ibubis hawenas benai benimanũ ika hatũ kemu pae besti txibaĩ inũ keĩ mia akaitũ besu wakĩ dasibibu hatu binumakĩ maemaikiki, hatu kẽwãmairã.

Ikũwãkĩ kaneaibu nui paewẽ hatu merabewatikiaki, na hãtxarã

¹⁷ Hakia ẽ betsabu inũ ẽ puibuũ, ẽ matuwẽ nuiairã, nukũ Shanẽ Ibu Jesus Cristõ hawẽ kuxipayabu hatu yunua haska habũ matu yusĩni ana matu xinãmanũ xinaĩrakãwẽ.

¹⁸ Hawẽ tsumabũ matu yusĩkĩ: “Txanima hanu bari hawẽ henei ma kemaya yurabu hiwe txakashũ ibubis txakabu xinãkĩ matukiri kashekenãshãkanikiki”, haska xinãkĩ matu yuiniburã,

¹⁹ txanima na habiatiã ha yusĩnãnaĩ parananaĩ kashekenaĩbũ Deus xinãma ibubis hatũ kemuti xinã txibãkĩ ikũwaĩbu tari pashkakĩ Deusũ Yushĩuma wakĩ hatu akanikiki.

²⁰ Ẽ betsabu inũ ẽ puibuũ, tsuabura ẽ matuwẽ nuiairã, matu yuinũ nĩkakãwẽ. Ikũhairawai ana kuxipanamei hawẽ besti mestẽtã txĩtuãma meribi hiweshũyukĩ Deusũ Yushĩ Pepatũ matu xinãmakĩ yuimaya Deusbe hãtxai hawẽ kuxipawẽ dayuikubaĩkãwẽ.

²¹ Haska inũ, Deus matuwẽ nuimis inũ matu putaisma unaĩ Jesus Cristo hanu hushanai mã manaiwẽ taea nukũ Shanẽ Ibu Jesus Cristo nukuwẽ dabanã ikĩ hiwekuĩa ikibi ika nuku inãshanikiki.

²² Jesus Cristo ikũwãbiai teabu hatuwẽ nuikĩ merabewakubaĩkãwẽ, xinã dabewaiburã.

²³ Mã habuwẽ nuikĩ merabewakatsis ikairã, hatũ kupiti ma kemawabu txi anu ma kemai keskabu menã hatu neshea keska warikãwẽ. Betsabu habũ txakabu mã abuamabia matũmebi meketã hatũ hiwea beya husiama danãbiakĩ hau Jesus Cristo ikũwanũbũ hatu merabewakubaĩkãwẽ.

^24-25 Nukũ Epa Deus ha besti nukũ merabenã yushĩ dasibi kuxipa hayatũ matu kuxipa wakĩ matũ xinã txakabũ ana matu kanematiru nemashũkubainaya hawẽ bake shanẽ ibuhaira huaya yura dasibibu unãkĩ hatu kupiaitiã maturi ha bebũ hawa txakabu mã hayama hawẽ besuuri matu nitxĩtã benima pae matu inãyã mã benimahairashanaii. Haskakẽ nukũ Shanẽ Ibu Jesus Cristowẽ taeshũ Epa Deus duapa pepa inũ, hatũ besti kuxipa binu keyua inũ, yunuti kuxipa pae hayahaira iki taeni inũ natiã haya inũ ipashanai haya kẽwãkubainãkãwẽ, heneamarã. Haskakirã. Hatiki, ẽ hãtxarã. Judas