Habacuque 2 - Kaxinawá Bíblia (BR)

¹ Habacuque ana hãtxakĩ: “Senhor Deusuũ, haska dasibiwẽ ẽ nuiai shinãkĩ ha ikĩ ẽ mia yukashu haskara mĩ ea kemaimẽkaĩ, tapinũ ika beputi shui mekenika hawa pes ikama nishũ uĩbaũmis keska nĩkakĩ ẽ mia manaii”, ẽ wa

² Senhor Deusũ ea kemakĩ yuikĩ: “Mapu sapa washũ tsusĩriama hi kenu debu mesiwẽ haska ẽ mia unãmai kenewe. Tsusiaĩ kuabu mĩ neshea shabakabi mĩ keneshina tsuãra uĩkĩ hawa keti ikama hawaira yuibaĩkĩ tapĩtirubuki.

³ Haska nama keskawẽ ẽ mia unãmai hawaira huamabiakẽ hanu huai katutã ẽ yunua txanima hushanikiki. Hakia hawa niti ikama hushanaiwẽ taea manayukubaĩshãwẽ.

Pepabu hatu itxakawamisbu eska hatu ashãkanikiaki, na hãtxarã

⁴ Eska hatukiri kenewe. Huni txakabuburã, keĩ hiwemisbuki. Hakia huni pepabu hiweirã, Deusũ hãtxa ikũwaĩ txĩtuãma unanuma hiwekubaĩmisbuki.

⁵ Huni kenikaburã, hawẽ hatu yunuti kushipa ana hayakatsis ikĩ benamisbuki. Haska kushipawẽ parananãbiai hawa huĩrukuãma benabauni hawẽ yunuti kushipa ana itxapa hayakatsis imisbuki. Mawabu hatu maiwamisbu keska wakĩ ha kẽmisbu hashpashũ hatu shea keska wakĩ yura betsa betsapabu tibi hatu atxitã ibuwanũ ishũ shinãkĩ hawa hatu henetirubumaki.

⁶ Hakia tsuãra nawa shukua betsa betsapabu hatu atximabũ habu atximabũ hatuki kasheshãkanikiki, hatukiri kãtai eskairã: ‘Matunamabia hatu datebaĩ mebĩkubaĩkĩ mabu inũ pei mirima mã ma hayawẽ taea mã peirashãkãwã! matu anu kupiti mese hushanayarã. Ha mabu inũ pei mã hatu mebĩkubaĩkĩ itxawakubainairã, hatiã mã hatu heneshanai?’ hatu washãkanikiki.

⁷ Mã hatu diria hatiara mã hatu pakashanũ matu manamisbu hatishuĩra ana matu manama hawaira matu yukakĩ datekĩ matũ hawara mebĩkĩ keyukĩ matũ tariri matu pekariabaĩshãkanikiki.

⁸ Matuki sinatabirani nawa betsaburi itxatã mã hatũ mabu inũ hatũ pei mã hatu mebini keska wariakĩ matunari dasibi matu mebĩkĩ keyushãkanikiki. Hatũ mai pakea anushũ hanu hiweabu inũ hatũ maewã tibi mã hatu txakabu wakubaini tibiwẽ taeshũ maturi kupikĩ manakushãkanikiki.

⁹ Tsuabubera hatube detenamekĩ mese binutã hatũ mabu yumetsubirã matũ hiwe tibi mã mata wamiswẽ taearã, matu anu kupiti mese huayarã, mã peirashãkãwã!

^10-11 Matũ mae mishki kenebaunibu inũ matũ hiwe hawẽ nabu nakishkũ tibi matuwẽ taea sai sai ibaũkĩ yura shukuabu mirimahaira mã hatu yamawakĩ beruniwẽ taeshũ maturi yamawariai beshãkanikiki. Mã hatu haska waniwẽ taea matunabu dakehairashãkanikiki.

¹² Caldéiabuũ, matũ maewã Babilônia anushũ hatu itxakawakĩ yunuti pepa txibãma hatu parãkĩ dayama txakayamakĩ huni itxapa mã hatu tenãkubainibuwẽ taea matu anu kupiti mese huaya mã peirashãkãwã!

¹³ Hamẽ daya txakayamai hĩ hĩ ikĩ matũ maewã mã beninirã, Senhor Deus kushipahaira dasibi binu keyuatũ txiwẽ menu keyukĩ matu yamawãshanikiki.

¹⁴ Ha haskaitianã, mai hirabi anu hiwebaunabu dasibibũ Senhor Deusũ kushipakiri unãshãkanikiki, ianẽwã matai dasibibũ uĩmisbu keskairã.

¹⁵ Matu dapi hiwebaunabu uva vinho dau betsa kapãtã hatu amakĩ mã hatu paẽwã tariuma habũ hatu uĩmakĩ hatu dakewamisbuki. Mã habũ hatu paẽwãmis mã peirashãkãwã!

¹⁶ Keĩ mã kushipabiamiskẽ matũ kushipa betsa wakĩ matu dakewakĩ mã txakabu besti wamis matunabu shabakabi uĩmakĩ ana hawa hatu matu kẽwãmama Senhor Deus matuki sinatakĩ dake pae matu atximashanikiki.

¹⁷ Líbano mati matipa anushũ hatũ himi haba wakĩ mã hatu detekubainiwẽ taeshũ habiaskari wakĩ maturi detekĩ matũ himiri haba wariakubaĩshãkanikiki, matũ inabu tenã keyukĩ matu datehairakinã.

¹⁸ Yushĩ hatu dami wamakĩ keyutã hawẽ hawa watimẽ? Hamẽ besti kẽwãtirubuki. Ha yushĩ damirã, hakiri hawẽ txani besti mia unãmakĩ yusĩtiruburã, hawẽ hawa watimẽ? Hamẽ besti nĩkatirubuki. Yushĩ dami haska hãtxatiruma tsuãra ha yushĩ dami wabiamisrã, haskatã haki txiti itirumẽ? Txanima hamẽ tsua haki txiti itirumaki.

¹⁹ Hi dami yushĩ hawa hãtxatiruma tsuãra yuikĩ: ‘Bestẽwẽ’, akĩ mishki dami yushĩ yuikĩ: ‘Beniwe’, aka hawa hãtxa matu yuitirumẽ? Ha dami ouro mane inũ prata manewẽ dapushbiabu ibubis hawẽ hiwea hayamawẽ taea matu hawa yuikĩ kematirubumahairaki. Haskawẽ taea mã habũ kẽwãmisbu mã peirashãkãwã!

²⁰ Hakia hawẽ hiwe kayabi templo meribi anu Senhor Deus hiweaki. Haskawẽ taeshũ mai hirabi anu hiweabũ pes manishũ hawẽ hãtxa nĩkakĩ hau ea kẽwãkubainũbũwẽ”, ikĩ Senhor Deusũ ea yuishinaki.