Habacuque 1 - Kaxinawá Bíblia (BR)

Habacuque inũ Senhor Deus hãtxanamenibukiaki, na hãtxarã

¹ Deusũ hãtxa yuishunika Habacuque Senhor Deusũ haskashanai unãmakĩ yuinikiaki.

² Ea Habacuque punu nukashũ Senhor Deus yukakĩ: “Senhor Deusuũ, merabe ẽ mia yukabia mĩ ea nĩkama hatiki mia yukakubaĩshãpa? Pubẽkĩ nuku itxakawaibu hatu nuku nemashũkĩ beshteshuni mĩ huriamakẽ hatiki kashayabi mia yukakubaĩshãpa?

³ Enabũ txakabu wai itxakanikakubaĩmisbu haskakĩ txakabu tibi mĩ ea uĩmai? Ea kebaunaburã, dasibi mae tibi anua ha ibukuni detenamei pubeĩ atimapai txakabukubaĩkanikiki.

⁴ Moisĩ nuku yusini keska txibãkĩ hatũ yunuawẽ shanẽ ibubũ nuku yunuabumaki, txanima hãtxa danãkinã. Txakabubũ yura pepabu itxakawakubaĩkĩ pepa hãtxa betsa wakĩ hatu parãmisbuki, hawa yunuti pepawẽ hatu hiwemamarã”, ẽ aka

⁵ Senhor Deusũ ea kemakĩ yuikĩ: “Yura shukuabu matu dapi hiwebaunabu uĩkãwẽ. Hatu uĩ mã datehairashanaii. Haska ẽ samama ashanai tsuãra matu bebũkiri yuibia mã ikũwãtirumaki.

⁶ Ha Caldéia nawabu pubẽ tsakanamenikaburã, ẽ hatu beruwaii. Haburã, mai hirabi hatunamabia bukubaũkĩ hatu mebĩtã ibuwamisbuki.

⁷ Caldéia nawabu mesebu inũ txakabubunã, hatu datemakubaini hawa tsuã yunuti unãkatsi ikama haska ibubis besti shinaĩbu bestiwẽ txakabukubaĩmisbuki.

⁸ Hatũ cavalo kushipahaira hawawẽ dateama kushikaĩkĩ inu keneya betsa binubaĩtirubuki, beamakinã. Ha dikabi, kamã inu betsa lobo kushipahaira meshu merã mapumisbu binuabuki. Cavalo katsaumeabu mirimahaira txaihaira anua bekĩ tetepã hawẽ piti hawaira nuyakaĩ yuinaka atximis keska atxinũ ika hawaira ishtxukaĩ hatu tenã keyumisbuki, hatuwẽ hawa nuiamarã.

⁹ Dasibi txakabu wakĩ keyukubiranaibuwẽ taea bebũkiri dasibi datehairakubainaibu hatu deteama yurabu mirimahaira henewã kesha mashiti keska tsuã hatu tana keyutirubumabiakẽ hatu atximisbuki.

¹⁰ Shanẽ ibuhairabu inũ shanẽ ibu beshmas yununikabuki kashekĩ hatũ mae mishki kushipa kenebiabaunibukẽ hatuki dateama usãmisbuki. Hatũ mishki kenebaunibuki mai maspu wakĩ matawatã haki mapekebaĩ hatũ maewã atxi keyumisbuki.

¹¹ Niwe kushipahaira shũku ibainai keska bei Mekenika Yushĩ shinãma ibubis hatũ kushipa besti txiti itã ikubaĩmisbuki”, ikaya

¹² nĩkatã eã Senhor Deus yuikĩ: “Senhor Deusuũ, ẽ Mekenika Deus meribi mawatiruma mĩ hiwei ikibi ika ẽ unaiĩ. Ẽ Mekenika Senhor Deusuũ, Israelĩ enabu txakabumisbu hau mia hatu kupishũshanũbũ Caldéia nawabu mĩ hatu kushipa waniki.

¹³ Mĩ miarã, mĩ pepahairawẽ taeshũ hawara txakabu mĩ nemamiski, hawa heneamarã. Mĩ pepahairawẽ taeshũ hawara txakabu uĩkĩ ha betxipaiama mĩ danãmiski. Nũ Israelbu txakabubiabũ parananãkĩ Caldéia hunibu sinatapai txakabuhairakĩ nuku binuhairabuki. Hakia hatũ mae haska txakabuhairabiakẽ mĩ haskakĩ hatu kupikatsi ikama hatu hawa yuimamẽ?

¹⁴ Ianẽwã anua baka inũ ni meranua yuinaka shanẽ ibu hayabuma hiweabu keska wakĩ haskakĩ mĩ nuku mekekĩ duawamamẽ?

¹⁵ Caldéia nawabũ yura shukua betsabu hatu atxitã ibuwakubaĩmisbuki, hunibũ sheamatiwẽ inũ hisĩwẽ baka bishũ itxawashũ uĩ benimamisbu keskairã.

¹⁶ Haskawẽ taea baka binikabũ hatũ yushĩ dami kẽwãmisbu keska wakĩ hatũ hisĩ inũ hatũ sheamatiwẽ baka nuepa mirima biaibuwẽ taea benimakĩ inabu tesẽshũ hawẽ piti sheni inũ sheni ininipa habũ hatu kuashũkubaĩmisbuki.

¹⁷ Baka binikabu keskakĩ ha Caldéia nawabũ hawa hatuwẽ nuiama ana yurabu hatu detekĩ atxikubaĩshãkanimẽkaĩ, hatu itxakawakinã?” itã,