Ezequiel 36 - Kaxinawá Bíblia (BR)

Haska Senhor Deusũ hatu merabewashanai Israelĩ enabu yuinikiaki, na hãtxarã

¹⁶ Ana bari betsatiã Senhor Deusũ ea hãtxa wakĩ yuikĩ:

¹⁷ “Israelĩ enabu hatũ mai pakea ẽ meribi hatu inãni anu hiweshũ txakabuwakubaini atimapakĩ ea betxipaimama inibuki. Haskai hiwekubaĩkĩ hatũ mai pakea atimapa detsis keska waibũ haskaibu ẽ hatu danãhairaniki.

¹⁸ Hanushũ hatunabu betsabũ hawa hatu wabumabia e iskaũ hatũ mae anushũ hawenabũ hatu detekubainaibu inũ, yushibu dami kẽwaĩ haki beamaibuwẽ taeshũ ea hatuki sinatakawã

¹⁹ ha hiwe txakakubainaibuwẽ taeshũ mai pakea betsa betsapa anu nawabu habũ unãbuma anu eã hatu itxakawayukĩ ẽ hatu sa akĩ keyuniki, hatũ txakabuwẽ hatu kupikinã.

²⁰ Hakia hanira nawabũ enabu hatu iyukĩ hatũ mae anu hatu bitxitã ẽ kena meribi habukiri yuikĩ: ‘Narã, Senhor Deusũ enabubia hatũ mai pakea anua hatu tashnimabirãkĩ nenu hatu iwenibuki’, hatu akubainaibũ

²¹ hatu atxitã iyukĩ mae betsa anu hatu bitxiabũ Israelĩ shenipabũ txakabuwẽ taeshũ nawabũ ẽ kena meribibiakẽ ea hatu yuãmaibu nĩkakĩ uĩ ẽ bika tenehairakubainaii.

²² Haskawẽ taeshũ Israelĩ enabu ea hatu yuishũtãwẽ: Eska Senhor Jeová matu yuikiki, akinã. Israelĩ enabuũ, haska akĩ ẽ kushipa ẽ tashnimashanairã, matu merabewanũ, iwanã, ẽ akamaki. Hakia hanira nawabu anu bushũ ekiri mã hatu txakabu hãtxamakubainai ẽ kena meribi unãkĩ hau habũri ea unãshanũbũ ẽ ashanaii.

²³ Hatu anushũ mã ea txitekĩ yuãbiaya ha nawabu bebũshũ ẽ kena meribi kushipa ẽ hatu uĩmashanaii. Ẽ hatu haska washuna ea uĩ ea besti ẽ Senhor Jeová habũ ea unãkubaĩshãkanikiki. Ea Senhor Deusũ ẽ hãtxa txanima ẽ mestẽwaiĩ.

²⁴ Mai pakea betsa betsapa anu nawabu tibi anu matu iyunibu anua matu ana ikĩ itxawashũ matũ mai pakea anu ẽ ana matu txĩtũmashanaii, hanu mã ana hiwei bushanũbunã.

²⁵ Ũpash kayabi beshnahairawẽ matũ beya betsa betsapa detsis keska ẽ matu txukashanaii, mã yushibu dami kẽwaĩ mã atimapamis tibi matu tere akĩ keyukinã.

²⁶ Matu haska watã huĩti anu shinã bena inũ ẽ yushĩ kushipa bena ẽ matuki mistushanaii, ha matũ huĩti kushi mishki keska tsekatã huĩti nuikipa mistukinã.

²⁷ Matu merã ẽ yushĩ mistushũ ẽ yunuti hãtxa inũ, ẽ nemati hãtxa inũ, ẽ yusĩti hãtxa mã hawẽ hiwekĩ mã ea uinũbũ ẽ matu txibãmakubaĩshanaii.

²⁸ Ha mai pakea betsa matũ shenipabu ẽ hatu ibuwamani anu ana mã hiwekũkaĩshanaii, mã hari ana hiwea mã enabuwẽ taea eari ẽ matũ mekenika Deus iriakũkaĩshanaii.

²⁹ Harishũ matũ beya txakabu betsa betsapa ẽ matu putamashanaii. Matũ shekiwã trigo matu hamẽ ashũkĩ ẽ ana matu buni yunuama ishanaii.

³⁰ Ha dikabi hau yurabu hiwebaũshũ matu uĩkubainũbũ buni paewẽ mã ana dakeyamashanũbũ matũ mibã hi inũ matũ bai anu mibã tibi bimihaira ẽ matu washũkubaĩshanaii.

³¹ Hiwetxakakĩ mã txakabuwakubaini shinaĩ, ea danaĩ mã atimapakubainiwẽ mã ibubis dakekubaĩshanaii.

³² Israelĩ enabuũ, ea Senhor Jeová ẽ hãtxa txanima ẽ mestẽwaĩ ea nĩkakãwẽ. Na matu eska wakinã, eã ẽ shinanẽ, ẽ matu akamaki. Haska mã betxipaiai keska ibubis mã txakabumiswẽ bika tenei itimaskai dakekubaĩkãwẽ, ibubis ma kẽmiswẽ taearã.

³³ Ea Senhor Jeová ẽ ana matu yuiai ea nĩkakãwẽ. Matũ txakabu matu pewakĩ keyutã matũ mae tibi di iki txakabuni ana pewatã ha mae anu mã hiwekubaĩshanũbũ ẽ matu yunushanaii.

³⁴ Mai pakea hanu matũ ibubu hiwepaunibu anu bari itxapa tsua hanu hiweabumabiakẽ ha hanu hiweabuma anushũ mã ana bai bena wakubaĩshanaii. Tsuabura hanu kapukekĩ mã ha mae uruai matu uĩshãkanikiki.

³⁵ Habu yuinamekĩ matukiri yuikĩ: ‘Na mairã, bari itxapa hanu tsua hiweabuma ibiani ikis dasibi hawẽruahairaki, Éden anu Deusũ bai hawẽrua wani keskarã. Hatũ mae tibi berãkĩ txakabuwakĩ keyutã henebainibu ikis ana pewatã mishki kenebaũkĩ keyutã hanu ma hiwekanikiki’, akĩ matu yuishãkanikiki.

³⁶ Hanushũ ha nawabu matu dapi hiweabũ ea unãshãkanikiki. Ha mae berãkĩ txakabuwanibu ẽ ana matu bena wamai inũ matũ yunu bai betsekĩ txakabuwanibu ẽ ana matu banamai kai haska bebũkiri ẽ txanini ẽ Senhor Deusũ ẽ ma matu amai habũ uĩkĩ unãshãkanikiki.

³⁷ Ea Senhor Jeová ẽ hatukiri yuiairã, Israelĩ enabũ habũ ea yukai binumakĩ ẽ hatu pehaira washũshanaii. Haburã, txashuwã shukua pamis keska wakĩ yura itxapa ẽ hatu pawakubaĩshanaii.

³⁸ Hanu besiaibutiã ea kẽwãkĩ hatũ txashuwã sheni ea kuashunũ ika hatũ txashuwã bekĩ Jerusalém anu itxawakĩ mata wamisbu keskai mae tibi berãbianibu anu ana yura itxapa itxashãkanikiki. Haskaibũ ea ẽ Senhor Deus kushipa hiwea ea unãti wakĩ shinãkubaĩshãkanikiki”, akĩ Senhor Deusũ ea yuia ẽ hatu yuishuniki.