Ezequiel 18 - Kaxinawá Bíblia (BR)

Deusũ huni unãti waya ibubis pe mekekubaĩtirubukiaki, na hãtxarã

¹ Ana Senhor Deusũ ea hãtxa wakĩ yuikĩ:

² “Israelĩ enabũ hatũ beya txakabu atiani habias txibãkĩ heneama yuikĩ: ‘Uva bimi bũkash pia keska wakĩ hatũ epabũ txakabuwakubainaibu hatũ sheta masheshai keskai hatũ bakebu nuitapai bika tenekubaĩmisbuki’, haska hãtxai haskakĩ Israelĩ enabũ haska yui beshtekeriabumamẽ?

³ Ea ẽ Senhor Deus ẽ hiweawẽ taea ibubis ẽ yubakairã, matubu Israelĩ enaburã, na haskakubainaibu hãtxa henetã ana txĩtũkirã mã yuiama ikũkaĩshanaii.

⁴ Huni inũ aĩbu dukũ ẽ dami waniwẽ taea dasibibu enaski, hatũ ibubu inũ hatũ bakeburã. Haskawẽ taea haratutũra txakabuwatã ibubis hawẽ txakabuwẽ taea mawakubaĩshãkanikiki, ẽ hatu kupiarã.

⁵ Hamẽ huni pepabu ikirã, eskamisbuki. Parananaĩsma inũ txanitxakaisma ikubaĩmisbuki.

⁶ Hawenabũ beya mati meribi anushũ yushibu dami kẽwaĩbu anushũ hatubetã pi txakabukũkaĩsma inũ, kanekĩ Israelĩ enabũ mekenika yushibu txani duawai haki txiti isma inũ, hatu dapi hiweabu hatũ aĩ hawa hatu meĩsma inũ, hawẽ aĩ himi ikai txutaisbumarã,

⁷ ha dikabi, hawa tsua itxakawaisma inũ, hunĩ diria ma pakakẽ hawẽ mabu biaĩma huni pepabũ hawẽ mabu hatu ana inãmisbuki. Hawa betsa taska hatu yumetsuamarã, hanushũ nuitapai buniaibu hawẽ piti hatu pimamisbuki. Ha inũ, huni betsa tariuma uĩkĩ hatũ tari betsa hatu inãmisbuki.

⁸ Ha dikabi pei inãshĩshũ hawena wakĩ ana shekaisbumaki. Hawa tsua bika tenemaisbumaki. Hanushũ hawarawẽ taea yura dabe ha ikaibu kaneama pepawẽ besti hatu unãti wamisbuki.

⁹ Ha huni peparã, ẽ yunuti hãtxa inũ ẽ nemati hãtxa shinãkĩ ẽ yusĩti hãtxa dasibi txanima txibãkĩ tsua hatu paraĩsma ha huni pepa kayabibuwẽ taea pe hiwekubaĩshãkanikiki, ẽ hawa hatu kupiamarã. Ea Senhor Deusũ txanima ẽ hãtxa ẽ mestẽwaiĩ.

^10-11 Hamẽ ha huni pepabiakẽ hawẽ huni bake betsã hawẽ epã shinã txibãkĩ akama na haska tibi mei txakabukũkaini haska hawẽ bake ẽ uĩtiruki. Hawaira sinatai detenamei inũ, yura betsa tenainã, ha inũ, mati meribi anushũ hawenabũ yushibubu dami kẽwaĩbubetã pikubaĩmis inũ, ha dapi hiweabũ aĩ txutamis inũ,

¹² nuitapaibu inũ hawa hayabuma itxakawakĩ merabewaisma inũ, yura betsa betsapabũ hatũ hawara yumetsumis inũ, huni betsã diria ma pakabiakẽ hawẽ mabu biaĩma ha yaushikĩ ana inaĩsma inũ, mekenika yushibu txani duawakĩ kẽwãmis inũ, hawara betsa betsapa ẽ betxipaiama akubaĩmis inũ,

¹³ pei inãyutã ana hawena wakĩ binumakĩ itxapa watã yukamisburã, haskaburã, hiwetirubumaki. Hawara dasibi ẽ betxipaiama akubainaiwẽ taeshũ shanẽ ibubũ hau kupikĩ tenãshanũbũwẽ, tsuã hawa hatu nemamarã. Ibubis ha huni hatũ shinã txakabuwẽ taea mawashãkanikiki, ẽ hatu kupimarã.

¹⁴ Hamẽ huni txakabũ bakebia hawẽ epã txakabu akubainai uĩbiakĩ hawẽ hiwea txibaĩsma eskatirubuki.

¹⁵ Mati meribi tibi anushũ yushibu dami kẽwãtã pimisbube itxaisma inũ, kanekĩ Israelĩ enabũ mekenika yushibu txani duawai haki txiti isma inũ, ha dapi hiweabũ aĩ hawa meisma inũ,

¹⁶ tsua itxakawaisma inũ, pei biãyuaya hau pakashũ bishanũ, iwanã, hawẽ mabu betsa biaĩsma inũ, hawara tibi hatu yumetsuismarã, hakia hawẽ piti pashkatã hawa hayama buniaibu hatu inãmis inũ, tariuma nuitapaibu hawẽ tari betsa hatu inãmis inũ,

¹⁷ hawa tsua itxakawakĩ txakabuwaisma inũ, pei inãyutã ana hawena bikĩ shekakĩ yukaismarã, ha hunĩ haska wakinã, ẽ yunuti hãtxa inũ ẽ nemati hãtxa shinãkubaĩkĩ ẽ yusĩti hãtxa txibaĩ hatũ ibubũ txakabuwẽ taea hawa mawama ishãkanikiki, ẽ hatu hiwemakubainarã.

¹⁸ Ha inũ, betsarã, hatũ epã hawenabu itxakawakĩ hatu yumetsukĩ kanekĩ txakabu betsa betsapa wakubainaya hawẽ txakabuwẽ taeshũ kupikĩ hau tenãshanũbũwẽ.

¹⁹ Hakia matubu yuka iki: ‘Haskakĩ hawẽ huni bake nũ kupiamamẽ, hawẽ epã txakabuwẽ taeshunã?’ mã ikaya eskaki. Matu yuinũ nĩkakãwẽ. Hawẽ huni bakẽ ẽ yunuti hãtxa inũ ẽ nemati hãtxa shinãkĩ ẽ yusĩti hãtxa txibãkubaini hatu paraĩsma inũ txanitxakaismawẽ taea txanima hiweshanikiki, ẽ merabewakubainarã.

²⁰ Hamẽ betsarã, tsuãra txakabu besti wakubainai habu besti mawashãkanikiki, ẽ hatu kupiarã. Hatũ epã txakabuwẽ taeshũ hawẽ huni bake hawẽ kupitiwẽ hatu tenãtimaki. Habiaskari wakĩ hawẽ huni bakẽ txakabuwẽ taeshũ hawẽ ibu kupitimariki. Tsuãra pepa akĩ haska Deusũ betxipaimis txibãmisbũ manakuti pepa bishãkanikiki. Hakia tsuãra txakabu betsa betsapa akubaĩmisbũ kupiti txakabu bishãkanikiki”, itã,

Senhor Deus kaneismatũ pepa waibu inũ txakabuwaibu unãtã hatu kupishanikiaki, na hãtxarã

²¹ “Hunibũ txakabuwabiakubaini hatũ txakabu hene keyutã ẽ yunuti hãtxa inũ ẽ nemati hãtxa shinãkubaĩkĩ ana kaneama pepas akubaini hiwekubaĩshãkanikiki, ẽ kupitiwẽ hawa mawamarã.

²² Ha hunĩ haska txakabu akubaini eã ẽ ana shinãma ha huni pepakĩ ea uĩmaiwẽ taea ana hawa dateama hiwekũkaĩshanikiki.

²³ Hunibu txakabu hatũ txakabuwẽ mawaibu ẽ betxipaiamaki. Hakia shinã betsa wakĩ hatũ txakabu henetã hiweaibu ẽ kupitiwẽ hawa dateama hau hiwekubaĩshanũbũ ẽ betxipaimiski. Ea Senhor Deusũ ẽ hãtxa txanimawẽ ẽ mestẽwaiĩ.

²⁴ Hakia tsuara pepai hiwebiakũkaĩmistũ hawẽ pepa hene keyutã txakabu dasibi inũ hawara ẽ betxipaiama ẽ danãmis akubainaiburã, ẽ hatu kupiama hiweyukũkainai dabanẽ mã shinaĩ? Haskamaki. Haskai pepa hiwekũkainima ẽ ana shinãma ea ikũwaĩ henei txĩtũtã ibubis hawẽ txakabuwẽ taea hau mawanũ ẽ kupishanaii.

²⁵ Ea ẽ pepa bestiwẽ ẽ matu mekebia matũ shinã txakakĩ mã ea txitemisrã, matu yuinũ nĩkakãwẽ. Matũ yuikĩ: ‘Senhor Deusũ nuku pewakubainamaki’, mã ikaii. Hakia mã Israelĩ enaburã, ẽ eamaki, txakaburã. Hakia ea binumakĩ ea nĩkama mã txakabuwamisbuki.

²⁶ Huni pepatũ hawẽ pepa henetã txakabukũkainairã, ibubis hawẽ shinã txakabuwẽ taea mawashanikiki, ẽ kupiarã.

²⁷ Hakia huni txakabũ hawẽ txakabu henetã ana parananãma inũ txanitxakama ikũkaini hawẽ hiwea pashashanikiki, ẽ kupiamarã.

²⁸ Hamẽ betsarã, tsuãra hawẽ txakabu betsa betsapa unãtã henekĩ shinã betsa watã txanima hiweyushanikiki, ẽ kupiamarã.

²⁹ Ẽ Senhor Deus mã Israelĩ enabũ ekiri yuikĩ: ‘Senhor Deusũ pepawẽ nuku mekeismaki’, mã ikaya haskakĩ ẽ yunutiwẽ ẽ matu pe hiwemaismamẽ? Hakia mã matumamẽ, pepa aki mã hiweismarã?

³⁰ Mã Israelburã, matu tibi haska mã hiwemiswẽ taea eã ẽ matu unãti watirumamẽ? Ea Senhor Deusũ ẽ hãtxa txanima ẽ mestẽwaiĩ. Ibubis mã ea sinatamabiamis hawẽ taeshũ ẽ matu kupiyamashanũ matũ txakabu dasibi hawaira hene keyurikãwẽ, hamẽ matũ hiwea mã benuyamashanunã.

^31-32 Ea sinatamakubaĩkĩ matũ txakabu haska mã akubainai henetã shinã pepa shinãkĩ yushĩ pepa bena bikubaĩkãwẽ. Tsua mã mawayamanũ, iwanã, ẽ betxipaiamawẽ taea Israelĩ enabuũ, kupia yumaĩ haskai mã mawashanai? Matũ txakabu hene keyutã hiwei perikubaĩkãwẽ, ẽ hawẽ taeshũ ẽ matu kupiyamashanunã. Ana txakabuwama hiwei pe bestikubaĩkãwẽ, akĩ ea Senhor Deusũ ẽ hãtxa txanima ẽ mestẽwaiĩ”, ikaya ẽ hatu yuishuniki, Israelĩ enaburã.