2 Reis 6 - Kaxinawá Bíblia (BR)

Due henẽ pukua dami wakĩ Eliseũ nũtanikiaki, na hãtxarã

¹ Txipu shaba betsatiã Deusũ hãtxa yuishunikabu Eliseube hiweshũ betsã Eliseu yuikĩ: —Uiã. Mibe hiwea hanu nũ ushamis dĩtu hashuhairaki.

² Ana hiwe bena ewapa wakĩ hashpa duakabi wanũ ika Hene Jordão keshakea nuku tibitũ hi bestitxai txaipa nũ meshtei kai mĩ nuku yunutirumẽ?— akabu Eliseũ hatu yunukĩ: —Butãkãwẽ— hatu waya

³ betsã Eliseu yuikĩ: —Hamaki. Nuku banawakaini nukube kawe— aka kemakĩ: —Peki. Ẽ matube katiruki— ikaini

⁴ Hene Jordão anu hatube Eliseu butua hanushũ hi meshtekĩ taewaibũ

⁵ huni bestitxaitũ hi meshtekĩ taewaya due hawẽ bake anua hãtsekekaini henẽ pukuai uĩ sai ikĩ yuikĩ: —He ee. Pemaki! Yusinaã, na duerã, huni betsana ẽ beãshuki. Ẽ haska washanai?— aka

⁶ Eliseũ yukakĩ: —Hani kaya pukushumẽ?— aka hanu pukushu anu metua hanushũ Eliseũ hi txaipa meshteshũ hanu due pukushu anu putakĩ urẽshũ dami wakĩ due nũtãtã

⁷ yunukĩ: —Neshewe!— aka meshũkaĩ due tsumatã neshebaini benimabaĩkĩ hi buaibũ

Síria nawabu Eliseũ hatu unãtimaska wanikiaki, na hãtxarã

⁸ Síria nawa shanẽ ibuhairatũ Israelĩ enabu maemanũ ika ana hatube datenameaibu hawẽ detenamenikabu shanẽ ibubube itxa hatube yubakai Síria nawa shanẽ ibuhairatũ hatu yuikĩ: “Hune hari bushũ Israelĩ enabu detenamenikabu e imatã maemakĩ nũ hatu keyushanaii”, hatu wakĩ hari hanu huneshanaibu hatu yui yubakai

⁹ hatũ shinã haskaibu Eliseũ unãtã Israelĩ enabu shanẽ ibuhaira anu Eliseũ hawẽ hãtxa bumakĩ yuikĩ: “Síria nawa detenamenikabu hari huneshũ matu detekatsis iki manaibuwẽ taea hari buyamashãkãwẽ”, hatu wa

¹⁰ Israelĩ enabu shanẽ ibuhaira Eliseũ yuia hawẽ hãtxa nĩkatã Síria nawa detenamenika huneabu dũkekubainibukiaki.

¹¹ Hanua Síria nawa shanẽ ibuhaira haska shinãtiruma hawẽ shanẽ ibu beshmasbu hatu kena itxabu hatu yuikĩ: —Ea yuikãwẽ, haska nũ yubakamis tsua nukunabu kashũ Israelĩ enabu shanẽ ibuhaira bebũkiri yuitãtãmismẽkainã— hatu wa

¹² habu bestitxaitũ kemakĩ yuikĩ: —Shanẽ ibuũ, nukũ nũ yuismaki. Hakia Deusũ hãtxa yuishunika Eliseu Israelĩ enabube hiweshũ haska mĩ hune nuku yuimis inũ haska mĩ ushatianua mĩ hãtxai unãtã Israelĩ enabu shanẽ ibuhaira unãmakĩ hawẽ shanẽ ibuhaira yuimiski— aka

¹³ nĩkatã hatu yunukĩ: —Hau Eliseu atxinũbũ ẽ hanu hatu yunutiru yuka ikaũkĩ unãti watãkãwẽ— hatu waya huni betsã nĩkatã hawẽ shanẽ ibuhaira yuikĩ: —Israelĩ enabu mai pakea anu mae betsa hawẽ kena Dotã anu ikis hiweakiaki— aka

¹⁴ hanua hawẽ detenamenikabu itxapa cavaloki katsaumebainaibu inũ, cavalõ tarãbaĩtiki mapubainaibu inũ, hatiri maĩ buaibu Síria nawa shanẽ ibuhairatũ hatu yunua hune meshu merã bui Dotã anu hikitã mae hirabi kebauni nati ikabũ

¹⁵ ushashini bestẽkauã penamahaira Eliseũ dayaru betsa butukaĩkĩ cavaloki katsaumeabu inũ cavalõ tarãbaĩtiki mapuabu itxapabu mae hirabi kebauni nati ikabu uĩ datekaini ana hiwe merã hikishũ Eliseu yuikĩ: —Yusinaã, nukũ mae hirabi keshebaunabuki. Ikisrã, nũ haskai?— aka

¹⁶ Eliseũ yuikĩ: —Nukũ merabenanikatunarã, hatuna binuaki, habutimarã. Hawa dateyamawe— iwanã,

¹⁷ Eliseũ Senhor Deus ea akĩ yuikĩ: “Hau hatu uinũ ẽ dayarũ beru betsa watã uĩmawe”, atã “Senhor Deusuũ, haska ẽ mia ea akaii”, aka Senhor Deusũ hawẽ beru bepeshkĩ pewashuna, txi keska katsaumeabu itxapahaira inũ txi keska cavalõ tarãbaĩtiki mapuabu itxapahairari mati anu Eliseũ hiwe keshekĩ keyubaunabu hawẽ dayarũ uĩbaunaya

¹⁸ atxinũ ika Síria nawabu txaima bei taeaibũ Eliseũ Senhor Deus ea akĩ yuikĩ: “Síria nawabu beaibu mĩ hatũ beshush wakĩ betsa wanũ ẽ mia ea akaii”, aka haska Eliseũ ea akai keska habũ shinã haikaimas wakĩ Senhor Deusũ hatu beru betsa wakẽ

¹⁹ hatu unãtimaska wakĩ Eliseũ hatu yuikĩ: —Narã, ha baimaki. Ha maewã mã benairã, nenumaki. Ha huni mã benai anu matu iyunũ ea txibãbaĩkãwẽ— hatu watã Samaria maewã anu hatu iyua

²⁰ hikitã Eliseũ ana dayuikĩ: “Senhor Deusuũ, hau shinãkĩ uĩ pewanũbũ ikis habũ beru pewakĩ betsa wawe”, aka hanushũ Senhor Deusũ hatũ beru betsa waya bepesheai keskatã uĩbaũkĩ: “Habaa! Nũ Samaria merãki!” ikĩ uĩ dateaibũ

²¹ Israelĩ enabu shanẽ ibuhairatũ hatu uĩtã Eliseu yukakĩ: —Epaã, dete keyukĩ hatu tenãpa?— aka

²² hakia Eliseũ kemakĩ: —Haskamaki. Hatu tenãyamawe. Pia inũ matxatu txaipawẽ detenamekĩ huni betsabu atxitã txipu mã hatu tenãmismẽ? Nũ haska beyatirumaki. Hakia hatũ detenameti dasibi hatu mebĩ keyutã piti inũ mabesh hatu pimakãwẽ. Hau yaniwatã hatũ shanẽ ibuhaira anu hau unanuma bunũbũ hatu nitxĩkãwẽ— aka

²³ piti pepa inũ mabesh pepa itxapa aĩbuaibũ bawabu hatu inãkubaunabu, pikĩ mabesh akĩ keyuabu, Israelĩ enabu shanẽ ibuhairatũ unanuma hatu nitxiã, hatũ mae Síria nawa shanẽ ibuhaira anu txĩtũbainaibũ haska wakĩ Israelĩ enabu Síria nawabũ hatu date date atã hatũ mai pakea ibuwakubaĩmisbu hatu heneyubainibukiaki.