2 Reis 5 - Kaxinawá Bíblia (BR)

Síria nawa Naamã bitxiki txamima teneai Eliseũ kaya wanikiaki, na hãtxarã

¹ Habiatiãri Síria nawa shanẽ ibuhairatũ hawẽ detenamenikabu shanẽ ibu yununika hawẽ kena Naamã pehaira Senhor Deusũ merabewakĩ Síria nawabu haki sinataibu hawẽ detenamenikabubetã Naamãnẽ hatu maemamakĩ keyuimawẽ taeshũ Síria shanẽ ibuhairatũ Naamã betxipaihairaya isĩ betsa bitxiki txamima tenekubainikiaki.

² Ano betsatiã Síria nawabu yumetsui bushũ Israelĩ enabu mai pakea anushũ hatu mese mese watã hatũ mabu inũ aĩbu txipash yumetsubaĩkĩ iyuyamabu ha txipash Naamãnẽ ainẽ dayaru escravo wayama

³ shaba betsatiã ha Israelĩ enabu txipashã Naamãnẽ aĩ yuikĩ: —Ẽ tsuma mĩ benerã, Samaria anu kashũ Deusũ hãtxa yuishunika Eliseube hãtxakĩ ea aka ha bitxiki txamima shusha watiruki— aka nĩkatã hawẽ bene habias yuia nĩkariatã

⁴ hawẽ shanẽ ibuhaira anu Naamã kashũ habias hãtxa ha txipash hãtxashinakiri banabimakĩ yuia

⁵ Síria nawabu shanẽ ibuhairatũ kemakĩ yuikĩ: —Peki. Ikis hatũ shanẽ ibuhaira ẽ mia keneshunaii. Ẽ kene bui katãwẽ, hau mia shushawanunã— aka kakĩ 30.000 prata pei heshe inũ 6.000 ouro pei heshe inũ 10 haya besiti tari pepa hawẽrua bui Samaria anu hawẽ tsumabube Naamã kashũ

⁶ hawẽ shanẽ ibũ kene buma Israel shanẽ ibuhaira inã bitã dĩtu betsa anu kashũ kene bepẽshũ uĩkĩ hawẽ hãtxa keneshina yuikĩ: —Ẽ hãtxa uĩkĩ hawẽ bitxiki txamima hau mĩ shushawanũ ẽ shanẽ ibu beshmas Naamã mianu ẽ nitxiaiĩ, mĩ uinunã. Ea shushawashũwẽ— akĩ

⁷ keneshina Israelĩ enabu shanẽ ibuhairatũ ha kene uĩ keyutã hawẽ datekĩ hawẽ tari ushnitã hawẽ anibu unanepabu hatu yuikĩ: —Earã, ẽ Deus keskamẽ? Hatũ besti hiwea hatu inãtã hatu mebĩmiskẽ ẽ haska keskari watiru shinãkĩ ha shanẽ ibũ hawẽ huni betsa bitxiki txamima ẽ shushawashũtiru ea yunushinaki. Shinãkĩ uĩrakãwẽ. Nuku haska wakĩ nuku unãti waikiki, nukuki ana sinatakatsirã— hatu wa

⁸ shanẽ ibũ kene uĩtã datekĩ hawẽ tari ushnishina txanibaunaibu Deusũ hãtxa yuishunika Eliseũ nĩkatã Israelĩ enabu shanẽ ibuhaira anu hau hãtxa bunũbũ: “Haskakĩ mĩ tari mĩ ushnishinamẽ? Ha huni ea anu yunuwe, hau ea uĩyununã. Hatũ ẽ Deusũ hãtxa yuishunika Israel anu ẽ hiwea hau tapĩyununã”, hatu wa bushũ shanẽ ibuhaira yuiabu,

⁹ nĩkatã Eliseu anu Naamã yunua hawẽ tsumabu cavalo katsaumeabube hawẽ cavalõ tarãbaĩtiki mapua bui Naamã kai Eliseũ hiwe bebũ niti ika nikẽ

¹⁰ ibubis kama hãtxa bunika Eliseũ yunua kashũ Naamã Eliseũ hãtxa yuishũkĩ: “Jordão Hene anu ka bututã 7ki nashi pukutãtani txukitãwẽ. Mĩ haskaya mĩ bitxiki txamima shushai mĩ yura sakara iki mĩ shũpĩshanaii”, aka

¹¹ haska wa nĩkatã Naamã sinatahairakĩ hawenabu yuikĩ: —Tashnikirã eki nukutã ea dapi nishũ hawẽ mekenika Senhor Deus ea yukashũkĩ ẽ bitxiki txamima hawẽ mekẽnẽ ea mebaũkĩ ea shushawashanimẽkaĩ, iwanã, ẽ shinãbiabirãshina haska wakinã, ea maĩwaĩmẽkaĩ.

¹² Damasco anu nukũ hene dabe Abana inũ Farpar Israelĩ enabũ mai pakea anua keskamaki. Nukuna pehairaki, dasibi hatuna binuarã. Shushanũ ika nukũ hene dabe anu ẽ nashitirumamẽ?— ikaini sinatahairatã hanua kaya

¹³ hakia hawẽ dayarubu ha dapi bushũ yuikĩ: —Shanẽ ibuũ, Deusũ hãtxa yuishunikatũ mia merabewakĩ: “Hawara bikahairawẽ ea yunuwe”, ishũ mĩ haskakiri shinaĩ? Hawẽ hãtxa txibaĩ mĩ ikatsi ikamaki. Hakia: “Hene Jordão anu nashitãwẽ”, akĩ mia yunua nashitã mĩ shushatiruki, iwanã, mia yuishurã, hawa bikamaki. Iki kawe— akabu pes nibiabai

¹⁴ habũ pe shinaĩ hatu nĩkatã Hene Jordão kesha anu butua haska Deusũ hãtxa yuishunika Eliseũ yunushu keskai 7ki nashi pukutãtani neshekeaya hawẽ bitxiki txamima shushai hawẽ yura berunã bitxi keskai shũpĩ ana detsis mese neamakẽ

¹⁵ hawẽ yura ma shusha uĩtã Naamã inũ habe beshiãbu Eliseu anu ana txĩtũbaini haki nukunũ ibaini Eliseu tashnia nia Naamã haki kematã yuikĩ: —Nenu Israelĩ enabu anu Deus Kayabi hayaki. Ikis ẽ ikũwaiĩ. Txanima mai hirabi anu Deus betsa hayamaki. Ẽ mĩ dayaruwẽ taeshũ hawara pepa mia inãkuinũ ishũ ẽ mia ea akaii— aka

¹⁶ Eliseũ kemakĩ yuikĩ: —Senhor Deusũ ea uiãyã ẽ mia yubaii. Haska mĩ hawara ea inãkatsis ikai ẽ bitirumaki— aka —Haskama biwe! Biwe!— akĩ heneamabia hawa biama Eliseũ hawa bikatsi ikama nemahairakubainaya

¹⁷ hawa biama Naamãnẽ unãtã ana yuikĩ: —Haskawẽ taeshũ yushibubu kẽwãkĩ mabuwẽ duawakĩ inabu ẽ ana kuakĩ menukĩ keyuama ishanaii. Mĩ mekenika Senhor Deus besti kẽwãkĩ inabu kuakĩ ẽ menukĩ keyukubainaiwẽ taeshũ Israelĩ enabũ mai pakea anua saku ewapa dabe inũ dabe mai mata washũ mula dabeki dũtãrabetã ẽ mae anu butãpa? Hi bau watã ha mai mãtxiã anu haki dãti ika beti ishũ Senhor Deus besti ẽ kẽwãkubaĩshanaii.

¹⁸ Hau ea kupiyamashanũ na besti Senhor Deus ea yukashũkubaĩshãwẽ. Yushibu Rimom kẽwãti hiwe anushũ ẽ shanẽ ibuhairatũ kẽwaĩ kakĩ ẽ pũyã ea pũtsũbaĩkĩ ea iyua ẽ habe hikikaĩ ẽ habe dãti ika beti ikũkainaya ẽ txakabu Senhor Deusũ hau ana shinãyamanũ ea yukashũkubaĩshãwẽ, hau ea kupiyamashanunã— aka

¹⁹ Eliseũ kemakĩ yuikĩ: —Peki. Deus ẽ mia yukashũkubaĩshanaii. Dateama unanuma kai petãwẽ— aka mai bitã hanua Naamã hawenabube kaĩkaini txaihaira kariamakẽ

²⁰ Eliseũ dayarũ shinãkĩ: “Mabu pepa hamẽ beshiãbu Eliseũ hawa biama Síria nawa Naamã ẽ tsuma Eliseũ ma nitxiãki. Senhor Deuswẽ ẽ yubakaii. Hawaira txibaĩ kushikaini haki nukushũ hawara bewanaibu eã ẽ bi kaii”, ikaini

²¹ kushikaĩkĩ Geazĩ Naamã txibaĩ ha itxũ kushikainaya nasaukeshũ Naamãnẽ uĩtã hawẽ cavalõ tarãbaĩti niti atã mananũ ika butua nikẽ ma haki nukua Naamãnẽ yukakĩ: —Hawa kaya ẽ txakabuwabiranai mĩ txibaĩ?— aka

²² Geazĩ kemakĩ yuikĩ: —Hawamaki. Hakia Efraimnẽ enabũ mati matipa anua Deusũ hãtxa yuishunika berunã dabe dama bei hikikãshu ẽ mia yuiyunũ ẽ tsumapã ea yunushuki. 3.000 prata pei heshe inũ 2 haya besiti tari hawẽrua mĩ hatu inãkuĩtirukiaki. Haska ẽ mia yukayushuki— aka

²³ Naamãnẽ kemakĩ: —Haska bestima menã 6.000 prata pei heshe hatu bishũriwe— akĩ hau binũ yunuhairatã saku dabeki 6.000 prata pei heshe inũ 2 haya besiti tari mistukĩ naneshũ hau bushunũbũ hawẽ dayaru dabe iamashũ Geazi bebũ hatu nitxiã

²⁴ kai Geazi hatube mapeketã saku dabe hatu mebĩshũ nitxiã buaibũ hiwe hune anu arutã

²⁵ txipu hawẽ tsuma Eliseu bebũ ni tushiai yukakĩ: —Geaziĩ, harakiria mĩ huai?— aka Geazinẽ kemakĩ yuikĩ: —Ẽ harakiri kamaki— aka

²⁶ hakia hãtxa kushipawẽ Eliseũ yuikĩ: —Mia inũ ika hawẽ cavalõ tarãbaĩti anua Naamã butuai ẽ yushĩ mibe nishũ dasibi ẽ uĩshuki. Pei heshe inũ haya besiti tari hawẽrua mĩ bishurã, pemaki. Yunu bai inũ, uva nishi beshea bai inũ, txashuwã inũ, ina awa inũ, huni dayarubu inũ, aĩbu dayarubu ha peiwẽ mĩ bikatsis ikai txakabuhairaki.

²⁷ Haskawẽ taea Naamã bitxiki txamima shushakaĩshurã, mikiri tekikũkaĩshanikiki. Mia bestimarã, mĩ bakebu pakubainaibu ha bitxiki txami ipapakeshãkanikiki— aka ana dayashunama Eliseũ hiwe anua tashnikaini Geazi hawẽ yura hirabi ma txami keyua matsi tãkia keska hushupahaira uinibukiaki.