2 Reis 4 - Kaxinawá Bíblia (BR)

Suném anu aĩbu hiwea Eliseũ merabewanikiaki, na hãtxarã

⁸ Eliseu hawẽtsaĩs mae tibi anu katã katãmis shaba betsatiã mae betsa Suném anu daĩbainaya hau hatubetã piyunũ aĩbu pepa enaya mabuyatũ kena txakayamamiswẽ taeshũ Eliseũ hatubetã pibainimashũ txipu hawẽtsaĩs hawẽ mae daĩbaĩkĩ hawẽ hiwe anu hikishũ hatubetã pikubaĩmiswẽ

⁹ taeshũ aĩbũ hawẽ bene yuikĩ: —Baa, ea nĩkawe. Ha huni hawẽtsaĩs hukirã hukirani nukuki bamisrã, Deusũ hãtxa yuishunika meribiki. Ẽ unaiĩ.

¹⁰ Nukũ hiwe sapa sheni mamaki hawẽ dĩtu betsa hawena washunãwẽ. Dĩtu washũtã hawẽ dakati inũ, hawẽ tapu inũ, hawẽ tsauti inũ, hawẽ bĩ nũ pewashũtiruki. Hanu nukuki ana bai hua hanu ushakũkaĩtiruki— aka hawẽ ainĩ hãtxa txibãkĩ haska yuia hau ashunũbũ hawẽ benẽ hawẽ dayarubu hatu yunua hawaira ashũshinabũ

¹¹ betsatiã hua hanu ushakĩ Eliseũ

¹² hawẽ merabewanika Geazi yuikĩ: —Ha aĩbu Suném anua ea yuishũtãwẽ— aka kenashũtana Eliseu bebũ nikẽ hawẽ merabewanika yunukĩ:

¹³ —Nukuwẽ nuikĩ nuku duahairawamis nũ hawa ashũkĩ merabewatirumẽkaĩ, yukawe, merabewai Samaria shanẽ ibuhairabe hakiri nũ hãtxashũtiru inũ detenamenikabu shanẽ ibube hakiri nũ hãtxashũtirumẽkainã— aka habias hãtxa Eliseũ hawẽ merabewanikã aĩbu yuishuna aĩbũ kemakĩ yuikĩ: —Nenu enabube hiwea ẽ hawa hatube txakabumaki— abaini kaya

¹⁴ Eliseũ hawẽ merabewanika ana yukakĩ: —Ha aĩbu haskakẽkaĩ, nũ hawa ashũtirumẽ?— aka hawẽ merabewanika Geazĩ kemakĩ yuikĩ: —Ẽ unãmaki. Hakia ha aĩbu hawa bakeuma inũ hawẽ bene ma mestebuki— aka

¹⁵ Eliseũ ana yunukĩ: —Ana kenatãwẽ— aka kashũ kenatana aĩbu hua beputi kesha nikẽ

¹⁶ Eliseũ aĩbu yuikĩ: —Na ano betsa huaiki na habia usheki huni bake kaĩtã mĩ ikushanaii— akaya datekĩ kemakĩ yuikĩ: —Ẽ shanẽ ibuũ, mĩ Deusũ huniwẽ taea eki paranayamawe, mĩ tsumakirirã— aka

¹⁷ hakia haska Eliseũ yuikĩ banabimabainima ma bake bima tuyakẽ ano betsaki huni bake kaĩma

¹⁸ shaba betsatiã bai anushũ shekiwã trigo tsekaibu anu ha bake ewai keyatapariamabia hawẽ epa uĩ ka

¹⁹ harishũ bakeishtã hawẽ epa yuikĩ: —Arii, arii! Ẽ bushka ẽ isĩhairaii!— ikai hanushũ hawẽ epã hawẽ tsuma betsa yuikĩ: —Hawẽ ewa anu ea iyushũtãwẽ!— aka

²⁰ bakebaĩkĩ hawẽ ewa anu iyua hawẽ ewa shãtxuramea tsaua isĩ tenei pikuhairatã bari mananãbi bakeishta mawaya

²¹ Deusũ hãtxa yuishunikatũ dĩtu anu bakebaĩ manaũri iyushũ hawẽ dakati anu hanatã kaĩkaĩkĩ hawẽ beputi bepubaini

²² datehairakaĩ hawẽ bene kena hawaira hua yuikĩ: —Deusũ hãtxa yuishunika anu ẽ hawaira kushikaĩkatsis ikai haratura nukũ dayaru betsabe jumenta kushipa ea yunuwe, ẽ hawairakirãkatsis ikairã— aka

²³ hawẽ benẽ yukakĩ: —Haskakĩ ikis mĩ uĩ kakatsis ikai, ushe benatiã inũ huĩrukũtitiã nũ hanu habe itxamis ikis iriamabiakenã?— aka kemakĩ yuikĩ: —Ea haska shinãshũyamawe— aka

²⁴ haska shinaĩ keska hawẽ benẽ yunua hawẽ tsauti dabe kabekãti dabe kabekãshuna aĩbu haki katsaumea, hawẽ dayaru hatxũ kai aĩbũ yunukĩ: —Hau jumenta hawaira kushikainũ kusha kusha akubaĩwẽ, hau niti iyamanunã. Ẽ mia yuiriama niti imayamawe. Ẽ mia yunuaya besti niti imashãwẽ— aka

²⁵ jumenta kushikaini Mati Carmelo anu Deusũ hãtxa yuishunika hiwea anu kemaibũ hanua Eliseũ txai beiaibu uĩkĩ hawẽ merabewanika Geazi yuikĩ: —Uĩwẽ! Suném anu hiwea aĩbu huikiki.

²⁶ Kushikaĩ haki nukushũ: “Mĩ haskaramẽ? Mĩ bene inũ mĩ bakerã, haskaramẽ?” akĩ yukatãwẽ— aka kushikaĩ haska yukabia yui pewama: —Ẽ peki— abestibirani niti ikama

²⁷ mati anu mapekea Eliseuki nukutã dãti itã hawẽ bikerã dabe ikua, Geazĩ mepamanũ ikai Eliseũ nemakĩ: —Hawẽ huĩti nishmahairaki. Haskakirana ikimẽkaĩ, meyamawe. Haskashu Senhor Deusũ ea yuiriamaki— aka

²⁸ hanushũ aĩbũ Eliseu yuikĩ: —Shanẽ ibuũ, bakeyakatsi ẽ mia yukama iniki. Haska mia yukama eki paranayamawe, iwanã, ẽ mia yuiniki— aka

²⁹ hawẽ shinã unãtã hawẽ merabewanika Geazi Eliseũ yunukĩ yuikĩ: —Hawaira petã kushikaĩkĩ ẽ mestẽti bibaini hawẽ hiwe anu katãwẽ. Tsuarakira mĩ nukua habe hãtxakĩ yukayamabaĩtãwẽ. Tsuãra mia yukai habe hãtxakĩ kemayamawe. Hawẽ hiwe anu hikitã hawẽ bake daka anu ẽ mestẽti hawẽ besu anu hanatãwẽ— aka Geazi hawairakaini kaya

³⁰ hakia ha bakeishtã ewã Eliseu yuikĩ: —Senhor Deus hiwea inũ mĩ hiweawẽ taeshũ miauma nenua ẽ kamaki, iwanã, ẽ mia yubaii. Ea nĩkawe— aka haska wa nĩkatã Eliseu aĩbube kaya

³¹ haskaitiã ha dukũ bebushũ Eliseũ mestẽti Geazĩ bakeishtã besuki hanabia hatũ hiwea inãma hawẽ bake hawa tukuamahairakẽ txĩtũkaini Eliseuki nukushũ Geazĩ yuikĩ: —Haska mĩ ea yunua ẽ abiashu hawẽ bake hawa tukui besteãmahairaki— aka

³² Eliseuri manaũri hawẽ dĩtu anu mapeketã hawẽ dakatiki bakeishta mawa meshã daka

³³ Eliseu bakeishta daka anu hikikaĩ hawẽ beputi beputã hau merabewanũ Senhor Deus dayuikĩ yukatã

³⁴ habe ma hãtxashũwẽ taea ha daka anu haki inai bakeishta mamaki beushũ bakeishtã kesha inũ hawẽ beru inũ hawẽ mekẽ mekĩ sheyuakeakea bakeishtã yura shanai taeaya

³⁵ Eliseũ txibututã benitã Senhor Deusbe ana hãtxai hawẽ dĩtu merã nikukui henetã hawẽ dakati anu ana haki inai beutã bakeishta ikua dakakẽ hawaira bakeishta besteĩ 7ti axkĩ axkĩ iki bepesheaya

³⁶ Eliseũ jumenta Geazi kena, hawẽ dĩtu anu hikia yuikĩ: —Hawẽ ewa Suném anua ea kenashũtãwẽ— aka Geazi kaĩkaini kashũ hawẽ ewa kena dateyabi ka, Eliseu anu hikia yuikĩ: —Na ma ana hiweaki, mĩ bakerã— aka

³⁷ aĩbu benimahairakĩ Eliseu anu dãti ishũ yuitã hawẽ bake itã kaĩkainikiaki.