2 Reis 24 - Kaxinawá Bíblia (BR)

¹ Jeoaquim shanẽ ibuhairaitiã nawa betsa Babilônia shanẽ ibuhaira Nabucodonosor hushũ Judá enabũ mai pakea dasibi anu hawẽ detenamenikabubetã hatu detekĩ shanẽ ibu Jeoaquim babu watã inũ kaĩmakẽ Nabucodonosorĩ yunuti hãtxa Jeoaquimnẽ nĩkakubaĩkĩ 3 ano henekĩ hawẽ shinã betsa watã hawẽ yunuti hãtxa ana txibãkatsi ikama heneaya

² haskashanaibukiri Deusũ tsumabu hawẽ hãtxa yuishunikabu hatu hãtxamakĩ haska washanai Senhor Deusũ bebũkiri hatu banabimaniwẽ taeshũ Judá enabũ mai pakea itxakawakĩ txakabuwakubainũbũ Caldéiau nawa yumetsubu inũ, Síria nawa yumetsubu inũ, Moabe nawa yumetsubu inũ, Amom nawa yumetsubu shanẽ ibuhaira Jeoaquim anu Senhor Deusũ hatu yunukubainaya

^3-4 hunibu hawa txakabu hayamabiakẽ Jerusalém anushũ shanẽ ibuhaira Manassésĩ hamẽ hatu detekĩ mirima tenãkubaĩkĩ Senhor Deus danãkĩ txakabu betsa betsapa akubainiwẽ taeshũ hawẽ berubi Senhor Deusũ hatu putakĩ nitxĩkatsis ikaiwẽ taeshũ Judá enabu itxakawakĩ yumetsukubainaibũ hatiã hatũ txakabu Senhor Deusũ ana hatu buashũkatsi ikama inikiaki.

⁵ Judá enabu shanẽ ibuhairabu ikubainaibukiri una betsa merã hatu kenemisbu hawẽ daya betsa betsapa Jeoaquim hiweshũ akubainikiri hakiri kenenibu hayaki.

⁶ Jeoaquim mawa maiwabu hawẽ epã shãtukũ Jeoaquimnẽ huni bake Joaquim Judá enabu shanẽ ibuhaira taeaya

⁷ Hene Eufrates anushũ Egito nawa detenamenikabu maemakĩ taewakĩ hanira hatũ mai pakea Egito shanẽ ibuhairatũ hatu atxinibu Babilônia shanẽ ibuhairatũri ana hatu mebĩkĩ atxibirãkĩ Egito mai pakea kesha anu pashku napaku hawẽ kena Egito pashku anu atxĩkĩ Babilônia shanẽ ibuhairatũ heneimawẽ taea mai pakea betsa ana hawẽ shanẽ ibu hayamawẽ taea Egito nawa shanẽ ibuhaira ana hawẽ mae anua tashniama ikũkainikiaki.

Shanẽ ibuhaira Joaquim inũ hawẽ shanẽ ibu beshmasbube Babilônia anu hatu iyunibukiaki, na hãtxarã

⁸ Joaquim ma 18 ano haya shanẽ ibuhairai taeshĩshũ Jerusalém anu hatu yunui ushe dabe inũ besti hatũ shanẽ ibu inikiaki. Hawẽ ewã kena Neústa inikiaki, Elnatã aĩbu bakerã, Jerusalém anua kainirã.

⁹ Hakia hawẽ shenipabũ apaunibu keska txibãkĩ Joaquimnẽ yunutxakakĩ txakabuwarianikiaki, haska Senhor Deusũ betxipaiamahaira akinã.

^10-12 Joaquim shanẽ ibuaitiã Nabucodonosor Babilônia shanẽ ibuhairakĩ hatu yunukubaini ma 8 ano kaĩkĩ Nabucodonosorĩ detenamenikabu itxapabu hau Jerusalém atxinũbũ hatu yunua beshĩshũ Jerusalém kebauni nati itã atxi taewakĩ pia bishku bishku akĩ mashash tũku puta puta akĩ hashi urẽ urẽ akĩ hatũ mae mishki kenebaunibuki mai mãtxĩkĩ taewaibũ hatũ shanẽ ibuhaira Nabucodonosor hui hatuki nukutushiaya Joaquimnẽ hawa hatu maematiruma unaĩwẽ taea Judá enabu shanẽ ibuhaira Joaquim inũ, hawẽ ewa inũ, hawẽ dayaru shanẽ ibu beshmasbu inũ, hawenabu shanẽ ibu beshmasbu inũ, huni unanepabu hatube hune hãtxamisbu Jerusalém anua tashnibaini Babilônia shanẽ ibuhaira bebũ mapuabũ hau hatu atxinũbũ hawẽ detenamenikabu yunua hatu atxishũ hawa hatu itxakawakĩ meama mekekubainaibũ

¹³ Jerusalém merã hikishũ Senhor Deus kẽwãti hiwe anushũ pei heshe inũ mabu karuhaira dasibi bishũ shanẽ ibuhairatũ hiwe anuari hikishũ pei heshe inũ mabu karuhaira dasibi biriashũ Senhor Deusũ kẽwãti hiwe hawẽruahaira wakĩ shanẽ ibuhaira Salomãonẽ hatu yunua ourowẽ hiwe uke merã dasibi napushbaunibu inũ hawẽ kẽwãti mabu dasibi hatu bepush keyumani hau babekĩ keyunũbũ shanẽ ibu Nabucodonosorĩ hatu yunua hanu hikishũ ouro dasibi babe babe akĩ keyushũ hatũ shanẽ ibuhaira inãnibukiaki, haska Senhor Deusũ bebũkiri hatu yuini keska wakinã.

^14-16 Jerusalém anua hatu atxikãshu hau Babilônia anu hatu iyunũbũ hawẽ detenamenikabu Joaquim inũ, hawẽ ewa inũ, hawẽ aĩbuaibu inũ, hawẽ shanẽ ibu beshmasbu habũ mae yunumisbu dasibi Nabucodonosor hatu yunua hatu iyuaibũ, txipu ha katxu Jerusalém anu hiweabu mirima yurabu shanẽ ibubu dasibi inũ, detenamenika pepabu inũ, mabu wanikabu dasibi inũ, mane dayamisbu dasibi hatu atxikĩ itxawashũ 10.000 tana keyushũ 7.000 shanẽ ibu beshmasbu inũ 1.000 mabu wanikabu inũ, mane dayamisbu ha dikabi huni kushipabu detenameti tapĩtirubu Babilônia anu hau hatu iyunũbũ Nabucodonosorĩ hatu yunua hatu iyuaibũ yurabu habu hawauma nuitapahairaibu besti hatu henebainibukiaki.

¹⁷ Hanushũ hawẽ hutxĩ betsã bake mashku Matanias Babilônia shanẽ ibuhaira Nabucodonosorĩ katushũ Judá enabũ mai pakea shanẽ ibuhaira watã hawẽ kena betsa wakĩ kenakĩ: “Zedequiaski”, atã hanua hawẽ mae anu kanikiaki.

Zedequias shanẽ ibuhaira inikiaki, na hãtxarã

¹⁸ Zedequias 21 ano haya shanẽ ibuhairai taeima Jerusalém anu 11 ano hatũ shanẽ ibu inikiaki. Hawẽ ewã kena Hamutal inikiaki, Jeremiasĩ aĩbu bakerã, Libna anua kainirã.

¹⁹ Hakia hawẽ betsa Joaquimnẽ akubaini keska Zedequiasĩ txakabuwariakubainaya Senhor Deusũ betxipaiama

²⁰ hatuki sinatakĩ Jerusalém inũ Judá enabũ mai pakea anua mekekĩ Senhor Deusũ ana habukiri shinãma hatu putanikiaki.