2 Reis 22 - Kaxinawá Bíblia (BR)

¹ Josias 8 anobia shanẽ ibui taeni 31 ano Jerusalém anushũ hatu yunui shanẽ ibuhairakũkainikiaki. Hawẽ ewa Bozcate anua kaini hawẽ kenarã, Jedida inikiaki, Adaíasĩ bakerã.

² Haska hawẽ shenipabu Davi pe hiwekũkaini keskai hatũ txibãkĩ hawa shinã betsa betsapa wama Josias hawa hiwe txakama pe dayakũkainai Senhor Deusũ haska betxipaiai ashuaĩ uĩ hawẽ benimakũkainikiaki.

Senhor Deusũ hãtxa Moisĩ unaki keneni arunibu atimas betxinibukiaki, na hãtxarã

³ Josias shanẽ ibuhairani ma 18 ano kaya hanushũ shaba tibi ikai hatũ keneshũmis Safã kenashũ Senhor Deus kẽwãti hiwe anu yununikiaki. Safãnẽ eparã, Azalias inikiaki. Hawẽ hutxirã, Mesulão inikiaki. Josiasĩ Safã yunukĩ yuikĩ:

⁴ —Nukunabu Deusbe hãtxashunika shanẽ ibu Hilquias anu kashũ uĩtãwẽ. Eska ẽ hãtxa ea yuishũtãwẽ: “Senhor Deus kẽwãti hiwe habũ beputi tibi mekeshũ yurabũ pei hatu inãkuiaĩbu itxawamisbu hau haki dasiwanũbũwẽ.

⁵ Senhor Deus kẽwãti hiwe hau pewakĩ benawamanũbũ Senhor Deus kẽwãti hiwe habũ pewaibu ha pei hatu inãwẽ, dayarubu ha peiwẽ hau hatu pakanũbunã. Habũ dayaru pepa benabaũkĩ katushũ hau habũ hawẽ dayaruburi pakakubaĩshanũbũwẽ.

⁶ Hawẽ kẽwãti hiwe hau hawẽ pewanũ, iwanã, mishki datsa bishanaibu inũ hi nisa bishanaibu hatu pakakĩ hanushũ habu dayaibu yununikabu inũ, hi dayanika habũ Templo pewaibu hatu pakakubaĩtirubuki.

⁷ Huni pepa hawa yumetsuisbumawẽ taeshũ hawẽ kẽwãti hiwe mekenikabu peikiri hau hatu unãti wakĩ yukayamashanũ Hilquias ea yuishũriatãwẽ”— aka Safã kashũ hawẽ shanẽ ibũ hãtxa Hilquias yuia

⁸ hanushũ hawenabu Deusbe hãtxashunika shanẽ ibu Hilquiasĩ Safã yuikĩ: —Senhor Deus kẽwãti hiwe anu hawẽ yunuti inũ hawẽ nemati hãtxa Senhor Deusũ Moisés yuia una merã keneni ẽ betxishinaki. Butãwẽ— akĩ inã Safãnẽ mebĩbaini kashũ ha una uĩ keyutã

⁹ txipu hawẽ shanẽ ibu yuinũ, iwanã, Safã kashũ yuikĩ: —Senhor Deus kẽwãti hiwe anua pei betxikĩ itxawatã hau pewanũbũ hawẽ kẽwãti hiwe mekenikabu mĩ dayarubu Deusbe hãtxashunikabũ pei hatu inãkãshuki— iwanã,

¹⁰ —Ha dikabi nukunabu Deusbe hãtxashunika Hilquiasĩ ea una inãshuki— atã shanẽ ibuhaira Josias ha una Safãnẽ yui keyushuna

¹¹ hawẽ yunuti inũ hawẽ nemati Moisĩ keneni hãtxa nĩkatã datekĩ shanẽ ibuhaira Josiasĩ hawẽ tari ushnitã

¹² Hilquias inũ, Safãnẽ huni bake Aicão inũ, Micaíasĩ huni bake Acbor inũ, kenekubaĩmis Safã inũ, hawẽ merabewanika Asaías hatu kenakĩ itxawashũ hawaira hatu yunukĩ

¹³ yuikĩ: —Haska hawẽ yunuti inũ hawẽ nemati na una merã keneni ẽ nĩkashukiri bushũ eakiri inũ, na Jerusalém anu hiweabu inũ, Judá enabũ mai pakea anu hiweabu dasibi Senhor Deus nukukiri yukashũtãkãwẽ. Na una merã Moisĩ keneni nukũ shenipabũ hawa nĩkabuma inũ hawa txibãkĩ akama inibuwẽ taea Senhor Deus nukuki sinatahairaimẽkainã— hatu wa

¹⁴ Deusbe hawenabu hãtxashunika Hilquias inũ, Aicão inũ, Acbor inũ, Safã inũ, Asaíasĩ yukai bui Deusũ hãtxa yuishunika aĩbu hawẽ kena Hulda anu bunibukiaki. Hawẽ benẽ kenarã, Salum inikiaki. Hawẽ eparã, Ticva inikiaki. Hawẽ hutxirã, Harás inikiaki. Salumnẽ Senhor Deus kẽwãti hiwe anushũ Deusbe hawenabu hãtxashunikabũ hatũ tari mekekubaĩmistũ Jerusalém maewã bekesh betsa bena anu Hulda hiwea anu hikishũ haska shanẽ ibu Josiasĩ hatu yunua yuiabu

^15-16 Deusũ hãtxa hatu yuishũkĩ Huldã hatu yuikĩ: —Israelĩ enabu mekenika Senhor Deusũ kemati hãtxa nĩkakãwẽ: “Txanima haska mã ea yukayushurã, hau mã ea yukayunũ hatũ matu yunushu ẽ hãtxa eska yuiritãkãwẽ. Haska txanima ẽ yuini hawẽ kupiti ishanai unaki kenenibu Judá enabu shanẽ ibũ yuishu keska wakĩ ẽ matu ashanaii, na mae anu yurabu hiweabu kupikĩ txakabuhaira wakinã, haska ẽ txanini yuikĩ nĩkashu keskarã.

¹⁷ Matũ shenipabũ ea henetã yushibu betsa betsapabu kẽwãkĩ hatu bebũshũ sheni ininipa kuashũkĩ ea sinatamahairanibuki. Haskawẽ taea na maeki ẽ sinatahairani ibubis haskatã ẽ hawa daetirumahairaki.

^18-20 Ha inũ, hau mã Senhor Deus yukai benũbũ Judá enabu shanẽ ibuhairatũ matu yunushu eska hãtxa yuitãkãwẽ. Israelĩ enabu mekenika Senhor Deusũ mia yuiriakĩ: Ẽ hãtxa kenenibu una anua Safãnẽ mia yuishuna nĩka pehaira watã mĩ shinã datei mĩ eki mesebiayarã, haska watã ha ẽ hatu yupuni txakabuwakĩ ẽ keyushanaii, na mae inũ nenu hiweriabu ha una kenenibu anua ẽ hatukiri ha iniwenã. Haska shinaĩ mĩ saki saki ikĩ mĩ shinã betsa watã ẽ shinã txibãkĩ mĩ ea ikũwaĩ ẽ ma mia nĩkashuki. Mĩ tari mĩ ushnitã ea bebũ nia huĩti nishma mĩ kashahairaya ẽ miwẽ nuiai ẽ mia yuiaii. Haskawẽ taea kupikĩ na mae txakabuwakĩ ẽ hatu itxakawashanai mĩ uĩriama unanuma mĩ mawashanaii, mĩ shenipabuki nukuirã. Ẽ Senhor Deusũ txanima ẽ mia yuiaii”— ikai Huldanẽ nĩkatã hatu yuia hanua habũ shanẽ ibuhairatũ hatu nitxiã beabu hanua txĩtũbaĩ Senhor Deusũ kemati hãtxa Josias yuinibukiaki.