2 Reis 19 - Kaxinawá Bíblia (BR)

Judá enabũ mai pakea hawa meama Senaqueribe inũ hawenabu dasibibũ henebainibukiaki, na hãtxarã

¹ Hatũ hãtxa nĩkatã shanẽ ibu Ezequiasĩ hawẽ tari hawẽrua sawea ushnitã pekatã huĩti nishmahaira haska nuihairai hatũ beyawẽ taea hatu uĩmai besha tari sawetã Senhor Deus kẽwãti hiwe anu kai hikitã

² Eliaquim ha hatũ shanẽ ibuhairatũ hiwe mekemis inũ, Sebnã shaba tibi ikaibukiri kenekubaĩmis inũ, hawenabu Deusbe hãtxashunika mestebubu besha tari saweriabu hatu itxawashũ Amozĩ huni bake Isaías Deusũ hãtxa yuishunika anu hatu yunukĩ

³ hau shanẽ ibu yuishũtanũbũ hatu yuikĩ: “Natiã nũ pemahairaki. Nũ ma bika teneaii. Dakewakĩ nuku ma atxitã nuku babu wakĩ aĩbu bake kaĩ ana kushipa hayaisma keska nuku ma wakanikiki. Ma Senhor Deusũ nuku kupimẽkaĩ.

⁴ Assíria shanẽ ibuhairatũ hawẽ tsuma Rabsaqué yunushina nukũ mekenika Deus hiweaki hãtxa txakabui shetxakai hawẽ detenamenika shanẽ ibu hãtxai mĩ mekenika Senhor Deusũ nĩkashumẽkaĩ”, ishũ, “Ẽ shinaiĩ. Hawẽ hãtxa nĩkashĩshũ Senhor Deus mĩ mekenikatũ hau ibubis hatu kupishanũwẽ. Nuku eskarabes nũ hiweyuabu Assíria nawabũ nuku atxiriama hau nuku merabewashanũ Senhor Deus dayuikĩ nuku yukashũwẽ, akĩ ea yuishũtãkãwẽ”, atã hatu yunua

⁵ Isaías anu bushũ Ezequiasĩ hãtxa yuishunabu

⁶ nĩkatã hau hatũ shanẽ ibu yuitanũbũ Isaíasĩ hatu kemakĩ: “Senhor Deusũ eska hatukiri yuikiki: ‘Assíria nawa shanẽ ibuhairatũ hawẽ shanẽ ibu beshmasbu hatu yunua beshiã ekiri shetxakai hãtxa txakabukĩ matu yuishuwẽ taea hawa dateyamawe.

⁷ Uĩkãwẽ. Hawẽ maewã anu hau hawaira txĩtũkaĩtanũ kaka txakabu Assíria nawa shanẽ ibuhaira ẽ banabimaii. Hanua hari kai harishũ txatxi txatxi akabu mawai kaikiki’, akĩ matũ shanẽ ibu ha hãtxa ea yuishũtãkãwẽ”, hatu wa

⁸ Laquis mae anua Assíria nawa shanẽ ibuhaira ma kaĩkaĩshina hawẽ shanẽ ibu beshmasbũ bana nĩkatã Jerusalém anua Assíria detenamenika shanẽ ibu Rabsaqué haki nukui kai maewã betsa Libna atxinũ ika hawẽ detenamenika betsabube Assíria nawa shanẽ ibuhairatũ hatu yunukubainaiki nukuabu

⁹ Assíria detenamenikabu maemanũ ika Egito nawabu merabewai Etiópia nawa shanẽ ibuhaira Tiraca hawẽ detenamenikabu itxapabube beaibukiri Libna anushũ Assíria nawa shanẽ ibuhairatũ nĩkatã hatu nemai kariama Judá enabu shanẽ ibuhaira Ezequias anu hau hawẽ hãtxa bushũtanũbũ hawẽ hãtxa yuishunikabu yunukatsi

¹⁰ hawẽ kenenika kenemakĩ yuikĩ: “Jerusalém ẽ kushipawẽ ẽ atxitiruma dabanẽ mĩ mekenika Deus mĩ ha ikũwainã, harã, txaniki. Ana hawẽ parã hãtxa ikũwãyamawe.

¹¹ Mai pakea tibi Assíria nawa shanẽ ibuhairabũ yamawakatsi ikĩ hatu yamawanibu mĩ nĩkama inimẽ? Hatu haska waniwẽ taearã, earã, ea nemakĩ binutã mĩ hiwetirumẽ? Ibubis haska shinãyamawe.

¹² Mae betsa betsapa Gozã inũ, Harã inũ, Rezefe inũ, Éden enabu Telassar anu hiweabu habũ yushibubũ hatu merabewabumakẽ enabu shanẽ ibukĩ atxikĩ hatu dasibi yamawakĩ tenãkĩ txanima keyunibuki.

¹³ Hamate shanẽ ibu inũ, Arpade shanẽ ibu inũ, Sefarvaim shanẽ ibu inũ, Hena shanẽ ibu inũ, Iva shanẽ ibuburã, hania? Hayabumẽ?”, ashũ hawẽ hãtxa kenetã Ezequias anu hatu bumaya

¹⁴ shanẽ ibu beshmasbu Jerusalém anu bushũ hikiti shui anushũ Ezequias inãbu bitã hawẽ hiwe anu kashũ txuretã hawẽ hãtxa uĩkĩ keyutã Deus kẽwãti hiwe merã kashũ Deus bebũ bepẽshũ hanatã haskakiri Deusbe hãtxakĩ:

¹⁵ “Israelĩ enabu mekenika Senhor Deusuũ, mĩ hatube yubakani hãtxa aruti bau mamaki querubin dabe tsaua anu hatu mamaki shanẽ ibu mĩ tsauaki. Nai inũ mai hirabi mĩ dami waniwẽ taea mai hirabi anu shanẽ ibu tibitũ enabu dasibi miã besti mĩ hatu yunumis mekenika Deuski, Deus betsa hayamarã.

¹⁶ Senhor Deusuũ, ea uĩkĩ ea nĩkawe. Mĩ beru bepeshetã hawẽ hãtxa kene uĩwẽ. Mĩ mia Deus hiweaki mikiri hãtxa txakabukĩ mia danãkĩ kenea dasibi eanu Senaqueribẽ hatu bemashuki. Uĩwẽ.

¹⁷ Senhor Deusuũ, txanimaki. Hatũ mai pakea anu hiwebaunabũ inũ hawara yurabũ anibu Assíria nawa shanẽ ibubũ hatu dasibi tenãkĩ yamawanibuki.

¹⁸ Txanima Deus kayabima habũ mekenika yushibubu dami txi anu napukĩ hatu menukĩ keyurianibuki. Ha haska wakinã, mekenika deus kayabima anibuki. Hi inũ mishki dami wakĩ hunibũ akĩ kẽwãti mekenika yushibubu akubainibuwẽ taeshũ Assíria nawabũ hatũ dami teke teke akĩ menukĩ keyunibuki, yamawakinã.

¹⁹ Senhor Deusuũ, mia besti mĩ mekenika Deuski”, iwanã, “Mai hirabi anu yurabu shukua betsa betsapabũ hau mia unãkĩ tapĩkubaĩshanũbũ Senhor Deusuũ, mĩ nukũ mekenika Deuswẽ taeshũ ikis Assíria nawabu kushipabu nuku nemashũkĩ nuku mekekubaĩshãwẽ”, ikaya

²⁰ hanushũ Amozĩ bake Isaíasĩ haska Senhor Deusũ yuishu hau Ezequias yuitanũbũ Isaíasĩ hatu yunukĩ: “ ‘Assíria nawa shanẽ ibuhaira Senaqueribe ikaikiri mĩ ea yukakĩ yuishu ẽ nĩkashuki’, akĩ Israelĩ enabu mekenika Senhor Deusũ mia yuikiki”, akĩ ẽ mia yuiaii.

²¹ Haska Assíria nawa shanẽ ibuhaira ishanaikiri Senhor Deusũ hakiri hãtxakĩ yuishurã, eska washanikiaki. Nĩkawe: “Senaqueribeẽ, ha maewã Sião txipash keskatũ mikiri usaĩkiki. Senaqueribeẽ, mĩ kaĩkainaya buri buri ikĩ Jerusalém anu hiweabũ mikiri kasheshãkanikiki.

²² Tsuki sinatai mĩ hãtxa txakabushinamẽ? Keinã, tsuki beru txãkãtã ha iki mĩ kũyã ishiãmẽ? Enabu Israel hatu ha aki txanima mĩ eki ishiãki, hatũ mekenika meribi pepa hiweakirã.

²³ Mĩ hãtxa bushunika hatu yunukĩ ea Senhor Deus mĩ ekiri hatu hãtxa txakabumashinaki. Kẽkĩ hatu yuimakĩ: ‘Líbano mati matipa mamaki hanu tsua mapeketiruma anu ẽ cavalõ tarãbaĩtiki detenamenikabu mapubaini mirimabube ẽ mapekeimaki. Hanushũ hatũ kusha keyatapahaira inũ hatũ hi betsa cedro hawẽruahaira ẽ hatu meshtemaimaki. Mati keyatapa mapekeyutã ha mamaki bai bana keska ni shukua anu nukui ẽ hanu hikimaki.

²⁴ Mai pakea betsa ẽ haska uĩriama betsa betsapa anushũ ũpash pukĩ keyutã ha ũpash ẽ akubainimaki. Ẽ pai pai ikainai tsuã ea nematiruma Egito hene tibi ẽ netsukubainimaki’, ikĩ mĩ hatu yuimashinaki.

²⁵ Hakia mĩ haska hatu wamaimarã, ẽ Senhor Deus ma bebũkiri yubakanishũ ẽ mia amaima mĩ unãmamẽ? Nenumahaira mĩ shenipabutiã ẽ hatukiri yubakani natiã miã mĩ hatu akubainimaki. Maewã mishki kenebaunibu betsa betsapa txakabuwakĩ dasibi teke teke akĩ hanus mishki mãtxiã keska mĩ hatu yamawakubainimaki.

²⁶ Ha mae betsa betsapa anu hiweabu minabuki dakei mesehairakubainimaburã, ha yurabu mĩ atxia hawa kushipa hayama ikimabuki, bai anua basi keska ina awã piti basi nãketapa keska inũ basi betsa ha hiwe wakĩ shewamisbu hukuĩma bari huaikiria niwe shũku ibirãkĩ tsusĩ wãmis keskarã.

²⁷ Hanira mĩ kamis inũ hawara aki mĩ nimis ẽ unaiĩ. Mĩ eki sinatai pubẽhairaima ẽ unãriaii.

²⁸ Ibubis kẽkĩ mĩ hatu txakabuwakĩ itxakawakubaĩmisri ẽ unãriaii. Haskawẽ taeshũ ina awa pubẽ amisbu keska wakĩ mia depestã ẽ mia mane deuwamashanaii, mĩ keshari mia shewesheriakinã. Mia haska watã ha baiwẽ mĩ huimawẽri ana hawẽri mĩ mae anu ẽ mia nitxĩshanaii”, akĩ Senhor Deusũ hãtxa keyuaya

²⁹ hanushũ Isaíasĩ shanẽ ibuhaira Ezequias yuikĩ: “Haska wakĩ Senhor Deusũ matu merabewashanai hawẽ unãmati Senhor Deusũ mia unãmaikiki. Na habia ano inũ ua ano ha katxu huaiki shekiwã trigo ibubis hukũtã bimiyatã kaniai tsekashũ mã piyukubaĩshanaii. Hakia ano dabe inũ besti taeaitiã hanu ibubis mã bana hukuĩ bimitã kaniai tsekashũ mã pikubaĩshanaii. Ha inũ, uva banatã hawẽ bimi tsekatã mã pikubaĩshanai.

³⁰ Judá enabu habu debuama itxapa hiweriabu mibã hawẽ tatxa txaipatã bimiai keskai hatũ mae sheni anu manishũ pe hiwekĩ ana bake itxapa wakubaĩshãkanikiki.

³¹ Mati Sião anu habu mawama ikimabu hiweriabu hatiri Jerusalém anu bashikui hiweimabuwẽ taea Senhor Deus kushipa dasibi binu keyuatũ hatu mekekubaĩshanikiki, hawẽ nui paewenã”, atã

³² hanua betsarã, “Assíria nawa shanẽ ibuhairakiri eska wakatsi Senhor Deusũ yuikiki: ‘Jerusalém anu bebia hikiama ishãkanikiki. Jerusalém uke merã hawa pia betsa bishkuama ishãkanikiki. Atxikĩ txakabuwanũ ika hawẽ pia nemati hawa betsã tsumatã hawẽ yura huneama ishãkanikiki. Hanu hikibaĩ hatu tsakakatsi hawẽ mishki kenebaunibu dapi mai mãtxĩkĩ maspuama ishãkanikiki.

^33-34 Ẽ tsuma pepa shanẽ ibuhaira Davi inũ haska ibubis ẽ yubakamis shinãkĩ na maewã ẽ mekekubaĩshanaiwẽ taea habias baiwẽ tsakanametanũ ika beimabu ana hawẽri hawenabube Assíria nawa shanẽ ibuhaira txĩtũbaĩshãkanikiki, Jerusalém anu hikiamarã. Ẽ Senhor Deusũ eska ẽ mia yuiaii’ ”, aka nĩkatã Isaíasĩ shanẽ ibu Ezequias yuinikiaki.

³⁵ Habias meshu merã Assíria nawabũ hatũ tari hiwe pũtebaunimabu anu Senhor Deusũ nai tsuma debuwanika bututã kauãkĩ 185.000 detenamenikabu hatu tenã keyubaini kakẽ penamahaira habu hiweabu ma bestẽbaũ mirimahaira mawabu uĩbaunaibuwẽ

³⁶ taea datei Assíria nawa shanẽ ibuhaira Senaqueribẽ hatũ tari hiwe hatu pewamatã hawenabu dasibibube Judá enabũ mai pakea anua kaĩbaini bui maewã hanushũ shanẽ ibuhairabũ hatu yunumis anu hawẽ maewã Nínive anu txĩtũbaini hari hikinibukiaki.

³⁷ Hanua shaba betsatiã hawẽ mekenika yushibu Nisroque kẽwãti hiwe anu Senaqueribẽ kẽwaĩ ka hawẽ huni bake dabe Adrameleque inũ Sarezer hikishũ hatũ epa txatxi txatxi akĩ tenãtã pashai mai pakea hawẽ kena Ararate anu hunei buimabũ shanẽ ibuhaira Senaqueribẽ shãtukũ hawẽ huni bake betsa Esar-Hadom shanẽ ibuhairanikiaki.