2 Reis 13 - Kaxinawá Bíblia (BR)

Deusũ hãtxa yuishũkubaini Eliseu mawanikiaki, na hãtxarã

¹⁴ Mawakatsi Eliseu isĩ teneai Israelĩ enabu shanẽ ibuhaira Jeoásĩ uinũ ika kai hikia haya kashakĩ ikushũ yuikĩ: —Epaã, epaã, mĩ Israelĩ enabu mekenika kushipahairaki, huni detenamenikabu itxapa keskarã— aka

¹⁵ nĩkatã Eliseũ shanẽ ibu yunukĩ: —Kanũ inũ pia hatira bitã tsumawe— aka kanũ inũ pia bitã ma tsumakẽ

^16-17 Eliseũ ana yunukĩ: —Bari huaikiri hanu uĩti shui bepẽwẽ— aka ma bepẽkẽ Eliseũ ana yunukĩ: —Bishkukatsi kanũ inũ pia pewawe— aka kanũ inũ pia shanẽ ibũ pewaya Eliseu hawẽ petxiuria benikaĩ nishũ shanẽ ibũ mekẽ dabeki mepishũ ana yunukĩ: —Ikis bishkuwe— aka pia bishkuaya hãtxa kushipawẽ Eliseũ yuikĩ: —Senhor Deusũ mekenikã piaki, Síria nawabu maemati piarã. Afeca anushũ hatu detekubaĩkĩ Síria nawabu mĩ hatu tenã keyushanaii— itã

¹⁸ txipu shanẽ ibu Eliseũ ana yuikĩ: —Pia ana tsumawe— aka ana bikẽ Eliseũ ana yunukĩ: —Ikis piawẽ mai bekush bekush awe— aka shanẽ ibũ dabe inũ bestiki piawẽ mai bekush bekush akĩ heneaya

¹⁹ haska waiwẽ taea Eliseu haki sinatakĩ yuikĩ: —Hatu detekubaĩkĩ Síria nawabu maemakĩ keyukĩ yamawashanũ, iwanã, 5 kasmai 6ki piawẽ mĩ mai bekush bekush ati sharashuki. Hakia dabe inũ bestiki mai mĩ bekush bekush ashuwẽ taeshũ dabe inũ bestiki Síria nawabu mĩ hatu maemashanaii, hatu tenãkĩ keyuamarã— atã

²⁰ ana hãtxa wama Eliseu mawa hanushũ maiwanibukiaki. Ano tibi Israelĩ enabũ mai pakea anu Moabe nawabũ hatu itxakawai yumetsubu yumetsui bebirã bebiranaibũ

²¹ ushe betsatiã hatũ haibu ma mawa Israelĩ enabu hunibũ maiwanũ, iwanã, mai pukĩkĩ Moabe nawa yumetsubu beaibu betxitã Eliseu mai wanibu anu hatũ haibu mawa datãbaini datei pashaibũ, hakia ha huni mawatũ yura Eliseũ shau mamaki hanakĩ hawẽ shau metsamabu ana hiwei benitã inũ kanikiaki.

²² Israelĩ enabu shanẽ ibu Jeoacaz hiweyukẽ Síria nawa shanẽ ibuhaira Hazaelĩ Israelĩ enabu dasibi itxakawakĩ hatu tenãkĩ yamawapanã

²³ Abraão inũ, Isaque inũ, Jacóbe Deus hatube yubakaniwẽ taea Israelĩ enabuwẽ nuikĩ hatu shinãkĩ Senhor Deusũ hatu merabewakĩ Síria nawabu hatu nemashũkubainikiaki. Hatu txakabuwakĩ yamawakatsi ikama inũ ha bebunua hatu putakatsi ikama ikũkainikiaki. Na habiatiã Senhor Deusũ hatu mekeriakubainikiki.

²⁴ Hanua Síria nawa shanẽ ibu Hazael mawaya hawẽ huni bake hawẽ shãtukũ Ben-Hadade shanẽ ibunikiaki.

²⁵ Hanua Jeoacazĩ huni bake Jeoás shanẽ iburiatã hawẽ epa mae mebinibu Ben-Hadade kushipai anua Jeoás dabe inũ bestiki habe detenamekũkaĩkĩ ana hatu putamanikiaki. Haska wakinã, Israelĩ enabũ mae Jeoásĩ Ben-Hadade detenamekũkaĩkĩ hatũ mae ana hatu bishũkĩ hatu ibuwamanikiaki.