2 Reis 1 - Kaxinawá Bíblia (BR)

Acazias haskatã mawanikiaki, na hãtxarã

¹ Acabe ma mawaimakẽ hawẽ bake Acazias shanẽ ibuaya Moabe nawabu Israelĩ enabuki sinataibũ

² hanua shaba betsatiã Samaria anu Acazias hawẽ hiwe hawẽrua anu manaũri tapa betsa anua hanu niwe hikiti shui uĩbaũti anu tsaua hawa shinãma kauani maĩ tĩ iki txakamana txakayama isĩ tenei dakashũ hãtxa bunikabu hatu kena beabu hatu yunukĩ: “Ecrom anushũ hatũ mekenika yushibu Baal-Zebube ẽ txakamana ẽ isĩ teneai ẽ shushaimẽkaĩ, ea yukashũtãkãwẽ”, hatu wa buaibũ,

³ habiatiãri Senhor Deusũ nai tsumã Tisbé anu hiwemis Elias yuikĩ: “Samaria anua hãtxa bunikabu shanẽ ibuhaira Acaziasĩ ma hatu yunua bekanikiki. Hatuki nukutãwẽ. Hatuki nukutã hatu yukatãwẽ: ‘Israelĩ enabu mekenika Deus hayamamẽ? ha mae Ecrom anu nawabũ yushibu Baal-Zebube anu mã yuka ishuĩ kairã?

⁴ Mã haskabiakiranaya Senhor Deusũ ea yuikĩ: Eska Acaziaskiri yuikiki: Ha mĩ dakati anua mĩ isĩ teneairã, habianua ana beniama mĩ mawaii, mia waikiki’, akĩ ea yuishũtãwẽ”, aka haska Senhor Deusũ nai tsumã yunua Elias ka hatuki nukushũ haska Senhor Deusũ yuishu hatu yuia

⁵ hawẽ hãtxa nĩkatã hatũ shanẽ ibu anu hawaira txĩtũbaĩ ha bebũ mapuabu Acaziasĩ hatu yukakĩ: —Haskatã mã hawaira txĩtũkiranai?— hatu wa

⁶ habũ kemakĩ yuikĩ: —Nũ kai bebũ huni betsa nukuki nukushũ nuku yuikĩ: “Harishũ shanẽ ibũ matu yunushu anu ana txĩtũribaĩkãwẽ. Haska Senhor Deusũ ea yuishu matũ shanẽ ibu yuiritãkãwẽ: ‘Israelĩ enabu mekenika Deus hayamawẽ taeshũ Ecrom anu nawabũ yushibu Baal-Zebube anu hau mĩ tsumabũ mia yukashunũbũ mĩ hatu yunushuwẽ taea mĩ dakati anua beniama mĩ mawaii’, akĩ Senhor Deusũ eska yuikiki”, akĩ nuku yuiawẽ taea nũ txĩtũshuki— akabu

⁷ shanẽ ibuhaira Acaziasĩ hatu yukakĩ: —Ha huni tashnikirã matuki nukushũ haska hãtxa matu yuishurã, haskara ishumẽ?— hatu wa

⁸ habũ kemakĩ yuikĩ: —Ha huninã, txashuwã bitxi tari inũ bitxi nanesheketi sawea nũ uĩshuki— akabu shanẽ ibu Acaziasĩ unãkĩ hatu yuikĩ: —Harã, Tisbé anu hiwemis Elias matuki nukushuki— hatu watã

⁹ hanua Elias uĩkãshu anu hau butanũbũ Capitão betsabe 50 detenamenikabu yunua bui mati hanu Elias tsaua anu kemashũ Capitãonẽ yuikĩ: —Deusũ huniĩ, shanẽ ibuhairatũ mia kenaikiki. Bututã shanẽ ibu anu ebe kayuwe— aka

¹⁰ Eliasĩ kemakĩ yuikĩ: —Ẽ Deusũ hãtxa yuishunikarã, na habiatiã mã uiaiĩ. Nai anua txi here hi ibirã matu kuakĩ yamawaikiki— akaya hawaira nai anua hatuki txi here hi ibirã hatu kuakĩ yamawaya

¹¹ hatu haska washu huni betsã uĩbaĩ shanẽ ibu Acazias banabima hau habũri itanũbũ Capitão betsari 50 detenamenikabube shanẽ ibũ hatu yunuria bui kemashũ Capitãonẽ yuikĩ: —Deusũ huniĩ, shanẽ ibuhairatũ mia kenaikiki. Manama hawaira bututã ebe kayuwe— aka

¹² Eliasĩ kemakĩ yuikĩ: —Ẽ Deusũ hãtxa yuishunikarã, na habiatiã mã uiaiĩ. Nai anua txi here hi ibirã matu kuakĩ yamawaikiki— akaya hawaira nai anua hatuki txi here hi ibirã hatu kuakĩ yamawariaya

¹³ hatu haska washu huni betsã ana uĩbaĩ shanẽ ibu banabima hau habũri itanũbũ Capitão betsa 50 detenamenikabube shanẽ ibũ hatu yunuria bui ha mati anu kema hawa yuiama hawẽ 50 detenamenikabu hatu bashitã Elias tsaua anu mapekekaĩ ha bebũ dãti ishũ ea akĩ: —Deusũ huniĩ, nukuwẽ nuiwe. Ẽ hiwea inũ na mĩ 50 tsumabu hiwea shinaĩ nukuwẽ nuiwe.

¹⁴ Habu dukũ nai anua txi here hi ibiranaiwẽ Capitão dabe hatũ detenamenikabube menui yamakãshuwẽ taeshũ mĩ merabewati ẽ mia ea akaii, hau mĩ nukuri haska wayamanunã— aka

¹⁵ hanushũ Senhor Deusũ nai tsuma kushipatũ Elias yunukĩ: —Dateama habe kashũ uĩtãwẽ— aka Elias benitã Capitãobe butukaini shanẽ ibuhaira Acazias uĩ kashũ

¹⁶ yuikĩ: —Senhor Deusũ eska mia yuikiki. Ecrom anu nawabũ yushibu Baal-Zebube anu hau mia yukashũtanũbũ habũ mĩ hãtxa yuinikabu mĩ hatu yunukĩ Israelĩ enabu mekenika Deus tsuã mia yukashũtirumakẽ mĩ haska shinãshinawẽ taea mĩ dakati anua ana beniama txanima mĩ mawaii— atã Elias kakẽ

¹⁷ haska Senhor Deusũ Elias yuimashina keskai Acazias mawanikiaki. Haskaitiã Judá enabu yunui Josafã huni bake Jeorão shanẽ ibui 2 ano hatu ishuãyã hanua ha Acazias hawa huni bake hayamakẽ Acazias shãtukũ hawẽ betsa Jeorão Israelĩ enabũ shanẽ ibuhairai taenikiaki.

¹⁸ Israelĩ enabu shanẽ ibuhairabu ikubainaikiri una betsa merã hatuki kenemisbu hawẽ daya betsa betsapa Acazias hiweshũ akubainikiri hakiri kenenibu hayaki.