1 Tesalonicenses 5 - Kaxinawá Bíblia (BR)

^1-2 Ẽ betsabu inũ ẽ puibuũ, bari hawẽ heneai anu nukũ Shanẽ Ibu hushanai tsuabũra manama xinãma huni yumetsu mexu merã hawaira humis keskai Jesus hawairakirãshanai mã ma unãyã hatiãra hushanai nũ ana hariri yuikĩ matu keneshunamaki, mã ma tapĩkenã.

³ Haskakẽ ana hawaki yurabu dateama yuikĩ: “Unanuma hiwei hawaki mesei dateama hiwekubainãkãwẽ”, ikubaini ana hawaki mesei dateabumakẽ Jesus ana niti ikama hawairakirã hatu kupishanikiki, aĩbu bake kaĩnũ ika isĩ berukutã ana maiãma kaĩmis keskairã.

⁴ Hamẽ ẽ betsabu inũ ẽ puibuũ, maturã, mã ma unãnepabuki, tsuãra kakape tapĩkĩ ikũwãkatsi ikabuma keskamarã. Hatiãra nukũ Shanẽ Ibu hui haskakirãshanikiri ana matu yuinũ nĩkakãwẽ. Huni yumetsunũ ika hawaira hatiãra tsuã unãmakẽ humis keskai nukũ Shanẽ Ibu bebũkiri tsua yuiama hawairakirã tashnishanikiki. Haskaya habũ ikũwãkatsi isbuma mexu merã hiweabu keska teku iki: “Habaa!” ishãkanikiki. Hakia habũ ikũwaĩbu hawa dateama ishãkanikiki, nũ ha manakamis huayarã.

⁵ Haskawẽ taearã, maturã, dasibibũ Jesus mã ikũwaĩ mã ma shabaki pesea keskabuki. Hakia nukuburã, nũ mexu anua keskabumaki.

⁶ Nũ haskawẽ taearã, yura betsabu hawa unãma ushamisbu keskama txikixyamakubainãkãwẽ. Hakia ibubis mekekĩ pe besti xinãkĩ haska Jesusũ mia abuai keskai txibãkĩ manakubaĩkãwẽ.

⁷ Hamẽ, ha mexu merã keska hiweaburã, ushabu inũ paẽmisbu keskabuki, hawara ishanai unãbuma inũ hatiãri Cristo ana hushanai xinãbumarã.

⁸ Hakia nukuburã, nũ ma mexua anua shabaki tashnia keskabu nũ ikũwãkĩ pewakubaĩmiswẽ taea nukũ Shanẽ Ibu ana hushanai hawa hakimama manakubainãkãwẽ. Nũ habubetã ikũwaĩ betsabube duapai abunamei merabenãkĩ nukũ Epa Deus ha bestiki txiti ikubainãkãwẽ. Nũ haskaiburã, Romano soldadobũ hawẽ yura hunenũ, iwanã, mane tari manãkiria sawemis keskai hawaki dateama nũ pe mekea hiwetirubuki. Haskai hawa dateama nukũ Shanẽ Ibu manakĩ hatũ besti nuku mekeshanai nũ manaii. Haskakĩ hau soldadobu tsuã hatu deteyamanũbũ hatũ bushka mekekĩ hunekĩ mane maiti sawemisbu keskai nukuri dateama pe mekea nũ hiwetirubuki.

^9-10 Txanima nukuwẽ taea Jesus Cristo nuku mawashuniwẽ taeshũ Deusũ nuku hawẽ kupikatsi ikama nũ hiweabu inũ nũ mawabu nukũ Shanẽ Ibu Jesus Cristowẽ nuku meketã nuku habe hiwemashanai nũ unaiĩ.

¹¹ Haskawẽ taea ana Jesus ikũwãkubaini heneama betsabube benimai kuxipanamekubaĩkãwẽ, mã ma ikũkaĩmis keskai heneamarã.

Haskai ikũwaĩbũ xinaĩ hiwenũbũ Paulõ hatu yununikiaki, na hãtxarã

^12-13 Ẽ betsabu inũ ẽ puibuũ, matu merabewanikabũ matu merabewakĩ nukũ Shanẽ Ibũ daya akĩ haska mã kaneaibu matu pewakĩ yusĩaĩbu hatukiri petxiama hatu xinãkĩ abukĩ duawariakubaĩkãwẽ, hatũ daya pepawẽ taeshunã. Ha inũ, matubetã ikũwaĩbube unãnuma hiwekubaĩkãwẽ.

¹⁴ Ẽ betsabu inũ ẽ puibuũ, nũ ana matu yunuai nĩkairakãwẽ. Dayama txikixaibu hatu yusĩ pewakĩ hatu ha akubaĩkãwẽ. Ha inũ, hatũmebi hawara txakabuwatã kasmai nĩkatã beshtekei babuaibu hatu merabewakubaĩriakãwẽ. Ha inũ, betsabũ dama ikũwaĩ huĩti shubu heneama hatu merabewakubaĩriakãwẽ. Ha inũ, yurabu hiwe txakabu haskaira hatuki sinatama unãshubira hatu tapĩmakubaĩkãwẽ.

¹⁵ Ha inũ, yura betsã matu txakabuwaibu ana hatube manakunama mã pepakatsis ikairã, haska txakabu huai tenetã pepakĩ ikũwaĩ betsabube merabenãkĩ mã akai keska wakĩ mai hirabi anuabu yurabu ashũriakĩ hatu merabewakubaĩkãwẽ.

¹⁶ Haskakubaini benimai heneyamakubaĩkãwẽ.

¹⁷ Hamapai tibikiri hawaira xinãtã Deusbe hãtxakubaĩkãwẽ.

¹⁸ Hawara tibi mã haya inũ mã hayama haska Deusũ matu unaĩwẽ taeshũ ha besti kẽwãkubaĩkãwẽ, mã haskaibu Deusũ matu abuikiki, mã Jesus Cristo ikũwaĩbuwẽ taeshunã.

¹⁹ Tsuabura Deusũ Yushĩ Pepatũ merabewa hawẽ kuxipawẽ dayaibu nematimaki.

²⁰ Haska inũ, Yushĩ Pepatũ Deus hãtxashunika wakĩ yusĩmai danãyamakubaĩkãwẽ.

²¹ Tsuabũra yuikĩ: “Deusũ hãtxa ẽ matu yusĩaiĩ”, ikĩ hatu yusĩaĩbu haska Deusũ hãtxa kayabi yusĩmẽkaĩ unãti wakĩ nĩkakubaĩkãwẽ. Deusũ hãtxa yusĩ pe waya unãtã ikũwãkĩ ha yusĩa mã txibãtirubuki.

²² Hamapai txakabu xarabu danãkubaĩkãwẽ, nĩkamarã.

²³ Nukũ Shanẽ Ibu Jesus Cristo huaitiã dasibibu mã tsua txakabuuma Deus hamebi unãnuma hiweatũ matu meribi pepahairawakĩ matũ hamapai txakabu putamakĩ matu mekekubaĩkatsi matũ xinã inũ matu yushĩ inũ matũ yura hawa txakabuma hau matu pe bestiwakubainũwẽ.

²⁴ Haska wakĩ Deusũ matu katunishũ henebainama matu pepawakĩ meneshũshanikiki.

²⁵ Ẽ betsabu inũ ẽ puibuũ, hau nukuri merabewanũ nuku hakimama Deus nuku yukashũkubaĩkãwẽ.

²⁶ Ha inũ, ikũwaĩ beaibu matũ betsa kayabi keska wakĩ hatu ikĩ beyawakubaĩshãkãwẽ, benimawakinã.

²⁷ Haskakẽ nukũ Shanẽ Ibũ ea kuxipa waniwẽ taeshũ matu yununũ ikũwaĩbu dasibibu itxati tibi anushũ na kene ẽ matu bumakĩ yunuai shabakabi hatu yuishũkubaĩkãwẽ.

²⁸ Mã hatu haska waya nukũ Shanẽ Ibu Jesus Cristõ hau matu dasibi duawakubainũwẽ. Hatiski, ẽ hãtxarã. Paulo