1 Reis 21 - Kaxinawá Bíblia (BR)

Nabotẽ uva bai Acabẽ mebĩkĩ bianikiaki, na hãtxarã

¹ Hawatiãra kauã txipu Jezreel anu huni betsa hawẽ kena Nabote hiwea anu habianuri ha Samaria shanẽ ibuhaira Acabe bariãtiã huĩrukuĩ hanu kamis hawẽ hiwe pepa dapi Nabote uva bai hayakẽ

² shaba betsatiã Acabẽ Nabote habe hãtxakĩ yukakĩ: —Hanu bariãtiã hua hanu huĩrukuĩ ẽ hiwemis dapi mĩ uva bairã, ea inãwẽ, nũ bianananunã, ẽ uva bai betsa pepahaira ẽ mia inainã. Ẽ bai betsa mĩ bikatsi ikamarã, hati hawẽ karu depiati peiwẽ ẽ mia pakatiru ea yuiwe. Haska ẽ mia yukai ea shinãwẽ— aka

³ hakia kemakĩ Nabotẽ Acabe yuikĩ: —Ẽ ibubũ bai ea heneshũbainibu Senhor Deus ea yaushishunaya ẽ mia yunutirumaki— aka

⁴ Nabotẽ hãtxa wakĩ yuikĩ: “Ẽ ibubũ hatũ bai ea heneshũbaini ẽ mia inãtirumaki”, akĩ kemawẽ taea sinatai punu nuka hawẽ hiwe hawẽrua Samaria anu Acabe txĩtũkaini hikitã daka hawẽ keneki beti ika hawa hãtxama huĩti nishmahaira dakashũ pikatsi ikamakẽ

⁵ ha dapi hawẽ aĩ Jezabel kashũ yukakĩ: —Mĩ pikatsi ikamarã, haskakirana mĩ punu nuka huĩti nishmahairamẽ?— aka

⁶ kemakĩ Acabẽ yuikĩ: —Jezreel anu huni betsa hiwea Nabotebe ẽ hãtxakirãshuki. Hawẽ uva bai nukũ hiwe betsa dapike peiwẽ taeshũ hau ea yununũ, iwanã, ẽ ea ashuki. Ha inũ, pei bikatsis ikama nukũ uva bai pepahaira betsa ẽ inãtiru hãtxa pepawẽ ẽ yuishuki. Hakia Nabotẽ ea yunukatsi ikamawẽ taea sinatai ẽ punu nukahairakirana ikaii— aka

⁷ hanushũ kemakĩ hawẽ aĩ Jezabelĩ yuikĩ: —Hakia mianã, Israelĩ enabu hatu shanẽ ibuhairashũkĩ mĩ hatu yunuaii. Nabotẽ uva bai ẽ mia ibuwamashanaiwẽ taea benitã pi ibubis daeriwe, ana hawẽ nuiamarã— atã

⁸ hawẽ aĩ Jezabelĩ hawẽ bene Acabe kenawẽ taeshũ kene itxapa keneshũtã katũpakekĩ ha mae anu hiweabu unanepabu inũ shanẽ ibu beshmasbu hatu bumakĩ yawa sheni bĩwẽ dekutã txabaiwẽ tuis tuis akĩ bepupaketã hawẽ meitxikiti turuwẽ tsamĩpaketã hau bushũtanũbũ hatu yunua

⁹ ha kenewẽ hatu yuikinã: “Na huniwẽ taea samakekĩ yurabu bebũ Nabote tsaũshũ

¹⁰ unãti wakãwẽ. Nabote bebũ huni dabetũ matu txanitxakashũtiru tsaũshãkãwẽ. Hanushũ yurabu parãkĩ habũ yuikĩ: ‘Deus inũ nukũ shanẽ ibuhaira yuaĩ hatukiri Nabote hãtxatxakashinaki’, akĩ hau habũ matu yuinũbunã. Haska hakiri txani yuiaibu tapĩtã nukũ mae anua Nabote kaĩmabaĩ mashash tũkewẽ tsaka tsaka akĩ tenãshãkãwẽ”, hatu wa

¹¹ Nabotẽ mae anu hunibu habube hiweabu anibu unanepabu inũ shanẽ ibubube kene hatu anu bumashina uĩtã datei haska Jezabelĩ hatu yunua hune yubakashĩshũ

¹² samakeakiri hatu banabimabu ma bea itxabũ Nabote hatu bebũ tsaũshũ

¹³ hanushũ huni txakabu dabe ha parã hãtxawẽ Nabotekiri hatu yuiaibu hikia tsaushũ yurabu dasibi bebũshũ txanitxakakĩ hatu yuikĩ: —Nukũ mekenika Deus inũ nukũ shanẽ ibuhaira yuãkĩ hatukiri Nabotẽ txakabuhaira yuiai nũ nĩkashinaki— akabu hatũ hãtxa txanibiakẽ ikũwãkĩ Nabote atxibaĩkĩ tashnimabaĩ benãta iyushũ mashash tũkuwẽ tsaka tsaka akĩ tenãtã

¹⁴ Jezabel anu hãtxa bumakĩ yuikĩ: —Nabote mishki tũkuwẽ tsaka tsaka akabu ma debuaki— akĩ Jezabel yuiabu

¹⁵ nĩkatã benimakĩ Jezabelĩ Acabe yuikĩ: —Jezreel anu hiwekũkaĩshina Nabotẽ hawẽ uva bai mia ibuwamakatsi ikama ishiã ana hiweama ma mawashinakiaki. Uĩ kashũ hawẽ uva bai ibuwaritãwẽ— aka

¹⁶ Nabote ma mawa nĩkatã Acabe kashũ Nabotẽ uva bai ibuwaya

^17-18 hanua Tisbé anua Elias Senhor Deusũ yuikĩ: “Samaria anu hiwea Israelĩ enabu shanẽ ibuhaira Acabe anu hawaira kaĩ uĩritãwẽ, Jezreel anurã. Ikis Nabotẽ uva bai anu mĩ haki nukutiruki, ha bai ibuwanũ ika ma kakirã.

¹⁹ Haki nukutã ea yuishũtãwẽ: ‘Senhor Deusũ hãtxa nĩkawe. Nabote tenãshũ hawẽ uva bai mĩ mebiãwẽ taeshũ habianuri Nabotẽ himi kamanẽ tashu tashu akĩ keyushinabuki. Habianushũri mĩ himiri kamanẽ tashu tashu akĩ keyuriashãkanikiki’ ”, akĩ haska Senhor Deusũ yuia nĩkatã Acabe anu kashũ habias hãtxa Eliasĩ shabakabi yuia,

²⁰ kemakĩ Acabẽ yuikĩ: —Nũ sinatai danananãrabeairã, haskakĩ ea benabaũkĩ mĩ ea betxishumẽ?— aka Eliasĩ kemakĩ yuikĩ: —Haa, ẽ miki nukushuki. Senhor Deusũ berubi ha betxipaiama txakabuhaira mĩ akubaĩmiski.

²¹ Haskawẽ taeshũ Senhor Deusũ mia yuikĩ: “Mia hawẽ kupikatsi txakabuhaira mia anu ẽ yunushanaii. Minabu dasibi yamawakĩ ẽ keyushanaii, minabu hunibu dayarubu inũ dayarubuma yamawariakinã.

²² Ẽ hãtxa hatu danãmakĩ Israelĩ enabu mĩ hatu txakabuwamakubaĩmiswẽ taeshũ mĩ ea sinatamahairaii. Nebatẽ bake Jeroboãonẽ enabu itxakawaya ẽ hatu yama wani keska wakĩ inũ Aiasĩ bake Baasã enabu itxakawaya ẽ hatu yama wani keska wakĩ minaburi ẽ yamawariashanaii”, akĩ Senhor Deusũ mia yuikiki.

²³ Ha dikabi mĩ aĩ Jezabelkiri Senhor Deusũ mia yuikĩ: “Hawẽ hemaĩtĩ mishki kenebaunibu dapi Jezreel uke merãshũ Jezabel mawa hawẽ yura kamanẽ pikĩ keyukĩ yama washãkanikiki.

²⁴ Minabu mae anua mawabu kamanẽ hatu pikĩ keyushãkanikiki. Minabu bai nekia mawabu shetẽ hatu pikĩ keyuriashãkanikiki”, akĩ Senhor Deusũ hakiri mia yuiriaikiki— akĩ Eliasĩ Acabe yuiniki.

²⁵ Acabe haskanikiri matu yuinũ ea nĩkakãwẽ. Acabe shanẽ ibukĩ shanẽ ibu tibi haska iriabuma hawẽ aĩ Jezabelĩ shinã txibãkĩ Senhor Deus sinatamakĩ txakabuwakubainikiaki.

²⁶ Israelĩ enabu hau hanu hikinũbũ Amorreu nawabu Senhor Deusũ hatu nitxĩbianikẽ hawẽ yushibubu dami Acabẽ hawẽ aĩbetã duawakĩ kẽwãkubainaya hune hawenabũ haskakiri hatu betxipaiama inibukiaki.

²⁷ Eliasĩ hãtxa dasibi Acabẽ nĩkatã hawẽ shanẽ ibukĩ sawemis tari mayunepa ushnikĩ putatã hawẽ nui bika tenei unãmati tari besha sawea, samakei, habias tari tubeya ushakũkaini ana kanekatsi ikama huĩti nishmahairakũkainaya

^28-29 hanushũ ha Tisbé anua Elias Senhor Deusũ yuikĩ: —Uĩwẽ. Ekiri shinaĩ Acabe ana pe peama hiwekũkainairã, mĩ ma uĩshumẽ? Ekiri shinaĩ datei ana kaneamawẽ taea Acabe hiweyukẽ hawenabu kupĩkĩ ẽ hatu tenãriama ishanaii. Hakia hawẽ shãtukũ hawẽ huni bake Israelĩ enabu shanẽ ibuaya ẽ hatu kupikĩ yamawashanaii— aka