1 Reis 19 - Kaxinawá Bíblia (BR)

Mati Horebe anu Elias pashanikiaki, na hãtxarã

¹ haska Eliasĩ ashu inũ haska Baalĩ hãtxa yuishunikabu dasibi hatu tesẽmashu Acabẽ hawẽ aĩ Jezabel banabimawẽ

² taeshũ Jezabelĩ nĩkatã hawẽ hãtxa bunika yunukĩ yuikĩ: “Eska Elias ea yuishũtãwẽ: ‘Miarã, mĩ huni Eliaski. Earã, ẽ aĩbu Jezabelki. Haska enabu Baalĩ hãtxa yuishunikabu dasibi mĩ tesẽ keyushu keska wakĩ meshukiri na habia baritiãri ẽ mia habiaskari wariama yushibubũ hau ea kupitxakayashanũbũwẽ!’ iwanã, ‘mia yuishuki’, akĩ ea yuishũtãwẽ”, aka kashũ hawẽ hãtxa Elias yuia,

³ nĩkatã haki datehairai hawẽ hiwea mekei hawẽ dayaru iyui Judá enabũ mai pakea sulkiri txaihaira Berseba anu kai hikishũ hawẽ dayaru bashibaini

⁴ ana sulkiri ha mesti bai tanabaini hari tsua hiweabuma anu shaba bestitxai bari txaitanabaini ka punu nuka hi txãpa hawẽ pei tupã utapã anu tsaua punu nukai hĩ iki mawakatsis ikĩ Senhor Deus yuikĩ: “Senhor Deusuũ, hatiski. Ẽ ana bika tenetirumaki. Ẽ shenipabu ẽ hawa hatu binuamaki. Menã ea tenãkĩ ẽ hiwea ea biriwe”, atã

⁵ habianu hi tupã utapã namã daka ushahairakẽ nai tsuma hushũ datekĩ bestẽwãshũ yuikĩ: “Benitã piriwe”, aka

⁶ bestẽtã uĩbaũkĩ hawẽ bushkakiri mishki mamaki txi kuhairaiwẽ misi dama bawashu inũ ũpash shumuki mata betxitã benikauã misi pikĩ ũpash neshutã ana habianuri dakatã ushaya

⁷ ana ha katxu Senhor Deusũ nai tsuma hushũ ana datekĩ yuikĩ: “Ana benitã piriwe. Mĩ hari kairã, txaihaira nenumaki. Itxapa mĩ piama txaihaira kai mĩ ana punu nukatiruki”, aka

⁸ Elias benitã misi itxapa pikĩ ũpash itxapari akĩ yaniwa ma ana kushipawẽ taea bai tanabaini 40 dia inũ 40 meshu kai Deusũ Mati Horebe anu hikia,

⁹ mawa putxinĩ mapekea mishki kini shui betsa anu hikia meshu merã ushashini bestẽkainaya Senhor Deus habe ana hãtxakĩ yuikĩ: “Eliasiĩ, nenu huirã, mĩ hawa shinaĩ mĩ hushiãmẽ?” aka

¹⁰ Eliasĩ kemakĩ yuikĩ: “Senhor Deusuũ, ẽ mia yaushihairaii, miwẽ nuihairairã. Mĩ nukũ mekenika Deus kushipahaira dasibi binuawẽ taearã. Haska ẽ shenipabube mĩ hatube yubakabiani Israelĩ enabũ mia henetã mia hanushũ kẽwãti txi tapu di akĩ keyutã hatũ matxatu txaipa kenuhairawẽ mĩ hãtxa yuishunikabu hatu tenãkĩ ma keyuyamabuki. Ea besti ẽ hiwea eari tenanũ ikĩ ea benakanikiki”, aka

¹¹ Senhor Deusũ ana yuikĩ: “Neri shabakã kaĩwẽ. Mati putxinĩ anu ea bebũ niwe”, atã Senhor Deusũ daĩbainaya hakimamari besuuria niwe kushipahaira bekĩ mati purekĩ mishki tuash akaya hakia niwe merã Senhor Deus hayamakẽ, niwe maĩbainaya hanua patxa sakuriaya patxa sakuai merã Senhor Deus hayamarikẽ

¹² patxa sakui maiãyã txi here hi hi ikaya hakia ha txi here merã Senhor Deus hayamakẽ txi here nukai maĩkainaya unãshubira hui sha ikai nĩkaya

¹³ haskai nĩkatã hawẽ datei Elias hawẽ yabukutiwẽ hawẽ besu beyabukutã tashnikirã kini kesha nikẽ, hãtxa tashnikĩ yuikĩ: “Eliasiĩ, mĩ hawa shinãbirãshina hanu nia ikai?” aka

¹⁴ Eliasĩ kemakĩ yuikĩ: “Senhor Deusuũ, ẽ mia yaushihairaii, miwẽ nuihairairã. Mĩ nukũ mekenika Deus kushipahaira dasibi binuawẽ taearã. Haska ẽ shenipabube mĩ hatube yubakabiani Israelĩ enabũ mia henetã mia hanushũ kẽwãti txi tapu di akĩ keyutã hatũ matxatu txaipa kenuhairawẽ mĩ hãtxa yuishunikabu hatu tenãkĩ ma keyuimabuki. Ea besti ẽ hiwea eari tenanũ ishũ ea benakanikiki”, aka

¹⁵ hanushũ Senhor Deusũ yuikĩ: “Habiaskabiakẽ hariri ana kama mĩ hushiãkiri ana hawẽri txĩtũkaini Damasco dapi hanu tsua hiweabuma anu kashũ huni betsa Hazaelki nukushũ hau Síria nawabũ shanẽ ibuhairashanũ sheni inĩti maukakĩ katutãwẽ.

¹⁶ Ana kai Ninsĩ baba Jeúki nukushũ Acabẽ shãtukũ hau Israelĩ enabu shanẽ ibuhairashanũ sheni ininipa maukakĩ katuriatãwẽ. Ana kai mae betsa Abel-Meolá anu Safatẽ huni bake Eliseuki nukushũ mĩ shãtukũ hau ẽ hãtxa hatu yuishunika ishanũ sheni ininipa maukakĩ ea katushũriatãwẽ.

¹⁷ Habu eskashãkanikiki. Israelĩ enabũ habũ ea danãkubainaibu Hazaelĩ detenamenikabũ hatu tenãkĩ taewaibũ hatu anua pashaibu Jeũ detenamenikabũ hatu deteriakĩ taewariaibũ hatu anua pashaibu Eliseũ hawẽ henekĩ hatu tenãriashanikiki.

¹⁸ Habiaskabiakẽ enabu Israelĩ enaburã, Acabe shanẽ ibuaitianã, habũ yushibu Baal dami kẽwaĩ ha bebũ dãti ika dakashũ hawẽ tae hutsu hutsu akama ikubainimabu 7.000 yurabu ẽ hatu heneshanaii, hawa hatu tenã keyuamarã”, aka

Eliseu kenakĩ hau habe dayanũ Eliasĩ katunikiaki, na hãtxarã

¹⁹ Senhor Deusũ hãtxa nĩkabirani hanua Elias kai hanushũ Safatẽ bake Eliseũ hawẽ bai anu hawẽ mibã banakatsis ikĩ ketashamebaĩbaina 12 ina awa dabe hi tekishkũrabea habiaskas txitxibaina hawẽ tsumabu mai sheshati awa sharamabaĩkĩ hatu yunubaĩkĩ Eliseũ hatũri hawẽ henekĩ mai mishpu wakĩ ana pewabainaya Eliasĩ betxibirani haki nukunũ ika kakĩ daĩbaĩkĩ Eliseuki hawẽ yabukuti haki puẽkĩ peyabubaini kaya

²⁰ hawaira Eliseũ hawẽ ina awa henebaini kushikaini Elias txibaĩ kakĩ yuikĩ: —Ẽ ibubu hatu yuikĩ nukũ beya txibãkĩ hatu tãtsu ayutanũ ea manayuwe. Hatu haska watani hushũ ẽ mia txibãkubaĩshanaii— aka Eliasĩ yuikĩ: —Peki. Haska mĩ hatu wakatsis ikai hatu aritãwẽ. Hakia haska ẽ mia katubirãshu hakimama shinaĩratãwẽ— aka

²¹ Elias henebaini Eliseu kashũ ina awa bene dabe katushũ tesẽrabetã hawẽ bitxi dashpeshũ hawẽ nami inũ hawẽ shau meshte meshte atã awa hi tekishkũmisbu betsa karu washũ hawẽ nami bawashũ hatu shunubaĩkĩ unãti wamakĩ hawenabu pima keyutã dayakĩ tapinũ ika Eliseũ Elias txibãbainikiaki, hawẽ dayaruirã.