1 Reis 17 - Kaxinawá Bíblia (BR)

Ui ana ikama mai tashkai keyushanai shanẽ ibuhaira Acabe Eliasĩ yuinikiaki, na hãtxarã

¹ Mai pakea Gileade anu hawẽ mae Tisbé anu hiwea Deusũ hãtxa yuishunika Elias Acabe shanẽ ibuhaira anu kashũ dateama yuikĩ: “Israelĩ enabu mekenika Senhor Deusũ ea nĩkaya ẽ mia yuiaii, ẽ ha dayashũmistũ kenawenã. Eska ikũkaĩshanikiki. Ea nĩkawe. Ano tibi ikũkainaya ẽ yunuriama ui ana ikama inũ basnũ ana butuama ishanikiki”, abaini kaya

^2-3 haskawẽ taea Senhor Deusũ ana Elias yuikĩ: “Bari huaikiri pashai nenua kariwe. Hene Jordão pukebaini ukeri pashku Querite anu huneritãwẽ.

⁴ Hanushũ pashku ũpash mĩ akubaĩtiruki. Hau mia piti bushũkubaĩshanũbũ isa meshupa peiyabu ma ẽ mia hatu katushũ yunushũshuki”, aka

⁵ haska Senhor Deusũ yunua bari huaikiri Jordão pukebaini kai pashku Querite anu bashikua hiwei kakẽ

⁶ penama inũ bari kaya tibi misi inũ nami ba bishũ isa meshupabũ bushũtãtanabu pikĩ pashku ũpash akubainaya

⁷ hakia ha mai pakea anua shaba eskarabes ui ana ikamakẽ pashku netsui tashkai keyuaya

Sarepta anu nawa aĩbu hawẽ bene ma mawanitũ hiwe anu Elias kanikiaki, na hãtxarã

^8-9 hanushũ Senhor Deusũ Elias ana yunukĩ: —Benitã Sidom mai pakea anu mae betsa Sarepta anu katãwẽ. Hari niti ika hiweyutãwẽ. Aĩbu betsa hawẽ bene ma mawani hiwea anu hau hatũ mia pimakubaĩshanũ mia pewashũkĩ ma ẽ mia yunushũshinaki— aka

¹⁰ nĩkatã Elias kakũkaini Sarepta anu hikitã hawẽ hikiti shui dapi niti itã aĩbu hawẽ bene ma mawanikẽ karu metash bi kashũ itxawai Eliasĩ uĩkĩ yuikĩ: —Aĩbuũ, ũpash ẽ manuai kẽtxaki bitãshũ menã ea amariyuwe— aka

¹¹ bishũtanũ ika kai dabekekainaya Eliasĩ ana kenakĩ yuikĩ: —Ha dikabi misi ture betsa ea beshũriatãwẽ— aka

¹² niti itã kemakĩ yuikĩ: —Haska mĩ mekenika Senhor Deus hiwekẽ ẽ mia parãmaki. Hawa misi ba ẽ hayamaki. Shekiwã duru mespu besti shumu merã ẽ mekea inũ piti sheni eskarabes shumu betsa merã ha besti ẽ hayaki. Ẽ huni bakena inũ ena na habiatiã keyu hawẽ bawakatsi ẽ karu benayuaki. Hatis besti bawashũ pitã txipu buni tenei nũ mawashanaii— aka

^13-14 Eliasĩ kemakĩ yuikĩ: —Dateama ẽ hãtxa nĩkawe. “Israelbũ Deusũ ma nuku pewashinaki. Mai anu Senhor Deusũ ui ana imariamakẽ mĩ shekiwã duru shumu merã inũ mĩ piti sheni shumu betsa merã mĩ hayarã, netsuama ikũkaĩshanikiki.” Haskawẽ taeshũ dateama ea bawashũtãwẽ. Ha dukũ mĩ haya misi hatiuma washũ ea beshũwẽ. Haska watã txipu mina inũ mĩ bakena misi betsa mĩ bawatiruki— aka

^15-16 nĩkatã ikũwãbaĩ haska Eliasĩ yunua kashũ misi hatuna inũ hawena inũ hawẽ bakena hatu bawashuna piabu hanua shekiwã duru shumu merã hawa keyuama inũ piti sheni shumu betsa merã haya hawa netsuama haska Senhor Deusũ Elias yuima keska ushe itxapa ha aĩbu inũ hawẽ bake inũ Eliasĩ misi pikubainibukiaki, ui ikamabiakenã.

¹⁷ Hatiãra ha aĩbũ huni bake isĩ tenei taeshina pikukũkaini ana harakiri huĩsinatima tsusabaina dakakẽ

¹⁸ hawẽ ewa datehairakĩ Elias yuikĩ: —Deus anua huniĩ, haskara nũ uinanaĩ? mia inũ earã. Ẽ txakabukũkaini ea shinãmakĩ ẽ bake debuwanũ ika mĩ ebe hiwei huimamẽ?— aka

¹⁹ Eliasĩ kemakĩ yuikĩ: —Mĩ bake ea inãwẽ— atã hawẽ bake shãkixkumea bitã dĩtu manaũri hanu ushamis anu mapemashũ hawẽ dakati anu datãshũ

²⁰ nuihairakĩ hui kushipawẽ Senhor Deus yukakĩ: —Ẽ mekenika Senhor Deusuũ, na aĩbu beneuma bika tenemakĩ mĩ nuitapawai ẽ hawẽ hiwetã ikarã, haskakĩ hawẽ bake mĩ tenanaĩ?— atã

²¹ ha bakeishta mamaki beushũ Elias nuihairakĩ Senhor Deus yunukĩ: —Ẽ mekenika Senhor Deusuũ, bakeishta hawẽ yushĩ ana iweshũ haki nanewe, hau ana hiwenunã— atã benitã ana dabeki haki beushũ habias Senhor Deus dabeki yukaya

²² Eliasĩ hui Senhor Deusũ nĩkatã bakeishtã yushĩ ana haki nanea huĩsinai ana hiweaya

²³ Elias hawaira benitã bakeishta ikubirani tapa manaũria butushũ ibuã dĩtu anu hikitã hawẽ ewa inãkĩ yuikĩ: —Uĩwẽ. Na mĩ bakerã, ma ana hiweaki— aka

²⁴ aĩbũ kemakĩ yuikĩ: —Haska mĩ ea ashũshuwẽ taeshũ txanima mĩ Deus anua huniki. Senhor Deusũ hãtxa txanima mĩ yuimis ikis ẽ mia unãhairaii— anikiaki.