1 Reis 16 - Kaxinawá Bíblia (BR)

Israelĩ enabu anu Acabe shanẽ ibui txakabuhaira inikiaki, na hãtxarã

²⁹ Ma 38 ano kai Judá enabũ mai pakea anu Asa shanẽ ibushũkũkainaya nortekiri Israelĩ enabu 10 shukuabu anu hatũ shanẽ ibuhaira Onri mawashĩkẽ hawẽ shãtukũ hawẽ bake Acabe hari shanẽ ibui taeima Samaria maewã anu hiweshũ 22 ano hatu yunukubainikiaki.

³⁰ Hakia Senhor Deus bebunua hawẽ aka tibi txakabuhairakĩ hawenabu shanẽ ibu txakabuhairabiai mawaira haskama ipaunibukẽ atimapa wakĩ hatu binumahairanikiaki.

³¹ Nebatẽ bake Jeroboãonẽ Senhor Deus danãkĩ txakabuwakubaini keska wakĩ Acabẽ hawa shinãma ana atimapahairakĩ Sidom nawa shanẽ ibu Etbaal aĩbu bake Jezabel aĩwãtã hatũ mekenika yushibu hawẽ kena Baal duawakĩ kẽwãkubaĩkĩ taewanikiaki.

³² Hanushũ hawẽ maewã Samaria anu ha yushibu Baal kẽwãti hiwe inũ hawẽ kẽwãti txi tapu hatu wamanikiaki.

³³ Ha dikabi yushibu aĩbu Poste-ídolo hi dami hatu wamashũ hatu nitxĩmatã haska wakĩ Israelĩ enabu mekenika Senhor Deus sinatahairamakĩ Israelĩ enabu shanẽ ibu betsabu binuhairanikiaki.

³⁴ Acabe shanẽ ibuaitiã huni betsa Betel anua kaini hawẽ kena Hielĩ maewã sheni Jericó ana benawanikiaki. Hielĩ mae kenebaunũ, iwanã, hatu mai pukĩmaya hawẽ huni bake iyua dukũ Abirão mawai taenikiaki. Txipu hawẽ mishki benibaũkĩ keyutã hawẽ henekĩ hawẽ hikiti shui beputi hatu netãmanũ, iwanã, Hielĩ hatu yunuaya habiatiãri hawẽ bake mashkuri Segube mawanikiaki, haska Numnẽ bake Josué Senhor Deusũ bebũkiri yupumakĩ yuimakĩ tsuãra Jericó bena waitianã, hatũ huni bake dabe mawashanikiki, ani txanima haskanikiaki. Hawẽ bakebu haskabiaya atimas Jericó bena wakĩ Hielĩ hatu keyumanikiaki.