1 Reis 12 - Kaxinawá Bíblia (BR)

Israelĩ enabu yunui shanẽ ibu dabei pashkanibukiaki, na hãtxarã

¹ Shanẽ ibuhairanũ ika Siquém anu Roboão kakẽ Israelĩ enabu dasibi hari bushũ hatũ shanẽ ibu wakĩ katunibukiaki.

² Hamẽ betsarã, Nebatẽ huni bake Jeroboão Salomãonẽ detepaia pashai Egito anu hunei kani hiwekẽ ma Salomão mawaimakẽ Jeroboão hari hiwebiakẽ hau hunũ

³ hawenabu Israelĩ enabũ Jeroboão kena txĩtũkirã hawenabu dasibibuki dasitã hau Roboãobe hatu hãtxashunũ yunuabu Roboão yuikĩ:

⁴ —Mĩ epa nũ dayashũbia nuku daya bika tenemakubainimaki. Haskawẽ taeshũ natiã mianã, ha shãkamahaira mei nũ hawa huĩrukũtiruma ishiã nũ huĩrukũyunũ haskaira nuku daya kushipamama eskarabes nuku amakĩ yunukubaĩshãwẽ. Mĩ nuku haska waya nũ mia duawakĩ ashũkubaĩshanaii— akabu

⁵ Roboãonẽ hatu kemakĩ yuikĩ: —Matũ hãtxa ẽ shinã pewayuai buyutãkãwẽ. 3 dia binuaya ebe hãtxai ana betãkãwẽ— hatu wa yurabu hatũ hiwe anu buabũ

⁶ hanua hawẽ epa Salomão hiweatiã ha anibu unanepabũ merabewakubainimabu yuikĩ shanẽ ibuhaira Roboãonẽ hatu yukakĩ: —3 dia binuaya ha yurabu ẽ hatu yuishanai harakiri mã ea yusĩkatsis ikai?— hatu wa

⁷ hãtxanametã habũ yuikĩ: —Natiã mĩ hatu yunukubaĩshanũ Israelĩ enabũ mia betxipaikĩ mia ma shanẽ ibu wakanikiki. Haskawẽ taeshũ haska shinaĩbu keska hatũ hãtxa nĩkakĩ hatu merabewanũ, iwanã, daewati hãtxa pepawẽ hatu yuishãwẽ. Mĩ hatu haska wa mia txibãkubaĩshãkanikiki, shanẽ ibuhaira wakinã— akabu

⁸ hanushũ hawẽ epã anibu unanepabũ hãtxa Roboãonẽ hawa hatu nĩkakĩ txibãkatsi ikama hakia habe yumenibũ merabewakatsis ikaibu Roboãonẽ haburi

⁹ yukariakĩ: —Haska ẽ epã hatu dayamakĩ bika tenemahairakubainima ẽ bika beshmas hatu washanũ ea yukashinabu haska ẽ hatu yuishanũ harakiri mã ea yusiaĩ, hatu haska yuishanunã?— hatu wa

¹⁰ ha habe yumenibũ kemakĩ: —Ha yurabũ haska mĩ epã hatu dayahairamakubainima keskama hau ana bika tenetxakayamakubainũbũ mia yukashinabu eska hatu yuishãwẽ: “Txanima ẽ epa kushipahairakĩ matu yunutxakayamaima keska eã ha binumakĩ ẽ matu yunutxakayamashanaii.

¹¹ Dayamakĩ matu bikahaira tenemabiaimakẽ binumakĩ ẽ matu ana bika tenematxakayakubaĩshanaii. Kupikĩ awa bitxiwẽ ẽ epã hatu matu kusha kusha amakubainimaki. Hakia eã matu hatu kupimakinã, bitxi mane kushipa denetameyawẽ ẽ hatu matu kusha kusha amakubaĩshanaii”, akĩ hatu yuishãwẽ— akabu

¹² haska Roboãonẽ ha yurabu mae anuabu ha hanu beshanũbũ hatu yuishina ma 3 diakẽ Jeroboão yurabube Roboão anu ana beabu

¹³ hanushũ anibu unanepabũ hãtxa danãkĩ hawa hatu nĩkama hãtxa kushipawẽ hatu kemakĩ

¹⁴ haska habe yumenishũ yusĩtxakashinabu habias txibãkĩ hatu yuikĩ: —Ẽ epa kushipakũkaini keska earã, kushipahairakĩ ẽ epã matu apauni ẽ matu binumashanaii. Hatũ matu dayamakĩ matu bikahaira tenemabiakubainimakẽ binumakĩ ẽ matu bika tenema txakayamakubaĩshanaii. Kupikĩ bitxiwẽ ẽ epã hatu matu kusha kusha amakubainimaki. Hakia eãri kupikĩ bitxi mane kushipa denetameyawẽ ẽ hatu matu kusha kusha amakubaĩshanaii— hatu wa

¹⁵ Siló anu Deusũ hãtxa yuishunika Aías Senhor Deusũ hãtxamakĩ haska bebũkiri Nebatẽ huni bake Jeroboão yubaimawẽ taea shanẽ ibuhaira Roboão haska Senhor Deusũ shinaĩma keska hau inũ Israelĩ enabu danãmaya hatũ hãtxa Roboãonẽ hawa nĩkamakẽ

¹⁶ shanẽ ibuhaira Roboãonẽ haska betxipaiaibu hatu ashũkatsi ikama hawa hatu nĩkama ibubis ikaya Israelĩ enabu shukuabu shanẽ ibubu inũ anibu unanepabũ uĩkĩ unãtã hawaira yuinamei shinã betsaibũ habias shinaĩbu keska huni betsã hatu kemashũkĩ hui kushipawẽ shanẽ ibuhaira yuikĩ: “Txanima, nukuburã nũ hawa Davĩ enabumaki. Jessé enabube hiwekũkaini nũ hawa hatũ hamapai biama ikũkaĩshanaii. Davĩ enabu shukuabu bestitxai ibubis hatumebi shanẽ ibutirubuki. Haskakenã, enabu Israelbuũ, nukũ hiwe tibi burinãkãwẽ”, hatu wa hawẽ hãtxa nĩkatã henebaini Israelĩ enabu 10 shukuabu nortekiri hatũ mae tibi hawaira buake buakeaibũ

^17-18 hau hatu ana dayamakubainũ kushipawẽ hatu dayamakubaĩmis shanẽ ibu Adorão shanẽ ibuhaira Roboãonẽ ana yunukĩ nitxiã Israelĩ enabu 10 shukuabu anu kashũ hatu ana dayamapanã haki sinatakĩ mashash tũkewẽ tsaka tsaka akĩ tenãshinabu haska washinabu Roboãonẽ nĩkatã hatuwẽ datei hawẽ cavalõ tarãbaĩtiki hawaira inatã Siquém anua pashai Jerusalém anu kai hikia Judá enabũ mae pakekauana anu Israelĩ enabu hiwebaunabu besti yunui Salomãonẽ bake Roboão hatũ shanẽ ibu ikũkainaya

¹⁹ haska kainimawẽ taea Israelĩ enabu 10 shukuabũ danã taewabainibu Davĩ enabu ana hatũ shanẽ ibumawẽ taea danananãtiani natiã habiaskas ikubaĩmisbukiaki.

²⁰ Egito anua Jeroboão ma txĩtuĩmakẽ Israel enabu dasibibũ unãtã ha shanẽ ibuhaira wakatsi ikĩ Jeroboão kenabu hua Israelĩ enabu dasibi itxabu anushũ shanẽ ibuhaira wakatsi katukĩ hatũ shanẽ ibuhaira wabu Davĩ enabu shanẽ ibuhaira Roboão tsuã ana nĩkakĩ txibãbumahairakẽ hakia Judá enabũ Davĩ baba Roboão nĩkakĩ habũ besti txibãkubainaibũ

²¹ Israelĩ enabu anu ana hatũ shanẽ ibuhairakatsis ikĩ 10 shukuabube detenamekĩ binutã hatũ shanẽ ibunũ ika Jerusalém anu ana hikishũ Judá enabu mae tibi anua inũ Benjamimnẽ enabu mae tibi anua detenamea unãhairaibu katukĩ 180.000 detenamenikabu Roboãonẽ hatu itxawakĩ keyukẽ

²² haskaibu Deusũ uĩkĩ huni betsa hawẽ kena Semaíasĩ Deus txibãhairamis ha Deusũ yunukĩ yuikĩ:

²³ —Salomão bake Roboão Judá shanẽ ibu inũ, Judá enabu dasibi inũ, Benjamimnẽ enabu dasibi inũ, hatiri Israelĩ enabu mĩ mai pakea anu hiweabu hatu ea nemashũkĩ yuikĩ:

²⁴ “Senhor Deusũ matu yunuikiki. Matũ betsabu Israelbuberã, ana hatube detenameyamakãwẽ. Haska shinãkĩ ẽ matu pashkaimawẽ taea matũ mae tibi anu txĩtũbaĩkãwẽ”, akĩ hatu ea yuishũtãwẽ— aka Semaías kashũ ha detenamenikabu hatũ shanẽ ibubube Senhor Deusũ hãtxa hatu yui keyua haska Senhor Deusũ ma hatu yunua nĩkatã Roboão henebaini Senhor Deusũ hãtxa ikũwaĩ hatũ mae tibi txĩtuaĩbũ

Jeroboãonẽ yushibu betsa kẽwãti dami dabe hatu amanikiaki, na hãtxarã

²⁵ Efraimnẽ enabu mai pakea mati matipa anu hawẽ maewã Siquém anu hiweshũ Jeroboão shanẽ ibuhairai taekĩ hawẽ mishki kenebaunibu ana hatu bena wamakĩ maewã hirabi hau pewanũbũ hatu yunushũ hatu uĩkubaina hawẽ yunua txibãkĩ akĩ keyuabũ hanua Hene Jordão kesha betsauri Peniel anu ha maeri hau pewanũbũ Jeroboãonẽ hatu yunua pewakĩ keyurianibukiaki.

^26-27 Hanushũ Jeroboão datekĩ shinãkĩ: “Senhor Deus kẽwãti hiwe Jerusalém anu bushũ Senhor Deus kẽwãkĩ txashuwã tesẽshũ hawẽ sheni inãkĩ kua keyukĩ hawẽ nami bawashũ Senhor Deus bebũshũ pi ano tibi Jerusalém anu butã butãkĩ ana Judá enabu shanẽ ibuhaira Roboão betxipaimakĩ taewatirubuki. Haska wakĩ ea hatu tenãmatã hanushũ Roboão ana txĩtuĩ hatũ shanẽ ibuhaira itiruki”, ikĩ

²⁸ haska shinãtã txipu hawẽ unanepabube hãtxanamei menetã ouro ina awa bake bene dami dabe Moisĩ betsa Arãonẽ ani keska hau anũbũ hatu yunua akĩ keyushũ hatũ shanẽ ibubu inũ yura itxapabu bebũ nitxiãbu metukĩ Jeroboãonẽ hatu yuikĩ: “Jerusalém anu kashũ Senhor Deus kẽwaĩ ma txai butã butãmisbu bikawẽ taeshũ na mekenika yushibu dami dabetũ Egito anua nukũ shenipabu hatũ hatu pashawanirã, naki”, hatu watã

²⁹ Betel hanu hawẽ Deuski nukuti tari hiwe pũtenibu anu ina awa dami bestitxai hatu bumashũ nitxĩmashũ hanushũ ina awa dami betsa nortehairakiri mae betsa hawẽ kena Dã anu hatu buma hatube kashũ hatu nitxĩmariakẽ

³⁰ ha ouro ina awa bake bene dami dabe Betel inũ Dã anushũ kẽwaĩ Senhor Deuskiri Israelĩ enabu txakabui taeaibũ

³¹ ha dikabi mati keyatapa betsa betsapa anu hatũ yushibu kẽwãti hiwe itxapa Jeroboãonẽ hatu wamatã hau hawenabu hatũ deus benabe hãtxashunikabu ikubaĩshanũbũ Levĩ enabuma hatu katutã

^32-33 hanushũ Judá enabu Jerusalém anua hanu besimisbutiã habias shabatiãri Jeroboãonẽ hawenabu habianuri hatũ besiti bena washũkĩ ha habias oitavo ushe shaba 15tiã Betel anushũ hatu amashĩshũ taewakĩ hawenabu ouro ina awa bake dami wamashĩshũ hanu hatu mestẽwãmakĩ hatũ yushibu dami kẽwãkĩ inabu menukĩ hau kuakubaĩshanũbũ ibubis shinãkĩ Jeroboãonẽ hatu yunuima hawenabu hatũ deus benabe hãtxashunikabubetã hau apakeshanũbũ Betel anushũ hawẽ kẽwãti txi tapu waimabu anushũ Jeroboãonẽ inabu nami inũ hawẽ inĩti sheniyabi menu keyukĩ hatu taemanikiaki.