1 Reis 11 - Kaxinawá Bíblia (BR)

Jeroboãonẽ Salomão dananikiaki, na hãtxarã

²⁶ Efraim enabu huni betsa Nebatẽ huni bake Jeroboão mae betsa Zereda anua kaini txipu ma hawẽ epa mawaimakẽ hawẽ ewa Zerua beneumatũ hawẽ bake Jeroboão yumewaima huni ewatã Salomão dayashũbiai Salomão shanẽ ibuki sinatakĩ danãkĩ ana txibãma inikiaki.

²⁷ Haska wakĩ shanẽ ibuhaira Salomão Jeroboãonẽ danani matu yuinũ nĩkakãwẽ. Jerusalém anu hanu Davĩ ha dukũ hawena wakĩ mae ibu wani: “Davĩ Maeki”, iwanã, kenamisbu anushũ napaku mata wakĩ pãpa washũ hawẽ mishki kene Milo anu hatiri di ikai hau bena wakĩ pewashanũbũ Salomãonẽ hatu yunua dayakĩ taewaibũ

²⁸ hatube dayai Jeroboão huni kushipa yunu beru inuĩra uĩkĩ beru mestẽwãshũ Israelĩ bake José enabu hau hatu dayamakĩ hatu yunukubaĩshanũ Salomãonẽ Jeroboão katushũ shanẽ ibu beshmas hatu washuĩmakẽ

²⁹ shaba betsatiã Jerusalém anua kaĩkaini kai mae betsa Siló anua Deusũ hãtxa yuishunika hawẽ kena Aíasĩ yabukuti bena sawea bai putxinĩ Jeroboãoki nukutã ha dabe besti nia tsuã uiãma inũ tsuã nĩkabumakẽ,

³⁰ hawẽ yabukuti bena Aíasĩ pekashũ hawẽ mekẽ dabewẽ tsumashũ tari ushni ushni akĩ 12 watã

³¹ Jeroboão yuikĩ: “Na ẽ tari ẽ ushnishurã, 10 ushni bishũ mekeyushãwẽ. Haska mĩ biairã, shabakabi mia yuinũ nĩkawe. Israelĩ enabu mekenika Senhor Deusũ mia yuikĩ: ‘Hau Israelĩ enabu ana hatũ shanẽ ibuyamanũ Salomãonẽ enabu anua ẽ hatu mebĩshanaii. Haska watã Israelĩ enabu 10 shukuabu mĩ hatũ shanẽ ibu ikũkaĩshanũ ẽ mia yunushanaii.

³² Hakia Israelĩ enabu mae tibi anua Jerusalém katushũ ẽ kena ẽ hanu netani inũ ẽ tsuma Davi ẽ betxipainiwẽ taeshũ Israelĩ enabu shukua bestitxai Salomãonẽ enabu ẽ habu heneshũshanaii.

³³ Salomão inũ hawẽ huni bakebũ ẽ hãtxa nĩkama danãkĩ ea henetã Sidom nawabu mekenika yushibu Astarote inũ Moabe nawabu mekenika yushibu Quemos inũ Amom nawa mekenika yushibu Milcom duawakĩ hatu kẽwãmisbuki. Haskakubainaibu uĩkĩ: Txakabukubaĩkanikiki, iwanã, ẽ hatukiri shinãmiski. Ha dikabi haska Davĩ ẽ hãtxa txibani keska wama ẽ yunuti hãtxa inũ ẽ nemati hãtxa txibãbumawẽ taeshũ ẽ hatu kupishanaii, 10 shukuabu mebĩkinã.

³⁴ Hakia Davi ẽ katuni ẽ tsuma ikũkaĩkĩ ẽ yunuti hãtxa inũ ẽ nemati hãtxa txibaĩ hiwekũkainiwẽ taeshũ hau shanẽ ibuhairanũ ẽ mebiãma Salomão hiwekũkainaya shanẽ ibuai ẽ mekekubaĩshanaii.

³⁵ Hakia Israelĩ enabu dasibi hau ana shanẽ ibuyamanũ Salomãonẽ bake ẽ nemashanaii. Mebĩtã ẽ mia katushanaii, Israelĩ enabu 10 shukuabu yunui mĩ shanẽ ibu ikũkaĩshanunã.

³⁶ Hanu ẽ kena ipashanai Jerusalém ẽ katuni anu meshu merã bĩ dekua keska ẽ tsuma Davĩ enabu huni bestitxai katukubaĩkĩ ea bebunua Jerusalém anu shanẽ ibutiru, Israelĩ enabu shukua bestitxai ẽ henekubaĩshanaii.

³⁷ Hati yurabu mĩ yunui shanẽ ibukĩ Israelĩ enabu shanẽ ibu mĩ ikũkaĩshanũ ẽ mia katushanaii.

³⁸ Haska ẽ mia yunuai mĩ akubainai inũ haska miãri betxipaikĩ txanima ẽ yunuti hãtxa inũ ẽ nemati hãtxa ẽ hatu yusini Davĩ txibãkĩ akubaini keska wariakĩ mĩ akubainai mia merabewai mibe ikũkaĩkĩ minabu ẽ mia shanẽ ibu wamakubaĩshanaii, hanua Davĩ enaburi hatu shanẽ ibu wariakubaĩkinã. Mĩ haska waya Israelĩ enabu ẽ mia hatu ibu wamashanaii.

³⁹ Hatũ txakabuwẽ taeshũ Davĩ enabu pakubainaibu bari itxapa hatu kupikubaĩkĩ atimas henekĩ ẽ ana hatu kupiama ishanaii’ ”, anikiaki. Haska wakĩ Deusũ hãtxa yuishunika Aias Jeroboão yuimanikiaki.

⁴⁰ Haska Aiasĩ Jeroboão yuishina Salomão tapĩtã hau Jeroboão tenanũbũ hawẽ tsumabu yunua atxitã tenãpanãbũ Egito nawabu shanẽ ibu Sisaque anu pashai ka, Salomão mawariamakẽ hari irui pashai kaima Jeroboão hiwekũkainikiaki.

Salomão mawanikiaki, na hãtxarã

⁴¹ Salomão hawẽ unanepa hãtxa betsa betsapa inũ dasibi hawẽ daya tibi akubaini ha miyui una merã hakiri kenenibukiaki.

⁴² Jerusalém anu hiwekĩ Israelĩ enabu dasibi yunui 40 ano Salomão shanẽ ibukũkaini

⁴³ atimas mawa mae mishki kenebaunibu hawẽ epa Davĩ ha dukũ mae ibu wani anu maiwabu hanua Salomão shãtukũ hawẽ huni bake Roboão shanẽ ibui taenikiaki.