1 Reis 10 - Kaxinawá Bíblia (BR)

Sabá anua nawa aĩbu shanẽ ibuhaira Salomãobe hãtxanũ ika hunikiaki, na hãtxarã

^1-2 Senhor Deus kẽwaĩ Salomão unanepahairakũkainaya txanibaunaibu Sabá anua nawa aĩbu shanẽ ibuhairatũ Salomãokiri bana nĩkatã hawẽ yukati tibi itimaskawẽ hawẽ unanepa unãti wanũ ika txaihairabiakẽ Jerusalém anu kai hawẽ mekenika kushipabu yura hawẽruabu itxapabube inũ, hawẽ dayarubu itxapa inũ, camelo kamaki sheni inĩti itxapaya inũ, ouro mirima inũ, hawẽ dauti hawẽrua betsa betsapa mirima peumatã bekubirani atimas hikiabu Salomãonẽ mekenikabũ Sabá anua nawa aĩbu shanẽ ibuhaira iweshũ Salomão bebũ nitxiãbu ha aĩbũ hawẽ yukati itimaska inũ bika haska bebũkiri shinaĩma Salomão yukakubaina

³ hawẽ yukati tibi bestibu kemakĩ Salomãonẽ yuikubaĩkĩ keyua, hawara aĩbu shanẽ ibuhairatũ yukati betsa Salomãonẽ huneama yui keyutiru inikiaki.

⁴ Salomãonẽ unanepa hãtxa nĩkatã hanushũ hawẽ hiwe hawẽrua ewapahaira waima uĩ keyutã

⁵ shanẽ ibũ tapu anushũ piti pepa betsa betsapa hatu pimakubaĩmis uĩriakĩ hanu hawẽ unanepa shanẽ ibu beshmasbu pe hiwemisbu uĩ keyubaũkĩ hawẽ dayarubũ tari hawẽrua saweria habũ pe shinaĩ dayashũkubaĩmisbu uĩriakĩ shanẽ ibũ piti inũ hawẽ neshuti hawẽ tenãti dau hayamẽkaĩ, iwanã, ha dukũtũ pikĩ meshũmis unãtã shanẽ ibu pimakĩ neshumakĩ akubaĩmisbu uĩriakĩ, Senhor Deus kẽwãti hiwe bebũ txashuwã tesẽshũ txiwẽ hawẽ yura hirabi kuakĩ Salomãonẽ akubaĩmis dasibi haska sharabu uĩ keyutã haska wamis uĩkĩ shinaĩ hashpa daka e ikũkaĩkĩ

⁶ aĩbu shanẽ ibuhairatũ Salomão kẽwãkĩ yuikĩ: “Mĩ unanepa hãtxa inũ haska hawara sharabu mĩ pewakubaĩmiskiri ẽ mae pakea anushũ ea yuiabu ẽ mikiri nĩkakubainimarã, mĩ txanimaki.

⁷ Hakia haska bestima ea kayabis hushũ hanũkaĩ ẽ beruwẽ uĩkĩ haska ẽ nĩkaima keska eskatiã ẽ mia ikũwãtiruki. Mikiri pepa namakis besti ea yuimabuki. Haska ẽ nĩkakubainima mĩ unanepa inũ hamapai sharabu hayakĩ mĩ ma binuaki.

⁸ Mia dapi itxashũ mĩ unanepa hãtxa nĩkai minabus inũ mĩ unanepabu inũ mĩ dayarubu shinã txãkaĩ benimakubaĩmisbuki.

⁹ Mia betxipaikĩ merabewakĩ Israelĩ enabu mĩ hatu yunukubaĩshanũ mia katushũ shanẽ ibuhairawaniwẽ taeshũ mĩ mekenika Senhor Deus duawakĩ kẽwanãkãwẽ. Hawẽ nui paewẽ hawa kaneama mĩ hatu yunukubaĩshanũ Israelĩ enabu Senhor Deusũ hatu betxipaihairakubaĩmiswẽ taeshũ shanẽ ibuhairawakĩ mia katuniki”, atã

¹⁰ hanushũ aĩbũ Salomão duawakĩ 20 talento de ouro, 4.000 quilo ourorã, inũ, sheni hawẽ iti ininipa mirimahaira inũ, hawẽ dauti hawẽrua betsa betsapa mirimahairari Salomão hamẽ inãkuinikiaki. Hati sheni ininipa itxapahaira Sabá anua nawa aĩbu shanẽ ibuhairatũ Salomão inãkuini keska binumakĩ Israelĩ enabũ mai pakea anu tsuã hati beshũ inãma inikiaki.

¹¹ Ha dikabi ha dukũ Sabá anua nawa aĩbu shanẽ ibuhaira huriama Salomãonẽ haibu Tiro shanẽ ibuhaira Hirão shashu ewapabu mabu bemisbu mai pakea betsa hawẽ kena Ofir anua ouro beshũbirãbirãmisbu inũ habiabũri hi betsa hawẽ kena almugue inũ mishki karuhaira itxapahairari Salomão anu beshuãbu

¹² Senhor Deus kẽwãti hiwe inũ hawẽ hiwe ewapa hawẽrua anushũ hawa teketima wakĩ ha hiwẽ kebẽbaũkĩ hau ashanũbũ Salomão hatu yunukubaĩkĩ hawẽ mimawati harpa inũ saltério mimawanikabũ hau ashũkubainũbũ Salomãonẽ hatu yunurianikiaki. Haska wanibu keska ha hi sândalo itxapa ana beabuma inũ, natiãri tsuã ana hati beai nũ uiãmariki.

¹³ Hanushũ hawara sharabu Salomão anua bikatsis ikĩ Sabá anua nawa aĩbu shanẽ ibuhairatũ yuka inãtã hanushũ ibubis Salomãonẽ hawẽ inãkuĩ hãtsiri inãnikiaki. Haska wa hawẽ mekenikabu inũ unanepa merabewamisbu inũ hawẽ dayarubube hawẽ mai pakea anu hatube txĩtũkainikiaki.