Zacarías 9 - Kashibo-Kakataibo Biblia

Israelnën ꞌapu Jerusalénnu bëba ñuikë bana

⁹ (Ësai ka Dios kia.) ¡Sión ëmanu tsókë unikamax ka ꞌitsaira kuëënti ꞌikën! ¡ꞌImainun ka Jerusalén ëmanu tsókë unikama atúxribi kuëëni kantati ꞌikën! Mitsun ꞌapu, upí ainra kamabi ñu kananti ax ka aia, ꞌaínbi ka mënin sinaínshi ꞌaish, achúshi burro xanuntuá bërí kanikë a kamanan tsótax aia.

¹⁰ An ka anuaxa suntárukama Israelnën, menuax ꞌakanankë caballonën nirinkë akama ꞌimainun anuaxa Jerusalénnu ꞌikë suntárukama ꞌakanankë caballokama ꞌanan anúan ꞌakanankë aín kantikama aribi këñuti ꞌikën. An ka Israel kama ꞌimainun kamabi menu ꞌikë unikamax upiti tsónun ꞌimiti ꞌikën, an ka parúmpapa Mediterráneo kakë anuaxi parúmpapa itsi parúmpapa itsi anu ꞌikë unikama upiti bukunun ꞌimiti ꞌikën, ꞌimianan ka Éufrates baka anuxunbi uinu kara me sënënakëakëxa anu sënë́nbi unikama ꞌakinti ꞌikën.

Diosan Israel kama amiribishi timëaxa bukunun ꞌimiti ñuikë bana

¹¹ Ësai ka Dios kia: Jerusalénnu bukukë unikama mitsun kamina kuati ꞌain, ꞌën kana Israel unikama bëtsi menu ꞌikëbi ië́miti ꞌain, usa ꞌain kana ꞌën anua ꞌumpax biti kini ꞌumpaxñuma ꞌinun ëskikë ꞌikëa anu uni sipuati ꞌakë usanu ꞌikëbi mitsu chikiankën. Usakin kana mitsubëtan achúshi ñu mëníokin ꞌásabiokin biti ꞌain, usa ꞌain kamina mitsun ñuina ꞌë xaroxunuxun aín imi ꞌapamikin ꞌakën.

¹² ¡Ñatanbiankin uan mitsun kamina ꞌën ꞌakinti kainin! ¡Usa ꞌain kamina amiribishi Jerusalénnu kuantëkënti ꞌain! ꞌËn kana mitsu kain, anuxun kana tëmëraimi bamai këñúkan usamaira ꞌimi ꞌuakamë ꞌëotëkënun ꞌimiti ꞌain.

¹³ ꞌËn kana Judánu ꞌikë Israelkama anun ꞌakanankë ꞌën kantisa ꞌinun ꞌimian, ꞌimianan kana Efraín Israel, unikama aturibi ꞌën piasa ꞌinun ꞌimian. ꞌAnan kana Siónnu ꞌikë, Israel suntárukama an ꞌën manë xëtókësa ꞌixun Grecianu ꞌikë suntárukama ꞌanun ꞌamiti ꞌain.

¹⁴ Usakin ꞌakëbëtan ka Diosan aín unikama aín kushi chaiira cha anun ꞌakinti ꞌikën; ꞌakinkin ka kaná mëríkë axa pia nikëx kuankë usa ꞌitánun ꞌimiti ꞌikën. ꞌImi ka Dios aín manë banañu banobiani suñúan mëu aín rëbumi kikiani kuanti ꞌikën.

¹⁵ ꞌËnbi kana kamabi kushiñu ꞌixun ꞌën unikama bërúanti ꞌain, usokëxun ka atun axa ami nishkë unikama anun ꞌakanankë ñukama tsasipakin ꞌatima oti ꞌikën, usakin ꞌakin kanantankëxun ka chaiira fiesta ꞌati ꞌikën, usakin ꞌai ka xëakë anunbi paë́nkanti ꞌikën; atun xëakë uvas baka anunbi ka amia xëakëkama a buchukë ꞌiti ꞌikën, usakin ka xampakama anuxun ñuina xaroti anu chikuti imin buchukë usa ꞌitánun ꞌati ꞌikën.

¹⁶ A nëtë ꞌikëbëtan ka Diosan, aín unikama ië́mikin an ñuina bërúankë unían aín ñuina ꞌakësaribi okin bërúanti ꞌikën, usakin ꞌakëx ka aín unikama atun ëmanuabi upíira maxákama aín maitinu purukë ꞌichúkë usai ichuti ꞌikën.

¹⁷ ¡Upíira upí ka anu aín unikama ꞌiti ax ꞌikën! Usa ꞌain ka aín trigo bimi ꞌitsaira ꞌimainun a xëati uvas baka ꞌaisamaira ꞌikëbë aín bakë bëchikë ꞌimainun ꞌini bëchikë kama upí ꞌinun kanikanti ꞌikën.